-
Uvi Okugbe Ileleikristi—Ẹvẹ O rọ Lọhọ?Odibọgba Uvie—2003 | Akpegbivẹ
-
-
Uvi Okugbe Ileleikristi—Ẹvẹ O rọ Lọhọ?
1 Eme ọ rẹ sai ku ahwo nọ a bu vi ima ezeza nọ i no ekwotọ 234 gbe evẹrẹ sa-sa nọ i bu te oware wọhọ 380 kugbe? Egagọ Jihova Ọghẹnẹ ọvo. (Mae. 2:12; 4:1-3) Isẹri Jihova a riẹ no oware nọ a be rọ ẹro ruẹ ze inọ uvi okugbe Ileleikristi u muẹro nẹnẹ. Wọhọ ‘uthuru ovo’ nọ o rrọ otọ “othuru igodẹ ọvo,” ma gba riẹ mu nnọ ma rẹ whaha ẹzi omohẹriẹ akpọ nana.—Jọn 10:16; Ẹf. 2:2.
2 Ẹjiroro Ọghẹnẹ nọ ọ rẹ seba erugba ha họ re emama iwareghẹ kpobi i ku oma gbe evaọ egagọ uzẹme. (Evia. 5:13) Fikinọ ọ riẹ epanọ onana u wuzou te, Jesu ọ lẹ gaga kpahe okugbe ilele riẹ. (Jọn 17:20, 21) Ẹvẹ mai omomọvo ma sae rọ zọhọ fihọ okugbe ukoko Ileleikristi na?
3 Epanọ A Re ro Wo Okugbe: Ababọ Ẹme Ọghẹnẹ gbe ẹzi riẹ, a sai wo okugbe Ileleikristi t’obọ họ. Efihiruo oware nọ ma se evaọ Ebaibol na o rẹ lẹliẹ ẹzi Ọghẹnẹ ruiruo ziezi evaọ uzuazọ mai. Onana u re fi obọ họ kẹ omai ‘yọrọ okugbe Ẹzi na eva udhedhẹ.’ (Ẹf. 4:3) O rẹ wọ omai thihakọ kẹ ohwohwo evaọ uyoyou. (Kọl. 3:13, 14; 1 Pita 4:8) Kọ whọ be wha okugbe haro ẹkwoma eroro kpahe Ẹme Ọghẹnẹ kẹdẹ kẹdẹ?
4 Iruo nọ a kẹ omai re ma ta usiuwoma je ru ilele na i bi ku omai kugbe re. Nọ ma te bi lele amọfa ruiruo evaọ odibọgba Ileleikristi na, “kuomagbe họre kẹ orọwọ usiuwoma na,” ma rẹ jọ ‘ibe iruiruo eva uzẹme na.’ (Fil. 1:27; 3 Jọn 8) Nọ ma bi ru ere na, yọ ma be bọ ọgbakugbe uyoyou nọ ọ rrọ ukoko na ga. Kọ whọ gbẹ daoma zizie ohwo jọ nọ who ri lele ruiruo kẹle he re wha gbẹ nya usu evaọ usiuwoma ota oka nana?
5 Ẹvẹ o rrọ uvẹ-ọghọ kẹ omai te nọ ma rọ rrọ abọjọ uvi okugbe-inievo akpọ-soso ọvuọvo nọ o rrọ otọakpọ nẹnẹ! (1 Pita 5:9) Kẹle na, ahwo buobu a rọ ẹro obọrai ruẹ okugbe akpọ-soso nana eva Ikokohọ Akpọ-Soso ọrọ “Rehọ Oruaro kẹ Ọghẹnẹ” na. Jọ mai omomọvo ma zọhọ fihọ okugbe ọghaghae nana ẹkwoma ese Ẹme Ọghẹnẹ kẹdẹ kẹdẹ, ẹkwoma ẹwhọ nọ ma re kuhọ evaọ edhere uyoyou, gbe ẹkwoma “uru ovo” nọ ma re ro whowho emamọ usi na.—Rom 15:6.
