Onọ O Mai Woma nọ Ma rẹ Kẹ Jihova

¹ Uzi Jihova kẹ emọ Izrẹl o ta inọ erao nọ a re ro dheidhe kẹe e rẹ jọ enọ e “kare epe.” Arao nọ ọ rrọ oma kọkọ họ a rẹ rehọ iẹe he. (Izerẹ 22:18-20; Mal. 1:6-9) Ofa riẹ re, nọ a te dhe idhe, iwhri na kpobi—abọ nọ ọ mai woma evaọ arao na—e rrọ rọkẹ Jihova. (Izerẹ 3:14-16) Wọhọ Ọsẹ Izrẹl gbe Olori Ologbo rai, Jihova o fo ọnọ a rẹ rehọ onọ o mai woma kẹ.

² Wọhọ epanọ o jọ evaọ oke anwae, oghẹrẹ idhe mai nẹnẹ e rrọ Ọghẹnẹ oja gaga. Egagọ mai i re dhesẹ uvi adhẹwẹ rọkẹ Jihova. Uzẹme, iyero mai omomọvo i wo ohẹriẹ. Ghele na, ma wo uvi ẹjiroro nọ ma rẹ rọ kiẹ oma mai riwi sọ ma be kẹe onọ o mai woma kpobi.—Ẹf. 5:10.

³ Egagọ Ẹwẹ-Kpobi: Re odibọgba mai ọ ruẹse wha orro se Jihova je duobọte udu enọ e be kezọ kẹ omai, o rẹ jọ orọ okafe gheghe he. Eme nọ ma rẹ ta kpahe Ọghẹnẹ mai gbe ẹjiroro ogbunu riẹ i re no udu nọ o vọ avọ ovuhumuo ze. (Ol. 145:7) Onana u dhesẹ epanọ ẹnya lele emamọ omaa isase Ebaibol gbe uwuhrẹ omobọ-ohwo e roja te.—Itẹ 15:28.

⁴ Onọ o mai woma nọ ma rẹ kẹ Jihova o tẹ jẹ kẹre te aro nọ ma re ro kele uyoyou riẹ kẹ ahwo. (Ẹf. 5:1, 2) Uyoyou nọ ma wo kẹ ahwo o rẹ wọ omai rọ ovuẹ uzẹme nọ u re siwi uzuazọ na bru ahwo buobu te epanọ o rẹ sae lọhọ te kpobi. (Mak 6:34) O rẹ wọ omai dhesẹ isiuru omobọ-ohwo kẹ ahwo nọ ma be ta ẹme kẹ. O rẹ lẹliẹ omai hai roro kpahe ae nọ iweze ọsosuọ na e tẹ vrẹ no, jẹ lẹliẹ omai zihe vẹrẹ vẹrẹ. O rẹ wọ omai dao utho ẹgba mai kpobi re ma fi obọ họ kẹ ai nyaharo evaọ abọ-ẹzi.—Iruẹru 20:24; 26:28, 29.

⁵ ‘Idhe Ujiro’: Edhere ọfa nọ ma rẹ rọ kẹ Jihova onọ o mai woma họ ẹkwoma osegboja mai evaọ odibọgba na. Nọ ma tẹ ruẹrẹ omaa mai họ ziezi jẹ tẹro vi odibọgba na, ma rẹ sai wo iyẹrẹ iwoma tobọ rono oke usiuwoma ota mai ze. (1 Tim. 4:10) Emamọ omaruẹrẹhọ o rẹ lẹliẹ omai ta ẹme vevẹ avọ imuẹro, nọ o rẹ lẹliẹ ahwo kezọ kẹ omai ziezi. (Itẹ 16:21) Nọ ma be wha emamọ usi na se amọfa na, a rẹ sai ghine se emamọ eme nọ i bi no omai udu ze ‘idhe ujiro.’—Hib. 13:15.

Izoge—Wha Se Ẹme Ọghẹnẹ!

