Eme Me re Ru nọ Oware Ovo O Gbẹ be Ruọ Ọmọ Mẹ Oma Ru Hu?

Ma rehọ iẹe nọ ọmọ ra o mu unu họ uwou. Ọ tẹ ta kẹ owhẹ nọ “Oware ovo o be ruọ omẹ oma ru hu.” Ukpenọ whọ rẹ nwane ta kẹe nọ jọ ọ nyae zaro, hayo inọ ọ nyai rri ifimu, muẹrohọ eware jọ nọ u fo nọ whọ rẹ kaki roro kpahe.

Eware jọ nọ esẹgbini a muẹrohọ no kpahe emọ nọ oware ovo o be gbabọ ru hu

• Eware nọ a be hai ru evaọ oke gheghe gbe oke nọ a be raha fihọ ae o sae whae ze. Ọzae jọ nọ a re se Robert ọ ta nọ: “Ifimu gbe igemu nọ a rẹ fa o rẹ were emọ jọ gaga. Fikiere oware ofa o rẹ gbẹ gwọlọ were ae eru hu.”

  Aye riẹ Barbara ọ rọwo fihọ ẹme nọ ọzae riẹ ọ ta na. Ọ ta nọ: “Evaọ akpọ nana nọ ma rrọ na, ohwo ọ tẹ gwọlọ ru emamọ oware, ọ rẹ kaki roro kpahe iẹe, ọ vẹ be daoma ru oware na. Yọ ẹmẹrera ọ rẹ rọ ruẹ erere oware na. Rekọ emọ nọ i re rri ifimu jẹ fa igemu gaga a re rri nọ eyena kpobi yọ oke oraha.”

• Nọ emọ a te bi rri eware nọ emaha ibe rai a fihọ itanẹte, o sae lẹliẹ ai roro nọ a te ehwa rai hi. Nọ ọmọ ọ tẹ be hai rri eware nọ ibe riẹ a fihọ itanẹte, ọ sai roro nọ a be reakpọ se iẹe ba. Ọmọtẹ jọ nọ a re se Beth ọ ta nọ: “O lọhọ wumuo ho re ohwo o roro nọ, ‘Ahwo kpobi a be reakpọ kuoma yọ me mu unu họ uwou.’”

  U te no ere no, ohwo ọ tẹ be kiẹ eware nọ ahwo a fihọ itanẹte okikpo, ọ te ruẹ emamọ oware ovo nọ o te kẹe evawere he. Ọmọzae jọ nọ a re se Chris ọ ta nọ: “Ginọ uzẹme inọ whọ tẹ be kiẹ itanẹte, o te gbẹ wọhọ nọ who mu unu họ uwou ho. Rekọ ukuhọ riẹ, whọ te ruẹ erere ọvo nọ o kẹ owhẹ hẹ.”

• Nọ oware ovo o gbẹ be ruọ ọmọ ra oma ru hu, ọ sae rọ uvẹ yena roro ku emamọ oware jọ. Aye jọ nọ a re se Katherine ọ ta nọ, oware ovo o gbẹ be ruọ ọmọ ra oma ru hu, ọ sae rọ uvẹ yena roro ku emamọ oware jọ nọ o re ru. Wọhọ oriruo, ọ ta nọ: “Ọmọ na ọ sae rọ ekatọno hayo oware ofa jọ ru ẹkpẹti nọ a re fi eware họ, ku omoto, okọ hayo arupre nọ a re ro kpohọ obonọ isi e rrọ. Yọ ọ sae rọ emehọ hwa egbara rọ bọ uwou.”

  Oyejabọ nọ ọzae jọ nọ a re se Sherry Turkle nọ o wuhrẹ kpahe iroro gbe uruemu ohwo-akpọ ọ rọ ta nọ, nọ oware ovo o gbẹ be ruọ ohwo oma ru hu, “o rẹ lẹliẹe rọ uvẹ yena roro ku emamọ oware jọ nọ o re ru.”a Fikiere nọ oware ovo o gbẹ be ruọ ohwo oma ru hu, o nwani yoma ha. Obe na Disconnected o ta nọ “nọ oware ovo o gbẹ be ruọ ohwo oma ru hu, o rẹ lẹliẹe hai roro ku emamọ eware nọ o re ru wọhọ epanọ iriẹ oma ohwo e rẹ ga ziezi nọ ọ tẹ be wọ eware egbẹgbẹdẹ na.”

