‘Rọ Kpahe Omẹ Ẹsikpobi’
1 Ahwo buobu a t’ẹro rai vi omobọ rai ọvo nọ a re ru eva were, ghele na, a be wereva ẹsibuobu hu. Wo ohẹriẹ, Jesu o dhesẹ edhere ọrọ okẹ nọ o kare oriobọ nọ o rẹ wha uvi evawere ze. (Iruẹru 20:35) Ọ ta nọ: “Ohwo nọ ọ guọlọ nọ ọ rẹ rọ kpahọ omẹ, jọ ọ vro oma riẹ, . . . ọ rọ kpahe omẹ.” (Mak 8:34) Onana o kẹre vi omaweromẹ jọ nọ ma rẹ rọ gbọ omobọ mai ogbọ evaọ otiẹse. U dhesẹ uzuazọ mai nọ ma re yeri kẹdẹ kẹdẹ ro ru eva were Jihova, orọnikọ omobọ mai hi.—Rom 14:8; 15:3.
2 Roro kpahe oriruo Pọl ukọ na. Fiki “aghare ologbo ọrọ eriariẹ kpahe Kristi Jesu,” Pọl ọ nya siọ ilale eware omobọ riẹ ba, ọ tẹ rọ oma riẹ kpobi kẹ ẹwhaharo isiuru Uvie na. (Fil. 3:7, 8, NW ) Ọ ta nọ: “Mẹ rẹ ghọghọ raha igho mẹ gbe uzuazọ mẹ” ro fiobọhọ kẹ amọfa. (2 Kọr. 12:15) U re fo re mai omomọvo ma nọ inọ: ‘Ẹvẹ mẹ be rehọ okẹ mẹ, ẹgba mẹ, gbe ekwakwa mẹ ro ruiruo? Kọ ele isiuru omobọ mẹ mẹ tẹro vi, manikọ mẹ be gwọlọ oghẹrẹ nọ me re ro ru Jihova eva were?’
3 Uvẹ nọ Whọ Rẹ Rọ Kẹ: Kukpe kukpe, ahwo Ọghẹnẹ a be raha euwa nọ i bu vi ima ọvo evaọ iruo usiuwoma ota Uvie orọ uzuazọ usiwo na. Evaọ ukoko na, temaha tekpako a be rọ ẹro te iruo sa-sa nọ amọfa a bi wo erere no ze. Iruo ilogbo efa e riẹ re nọ a be hae jọ ikokohọ esese gbe ilogbo ru, jegbe evaọ ẹbọ gbe ẹruorote iwou nọ a be jọ wha egagọ uzẹme haro. Who je roro kpahe obufihọ uyoyou nọ inievo nọ i bi ruiruo eva Hospital Liaison Committees (Egbẹgwae Uruẹme Kugbe Iwou-Imu) gbe Patient Visitation Groups (Ẹko-Iweze Bru Enọ E Be Mọ) a be kẹ. Omodawọ yena kpobi nọ inievo na e be rọ roma dheidhe na yọ oghale kẹ okugbe-inievo mai na!—Ol. 110:3.
4 Uvẹ nọ ma re ro fiobọhọ evaọ idhere buobu o rẹ sae roma via nọ okpẹtu hayo oware idudhe jọ o tẹ roma via. Rekọ, eva ẹsibuobu, ma rẹ sai vuhumu inọ ibe Oleleikristi jọ ọ gwọlọ obufihọ hayo uduotahawọ. (Itẹ 17:17) Nọ ma tẹ ginẹ fialoma via re ma fiobọhọ kẹ amọfa, jẹ wha isiuru Uvie na haro, yọ ma bi lele oriruo Jesu. (Fil. 2:5-8) Joma daoma ru ere ẹsikpobi.