‘Eme Mẹ rẹ Sai Ru?’
1 ‘Eme mẹ rẹ sai ru?’ Ababọ avro, onọ oyena o jọ iroro ẹko ahwo ọsese ọ uwuhrẹ Ebaibol nọ Charles Taze Russell o kokohọ evaọ etoke 1870 na. Nọ a be nyaharo evaọ otoriẹ rai kpahe oreva Ọghẹnẹ na, o jẹ hai gbe emọ-uwuhrẹ Ebaibol ọsosuọ na unu oware nọ a rẹ sai ru ro fiobọhọ kẹ amọfa wuhrẹ kpahe ẹjiroro Ọghẹnẹ. Re a rehọ eriariẹ Ebaibol nọ a bi wo na nyate akpọ na soso yọ okolo iruo ho.
2 Avọ evawere k’omai, a fiọ ẹbẹbẹ ọyena kparobọ. Evaọ oghẹrẹ vẹ? Omomọvo o ru ẹmẹkabọ riẹ, fikiere nẹnẹ na, a jọ akpọ na soso riẹ Isẹri Jihova no—ukoko nọ u wo enwenọ iwhowho Uvie ima ezeza nọ i bi ruiruo evaọ ole ikoko 90,000 evaọ ekwotọ gbe ikoliko abade 234!—Aiz. 60:22.
3 Rọ Ẹgba Ra Kpobi Fiobọhọ: U wuzou re omomọvo mai o wo abọ evaọ iruo ilogbo nọ Jesu ọ ruẹaro nọ a ti ru evaọ edẹ urere na. (Mak 13:10) A rẹ sae nyasiọ iruo nana ba kẹ umutho ekpako ukoko na ọvo ho; hayo kọ ekobaro na ọvo iruo usiuwoma ota na o rrọ uzou hu. Evaọ uzẹme, Oleleikristi nọ ọ roma mudhe no kpobi o wo obọdẹ abọ nọ o re ru. Mai kpobi a rẹ sai w’abọ evaọ abọjọ iruo usiuwoma ota na. (1 Tim. 1:12) Epanọ ẹgba mai o te kpobi, ma rẹ kẹ omobọ mai gbe amọfa erere.—1 Tim. 4:16.
4 Omomọvo ọ rẹ sae rọ ẹgba riẹ kpobi fiobọhọ kẹ okugbe-inievo Ileleikristi mai na evaọ obọdẹ idhere efa jọ. Ma rẹ sae tha iwuhrẹ ukoko na uke ẹkwoma ekpohọ iwuhrẹ ẹsikpobi je w’obọ ziezi. (Ol. 122:1, 8, 9) Ma rẹ sai ru ẹkabọ mai re ma ru ukoko na fuafo ẹkwoma uruemu mai. Ma rẹ sae rọ ugho fiobọhọ kẹ iruo akpọ soso na wọhọ epanọ obọ mai o lọhọ te. Ma rẹ sai w’obọ evaọ orufuọ Ọgwa Uvie na. Ohwo kpobi ọ sai fiba ẹzi ọruọruọ uyoyou avọ okugbe evaọ ukoko na ẹkwoma obufihọ kẹ ahwo ọkpokpọ, emaha, gbe enọ e kpako no.—Kọl. 3:12, 14.
5 Fikiere whọ sae nọ inọ, ‘Eme mẹ rẹ sai ru?’ Dede nọ whọ sai rri omodawọ ra kakao, ẹkwoma eruo ẹkabọ ra, yọ who bi fiba ukoko ogaga, ojajaka, orọ omokpokpọ. Fikiere mai kpobi ma wo obọdẹ abọ evaọ orro orọkẹ odẹ Jihova!