Ruẹrẹ Ahwo Ọkpokpọ Oma Kpahe re A sai Thihakọ Ọwọsuọ
1 Nọ ohwo o te mu Ebaibol na họ ewuhrẹ no je wo isiuru nọ o re ro yeri uzuazọ ohwo Ọghẹnẹ, Setan ọ rẹ daoma kpobi re ọ wọso iẹe. (2 Tim. 3:12) Ọwọsuọ ọ sai no obọ ibe-iruiruo, ibe emọ-isukulu, hayo ahwo okegbe rai ze. O rẹ mae jọ bẹbẹ nọ imoni rai nọ a fievahọ a tẹ be wọso ae.—Mat. 10:21; Mak 3:21.
2 A Ruẹaro Ọwọsuọ Kpahotọ: Jọ ahwo nọ a bi kurẹriẹ ziọ ukoko na obọ a riẹ vuhumu inọ ukpokpoma o sai te ai, oyena yọ oka nọ u dhesẹ nọ uvi Ileleikristi a bi zihe ro na. (Jọn 15:20) Eva ẹsejọ, ahwo a rẹ sae wọso Isẹri Jihova fiki eme ethọthọ nọ amọfa a ta kpahe ae. Woi họ iroro inọ a te ru oma vo owhẹ fikinọ whẹ yọ olele Jesu gbe fikinọ who bi yoẹme kẹ Ọghẹnẹ, o rẹ wha oghọghọ ulogbo ze. (Iruẹru 5:27-29, 40, 41) Kẹ ahwo ọkpokpọ imuẹro uketha Jihova. (Ol. 27:10; Mak 10:29, 30) A te kru ẹgbakiete rai u re dhesẹ nọ a rrọ abọ Jihova evaọ ẹme esuo ehrugbakpọ na.—Itẹ 27:11.
3 Iruo Eriariẹ Egbagba: Dhesẹ kẹ emọ-uwuhrẹ Ebaibol ra epanọ u wuzou te re a ruabọhọ ewo eriariẹ egbagba nọ ọwọsuọ ọ tẹ be make te ai. Setan ọ rẹ gwọlọ rehọ ẹkwoma ọwọsuọ wha ozighi họ ai oma re a se oware nọ a bi wuhrẹ ba ẹkareghẹhọ. (Itẹ 4:23; Luk 8:13) O gba rai họ nọ a rẹ ruabọhọ ewuhrẹ Ẹme Ọghẹnẹ re a sai dikihẹ gaga evaọ ẹrọwọ na.—Ol. 1:2, 3; Kọl. 2:6, 7.
4 A Gwọlọ Ithihakọ: O r’oja re a thihakọ evaọ otọ uyero obẹbẹ kpobi, yọ ere oruo o rẹ wha emamọ iyẹrẹ ze. (Luk 21:16-19) Nọ ahwo ọkpokpọ a te thihakọ ọwọsuọ, ai omarai gbe amọfa a re wo erere. A rẹ ruẹ epanọ Jihova ọ rẹ ghale otu nọ e rehọ eva rai kpobi thihakọ.—Jem. 1:12.
5 Pọl ukọ na ọ ghọghọ fiki ẹnyaharo abọ-ẹzi ọrọ inievo Ileleikristi riẹ nọ e jọ obọ Tẹsalonika. Ọ kẹ Ọghẹnẹ uyere fiki rai, ibuobu rai yọ enọ o fi obọ họ kẹ riẹ uzẹme na. (2 Tẹs. 1:3-5) Ma rẹ sai wo oghọghọ gbe evevọwẹ ọvona otẹrọnọ ma ruẹrẹ emọ-uwuhrẹ Ebaibol mai oma kpahe re a sai thihakọ ọwọsuọ.