-
-
Ẹgwọlọ Via Enọ I TeOdibọgba Uvie—2003 | Akpegbivẹ
-
-
Ẹgwọlọ Via Enọ I Te
1 Ithubro Jesu kpahe epanọ a re ro ru iruo usiuwoma ota na e kẹ omai use-abọ jọ. Ọ ta nọ: “Kẹwho kẹwho hayo kiwhre kiwhre nọ wha rẹ te rua, wha guọlọ ohwo eva riẹ nọ o te i.” (Mat. 10:11) Nẹnẹ nọ ahwo a gbẹ be jọ uwou tere he na, ẹvẹ ma sae rọ gwọlọ enọ i te via?
2 Kiẹ Ẹkuotọ Ra Riwi: Muhọ ẹkwoma ẹkwotọ ra nọ whọ rẹ kiẹ riwi. Oke vẹ ahwo a rẹ mae rọ jọ uwou? Diẹse a sae jọ rue rai evaọ okpẹdẹ na? Kọ u wo ẹdẹ jọ evaọ oka na hayo ugogo oke jọ evaọ okpẹdẹ na nọ o wọhọ nọ a rẹ mae rọ kezọ nọ a te weze bru ae? Oke odibọgba ra nọ who re nwene kiehọ oke gbe iyero ahwo ẹkuotọ na o rẹ sai fi obọ họ kẹ owhẹ wo emamọ iyẹrẹ t’obọ.—1 Kọr. 9:23, 26.
3 Iwhowho-uvie buobu a ruẹ obokparọ no evaọ etoke akọ owọwọ. Oke yena ahwo jọ a mai ro dhoma mu jẹ mae kezọ. Usiuwoma nọ a rẹ ta evaọ ẹkwotọ eki-ọthuọ gbe eria nọ ahwo a rẹ jọ ẹsikpobi yọ idhere jọ nọ a rẹ rọ wha emamọ usi na te ahwo oma.
4 Evaọ etoke amara iruẹru obọdẹ jọ, ukoko jọ u ru ọruẹrẹfihotọ usiuwoma ota oke uvo fihọ Ẹdẹ-Ọmaha gbe Ẹdẹ-Oka gbe usiuwoma ota owọwọ fihọ Edesa-Oka gbe Edisoi-Oka. A ru ọruẹrẹfihotọ isẹri-ise ifonu je ru ọruẹrẹfihotọ nọ a rẹ rọ ta usiuwoma evaọ ẹkuotọ eki-ọthuọ. Eruẹrẹfihotọ nana e wha ajọwha fihọ odibọgba na te epanọ ukoko na o rọ jiroro nọ a rẹ ruabọhọ ae.
5 Wo Osegboja Evaọ Eruo Izihebro: Otẹrọnọ o rẹ bẹbẹ evaọ ẹkwotọ rai re a di ahwo họ uwou evaọ okenọ who te zihe, whẹ avọ ohwo nọ o wo uwou na wha daoma fi oke họ nọ who re ro zihe evaọ ekuhọ iweze kpobi, te evaọ iweze ọsosuọ na. Kẹsena, who ve muẹrohọ nọ whọ nya lele ọtamuo na. (Mat. 5:37) U te fo, whọ sae ta kẹ ọnọ o wo uwou na re ọ k’owhẹ inọmba ifonu riẹ otẹrọnọ o wo ifonu. Onana o sai je fi obọ họ kẹ owhẹ nọ whọ rẹ rọ wariẹ lele ohwo nọ o wo uwou na t’ẹme.
6 Uvi omodawọ nọ ma rẹ rọ gwọlọ enọ i te via, jẹ nya lele isiuru nọ ma ruẹ o te ghinẹ wha eghale Jihova ze.—Itẹ 21:5.
-