Ẹme na họ: Nọ oware ovo o gbẹ be ruọ ọmọ oma ru hu, ma du rri rie wọhọ ekpehre oware he. Rekọ joma rọ uvẹ yena fiobọhọ kẹe re ọ hai roro ku obọdẹ eware nọ o re ru.

Oware nọ whọ rẹ sai ru nọ oware ovo o gbẹ be ruọ ọmọ ra oma ru hu

• O tẹ lọhọ, hae kẹ emọ ra uvẹ re a jọ obọ otafe zaro. Barbara nọ ma fodẹ ẹsiẹ na ọ ta nọ: “Nọ ọmọ ọ tẹ rrọ otafe zaro, umuvo nọ ọ rẹ jọ otafe mu ohwo gbe omofou nọ o re fou na o rẹ sae lẹliẹ oma sasa ọmọ. Nọ emọ na a tẹ rrọ otafe zaro, a ve bi roro ku eware sa-sa nọ a re ru. Oware riẹ u gbunu kẹhẹ!”

  Ohrẹ Ebaibol: “Oware kpobi u wo oke riẹ, . . . oke nọ a rẹ rọ hwẹ . . . gbe oke nọ a [rẹ rọ] la kẹlu kẹlu.”—Ọtausiuwoma Na 3:1, 4, ẹme-obotọ.

  Roro kpahe enọ nana: Eme me re ru re emọ mẹ a hae jọ otafe zaro ziezi? Kọ otẹrọnọ mẹ sae kẹ emọ mẹ uvẹ re a jọ otafe zaro ho fiki oghẹrẹ oria nọ mẹ be rria, oghẹrẹ eroza vẹ a rẹ sae jọ evaọ uwou zaha?

• Wuhrẹ ọmọ ra re ọ hai fiobọhọ kẹ amọfa. Aye jọ nọ a re se Lillian ọ fodẹ eware jọ nọ who re wuhrẹ emọ ra nọ a rẹ sai ru ro fiobọhọ kẹ amọfa. Ọ ta nọ: “Emọ na a sai fiobọhọ gbẹ ẹbe ighẹ ahwo nọ a kpako no, hwere ighẹ rai hayo there ememu ro se ai. A vẹ jẹ hae wẹriẹ nyai yere ai.”

  Ohrẹ Ebaibol: “Ohwo nọ o re ru ọghọ, eware i ti woma kẹe, yọ ohwo kpobi nọ ọ rẹ sasa amọfa oma, a te sasa iẹe oma re.”—Itẹ 11:25.

  Roro kpahe onọ nana: Ẹvẹ whọ sai ro wuhrẹ emọ ra re a hae rọ iroro obọrai fiobọhọ kẹ amọfa?

• Fi emamọ oriruo hotọ kẹ emọ ra. Whọ tẹ be hai bruenu ẹsikpobi nọ who te no iruo ze, o sae lẹliẹ emọ ra rri eware thọ. Aye jọ nọ a re se Sarah ọ ta nọ: “Otẹrọnọ iku epanọ akpọ ọ ga te ọvo ma re gbe nọ ma te no iruo te uwou, o rẹ lẹliẹ emọ mai roro nọ, u te no aroza no, oware ovo o riẹ hẹ nọ o rẹ lẹliẹ eva were ohwo. Rekọ nọ ma te bi gbiku epanọ eware e rọ riẹ nya evaọ okpẹdoke na, o rẹ lẹliẹ emọ na rọ emamọ ubiẹro rri iruo.”

  Ohrẹ Ebaibol: “Ohwo nọ eva e be were o wo ehaa ẹsikpobi.”—Itẹ 15:15.

  Roro kpahe enọ nana: Oghẹrẹ iku vẹ mẹ be hae jọ iraro emọ mẹ gbe kpahe iruo mẹ? Eme emọ mẹ a muẹrohọ nọ mẹ be hai ru nọ oware ovo o gbẹ be ruọ omẹ oma ru hu?

Oware jọ nọ u re fiobọhọ: Vuẹ emọ ra re a roro ku obọdẹ eware jọ nọ wha rẹ sai ru. Aye jọ nọ a re se Allison ọ ta nọ: “Evaọ uwou mai, nọ ohwo jọ o te roro ku eware jọ nọ ma rẹ sai ru, o re kere ai fihọ obe, o ve fi ei họ ẹmẹkpẹti jọ nọ ma ru fihọ.”