Ẹtanigbo na Ọ Kpare Ẹrẹreokie Ọghẹnẹ Kpehru

NỌ Adamu avọ Ivi a kpareso no, Jihova ọ tẹ yeyaa inọ ọ te rehọ Ubi jọ lahwe nọ a te rowo ithihrawọ. (Emuhọ 3:15) Onana u rugba nọ ewegrẹ Ọghẹnẹ a gbẹgwae nọ a ro kpe Jesu Kristi evaọ ure oja. (Ahwo Galesha 3:13, 16) Jesu ọ kare uzioraha, keme ẹkwoma ẹzi ọfuafo ọmọtẹ nọ ọ riẹ ọzae he ọ rọ rehọ edhere igbunu dieva riẹ họ. Fikiere, a rẹ sae rehọ azẹ riẹ nọ o hwẹ ta ahwo-akpọ nọ e reuku uzioraha gbe uwhu mi Adamu no igbo.—Ahwo Rom 5:12, 19.

Uvumọ oware o rẹ sae whaha Jihova, Ọghẹnẹ erumeru na, nọ o gbe ro ru ẹjiroro riẹ gba ha ha. Fikiere, nọ ohwo o kie ruọ uzioraha no, evaọ eriwo Jihova, o wọhọ ẹsenọ a tubẹ hwa ẹtanigbo na no keme ọ riẹ nọ oware ovo o te whaha ẹwha riẹ hẹ, yọ ọ rẹ sai wo usu kugbe enọ i fi ẹrọwọ họ erugba eyaa riẹ. Onana o wha riẹ ze nọ emọ Adamu nọ e gba ha, wọhọ Enọk, Noa, gbe Abraham a sai ro lele Ọghẹnẹ nya, Ọghẹnẹ o te je mu usu kugbe ai ababọ epe nọ onana o whẹhọ ẹfuọ riẹ.—Emuhọ 5:24; 6:9; Jemis 2:23.

Ahwo jọ nọ i fi ẹrọwọ họ Jihova a raha izi ilogbo. Oriruo jọ họ Devidi Ovie na. Whọ rẹ sae nọ inọ: ‘Fikieme Jihova ọ gbẹ jẹ rọ ghale Devidi Ovie na yọ Devidi o lele Batshẹba bruẹnwae jẹ wha uwhu se Uraya ọzae riẹ no?’ Oware jọ nọ o soriẹ ze họ uvi ekurẹriẹ Devidi gbe ẹrọwọ riẹ. (2 Samuẹle 11:1-17; 12:1-14) Fiki idhe Jesu Kristi nọ e jọ obaro be tha, Ọghẹnẹ ọ sae rọ vrẹ Devidi nọ o kurẹriẹ na, ababọ egbeku uvi-ẹdhoguo gbe ẹrẹreokie Riẹ. (Olezi 32:1, 2) Re u gine muẹro nọ ere o rrọ, Ebaibol na i dhesẹ oware nọ o mai gbunu nọ ẹtanigbo Jesu o ru via, koyehọ “re u dhesẹ ẹrẹreokie Ọghẹnẹ, keme eva akothiho riẹ Ọghẹnẹ ọ jẹ kpare iroro vrẹ izieraha ọsosuọ” gbe erọ “oke nana.”—Ahwo Rom 3:25, 26.

Ẹhẹ, eghale buobu i te ahwo-akpọ obọ fiki azẹ Jesu. Fiki ẹtanigbo na, ahwo-akpọ erahaizi nọ i kurẹriẹ no a rẹ sai ro wo usu okpekpe kugbe Ọghẹnẹ. Fibae, ẹtanigbo na o rovie edhere fihọ kẹ ẹkparomatha enọ i whu ziọ akpọ ọkpokpọ Ọghẹnẹ. Oyena u ti kugbe idibo ẹrọwọ Ọghẹnẹ enọ i whu taure Jesu ọ tẹ te hwosa ẹtanigbo na gbe makọ ibuobu nọ i whu evaọ ogbori nọ e gọ Ọghẹnẹ hẹ. Ebaibol e ta nọ: “Ẹkparomatha enọ ikiete avọ enọ ikiete he e rẹ te jarọ.” (Iruẹru 24:15) Eva oke yena, fiki ẹtanigbo na, Jihova ọ te kẹ ahwo-akpọ ẹmeoyo kpobi uzuazọ ebẹdẹ bẹdẹ. (Jọn 3:36) Jesu ọ ta nọ: ‘Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.’ (Jọn 3:16) Irere nana kpobi i ti te ahwo-akpọ obọ fiki ọruẹrẹfihotọ Ọghẹnẹ ọrọ idhe ẹtanigbo na.

