Thọ Emọ Ra no Iruẹru Egagọ Erue Evaọ Obọ Isukulu
1. (a) Fikieme emọ Isẹri Jihova a be sai ro dhesẹ emamọ uruemu evaọ obọ isukulu? (b) Kọ didi use-abọ emọ itieye na e be rẹriẹ ovao dhe?
1 Evaọ isukulu buobu, a riẹ emọ Isẹri Jihova kẹ emamọ uruemu rai. Onana o rrọ ere keme esẹgbini rai a daoma wuhrẹ ai ziezi re a nya lele idhere Jihova. (Ẹf. 6:4) O make rrọ ere na, emọ Isẹri Jihova a be rẹriẹ ovao dhe use-abọ sa-sa evaọ okegbe isukulu. Ma be hai yo n’oke ruoke inọ emọ isukulu a be hae jọ obọ isukulu gb’ọfariẹ hayo ru iruemu ozighi.
2. Eme ahwo jọ nọ i wuzou isukulu a be hai ru re emọ-isukulu e siọ ekpehre uruemu ba ewo?
2 Evaọ ẹsibuobu, re emọ isukulu a sae siọ ekpehru uruemu ba, enọ i wuzou isukulu a rẹ kẹ emọ isukulu ithubro rono ebe egagọ ze, ẹsejọ dede a re zizie isu-egagọ ze re a kẹ emọ na ithubro. Isukulu jọ e rẹ rọ olẹ ro mu okpẹdẹ na họ. Ile ichọche nọ a rẹ so evaọ ohiohiẹ nọ emọ-isukulu na kpobi a te kokohọ yọ abọjọ iruemu isukulu. Makọ evaọ eklase dede, a re wuhrẹ emọ na iwuhrẹ egagọ erue gbe ile egagọ erue. Enọ i wuzou isukulu e rẹ vuẹ emọ na inọ oware kpobi nọ u kpomahọ egagọ nọ a be jọ isukulu na ru o rrọ ọgbahọ kẹ ọmọ kpobi, yọ ọmọ nọ ọ se nọ o re w’obọ họ a re lei no isukulu na evaọ etoke jọ hayo si ei no riẹriẹriẹ.
3. Eme ọ rẹ jọ esẹgbini oja?
3 O rrọ esẹgbini Ileleikristi oja re a thọ emọ rai rono obọ nọ a re wo evaọ iruẹru egagọ erue. Fikiere, a rẹ kẹ emọ rai ekpọvio nọ i no Ikereakere na ze re i fi obọ họ kẹ ae kẹnoma kẹ Babilọn Ologbo na, re a siọ obọ ba e wo evaọ “umuemu riẹ,” jẹ siọ ‘obọ ba ero te oware ugbegbe.’ (Evia. 18:4; 2 Kọr. 6:14-18) Ma yere owhai kpobi nọ i bi fi obọ họ kẹ emọ rai re a dikihẹ ga ziezi evaọ abọ-ẹzi. Eme ọfa esẹgbini a rẹ sai ru rọ thọ emọ rai no obọ “ọwegrẹ” nọ ọ be gwọlọ mu emaha nọ i ri wo ẹzẹ hẹ na lọ na?—1 Pita 5:7, 8.
4. Okevẹ u fo nọ esẹgbini a re ro lele iticha nọ i bi wuhrẹ emọ rai t’ẹme?
4 U wuzou gaga re esẹgbini a rọ ibroshọ Jehovah’s Witnesses and Education na ro lele enọ i wuzou isukulu gbe iticha nọ i bi wuhrẹ emọ na jiroro kpahe ẹme nana nọ ẹbẹbẹ ọ re romavia ha na. Nọ a te lele ahwo nana t’ẹme no, u re woma re ọsẹgboni na a kere ileta nọ a re jo dhesẹ edikihẹ rai vevẹ, avọ adhẹẹ.
5. Oghale vẹ u re no uvi omodawọ esẹgbini nọ a rẹ rọ thọ emọ rai ze?
5 Ma re rẹro inọ emọ mai e te gbẹ rẹriẹ ovao dhe edawọ buobu kpahe ẹrọwọ rai nọ akpọ na ọ be gwọlọ mu ai lọ na. (Rom 12:2) Ma fi eva họ inọ whai esẹgbini wha ti dhesẹ areghẹ jẹ j’owọ re wha thọ emọ rai nọ i ri wo ereghẹ tere he na, re a siọ enwoma abọ-ẹzi ba ekiero. (Itẹ 22:3) Jọ u mu owhai ẹro inọ Jihova ọ te ghale omodawọ rai nọ wha bi ro fi obọ họ kẹ ai re a daji edhere ọkeke nọ o bi su kpohọ uzuazọ na.—Mat. 7:13, 14.