¹ Uzoge yọ oke ebẹbẹ gbe iroro egbẹgbẹdẹ. Whai izoge Ileleikristi buobu wha be rẹriẹ ova ku itunyẹ ikẹdẹ kẹdẹ nọ e gwọlọ nọ wha raha ute ẹfuọ Ọghẹnẹ. Taure who te ti mu iroro-ejẹ obọ ra họ kpahe isukulu, iruo, gbe orọo, kaki fi itee abọ-ẹzi họ kẹ oma ra tao. Ẹkwoma ere oruo ọvo whọ sae rọ jẹ iroro efa nọ e te kpọ abọ uzuazọ ra nọ u kiọkọ ri abọ owoma. Ugogo itee abọ-ẹzi nọ who re wo i ti fi obọ họ kẹ owhẹ jẹ owọ areghẹ jẹ lẹliẹ edhere ra jọ wowoma. Ẹkwoma Ẹme Ọghẹnẹ nọ who re se je roro kpahe ẹsikpobi, oma o te wọ owhẹ re whọ rria lele uthubro riẹ nọ a rọ ẹgba ẹzi kere na, yọ who ti wo obokparọ evaọ uvi omodawọ ra.—Jos. 1:8; Ol. 1:2, 3.

² Ẹvẹ U Ti ro Fiobọhọ kẹ Owhẹ?: Akpọ Setan ọ vọ avọ isiuru nọ e rẹ lẹliẹ ohwo ru umuomu. (1 Jọn 2:15, 16) Ẹsejọhọ whọ riẹ ibe emọ eklase ra hayo ehwa ra efa nọ e rẹriẹ ova ku okpẹtu no fikinọ a kie kẹ otunyẹ ọhwa. Ithubro Ebaibol nọ whọ rẹ nya lele o te k’owhẹ ẹgba iroro gbe ọrọ abọ-ẹzi nọ whọ rẹ rọ siọ edhere uzioraha. Ofariẹ, ithubro Ẹme Ọghẹnẹ e rẹ sai fi obọ họ kẹ owhẹ whaha egbefẹ ẹghẹ Setan. (2 Kọr. 2:11; Hib. 5:14) Idhere Ọghẹnẹ nọ whọ rẹ nya lele e te kẹ owhẹ uvi evawere—evevọwẹ evaọ edhere uzuazọ ra.—Ol. 119:1, 9, 11.

³ Ehri-izi Ọghẹnẹ nọ i re nwene he i kpehru vi eriariẹ ohwo-akpọ. (Ol. 119:98-100) Eriariẹ ehri-izi Ebaibol nọ ma re wo gbe eroro kpahe ẹjiroro Jihova nọ o rovie via avọ elẹ nọ i re no udu ze o rẹ sai fi obọ họ k’owhẹ bọ usu okpekpe kugbe Ọnoweme Ebaibol nọ ọ mai wo areghẹ na, Jihova Ọghẹnẹ. Ọ ya eyaa nọ: “Me re ti wuhrẹ owhẹ dhesẹ kẹ owhẹ edhere nọ whọ rẹ te nya; ẹro mẹ me re ti ro su owhẹ.”—Ol. 32:8.

⁴ Fi Oke họ nọ Who re Ro Sei: Uzoge Oleleikristi jọ o ru rie fihọ ute riẹ re o se Ebaibol na re, yọ o se rie re evaọ ukpe ovo. Erere vẹ o wo? Ọ kareghẹhọ nọ: “Me wuhrẹ eware buobu kpahe Jihova—eware nọ i si omẹ kẹle iẹe viere je ru omẹ wo ozodhẹ kẹe evaọ edẹ uzuazọ mẹ nọ i kiọkọ.” (Jem. 4:8) Kọ who se Ebaibol na reno? Otẹrọnọ who ri sei re he, kọ who gbe ru ei fihọ ute ra re who ru ere? Jihova ọ te ghinẹ ghale omodawọ ra, yọ who ti wo irere ilogbo.