Rekọ oware nọ o mae jọ ẹtanigbo na rro họ, orọnikọ irere nọ i bi ti te omai obọ họ. Oware nọ o mai wuzou họ oware nọ ẹtanigbo Kristi u ru kẹ odẹ Jihova. U dhesẹ nnọ Jihova yọ Ọghẹnẹ uvi ẹdhoguo ọnọ ọ rẹ sai yeri kugbe ahwo-akpọ uzioraha, yọ ghele na ọ gbẹ rrọ ọrẹri. Ọghẹnẹ ọ gbẹ hai ru ọruẹrẹfihotọ ẹtanigbo na ha, uvumọ ọmọ Adamu, makọ Enọk, Noa, gbe Abraham, ọ hae sai lele Jihova nya hayo jọ ogbẹnyusu riẹ hẹ. Ọso-ilezi na o vuhu onana mu o te kere nọ: “O ỌNOWO, otẹrọnọ, who roro imuemu mai, ỌNOWO kọ ono ọ rẹ sai dikihẹ?” (Olezi 130:3) Ma rẹ kẹ Jihova uyere gaga nọ o ro vi Ọmọ oyoyou riẹ ziọ otọakpọ, ma re je yere Jesu nọ ọ rọ rehọ unevaze fi uzuazọ riẹ h’otọ wọhọ ẹtanigbo kẹ omai!—Mak 10:45.

Uruemu Ezi O Wha Emamọ Iyẹrẹ Ze

EVAỌ ukoliko-ame osese jọ nọ o rrọ ofẹ obọze ovatha-ọre Japan, Isẹri Jihova a muọ Ebaibol họ ewuhrẹ kugbe oni jọ avọ emọ esa riẹ. Nọ a ruẹ onana, ahwo ẹwho na nọ o rovie aro tere he na a te je gbolo ovao kẹ oni na evaọ oke kpobi nọ a tẹ rue riẹ. Aye na ọ ta nọ: “Oware nọ o tubẹ kẹ omẹ uye vi ovao nọ a je gbolo kẹ omẹ họ ovao nọ a je muhọ kẹ ọzae mẹ gbe emọ mẹ.” Ghele na, ọ ta kẹ emọ riẹ nọ: “Fiki Jihova, ma rẹ gbẹ hai yeri ahwo ẹwho mai na.”—Matiu 5:47, 48.

Ọ jọ obọ uwou wuhrẹ emọ riẹ inọ a hae sasa ovao kẹ ahwo dede nọ a bi mu ovao họ kẹ ae. Nọ a te bi kpohọ uwou ulogbo nọ a rẹ jọ zaharo evaọ ẹwho na, emọ na a rẹ jọ evaọ omoto wuhrẹ epanọ a ti ro yere ahwo na. Nọ a tẹ ruọ uwou na, emọ na a vẹ rọ ẹvẹrẹ rai yere ahwo na sasasa inọ, “Konnichiwa!”—“Ma yere owhai kpobi.” Avọ odiri, uviuwou na a tẹ jẹ hai yere ahwo nọ a nyaku kpobi, dede nọ ahwo ẹwho na a gbe bi gbolo ovao kẹ ae. Ghele na, ahwo na a je muẹrohọ uruemu ezi ọrọ emọ na.

Uwhremu na, omomọvo, a te ti muọ uyere emọ na ẹza zihe ẹmẹrera. Nọ ikpe ivẹ e vrẹ no, enwenọ ahwo ẹwho na kpobi a te ti muọ uviuwou na họ eyere. A te tube muọ ohwohwo họ eyere vi epaọ ọsosuọ, a gbe je gbolo ovao kẹ uviuwou na ha. Ethabọ osu-ẹwho na ọ tẹ gwọlọ nọ o re ru emọ na ọghọ fiki enwene nana nọ a wha ziọ ẹwho na. Rekọ oni rai ọ tẹ ta kẹe inọ oware nọ u fo nọ Ileleikristi a re ru ọvo a bi ru na. Uwhremu na, nọ a se emọ nọ e rrọ ukoliko-ame na kpobi abọ re a ruẹse riẹ ọnọ ọ rẹ mae riẹ ẹme ta ziezi, ọmọzae aye na jọ o te gbiku epanọ oni riẹ o ro wuhrẹ uviuwou na kpobi re a yere amọfa sasasa o tẹ make rọnọ amọfa a bi gbolo ovao kẹ ae. Ọye ọ rehọ oria ọsosuọ, a te je kere eme riẹ fihọ obe-usi ẹwho na. Nẹnẹ, eva e be were uviuwou na gaga inọ elele ehri-izi Ebaibol o wha emamọ iyẹrẹ ze. O rẹ lọhọ ziezi re a ta usiuwoma kẹ amọfa evaọ okenọ ahwo a tẹ rrọ sasasa.