Kuv Fienx Se Gorngv Taux Haaix Nyungc?

1. Tin-Hungh nyei fienx se gorngv taux haaix nyungc?

Tin-Hungh oix mienh maanh duqv njien-yiouh kuv-yiem nyei maengc yiem baamh gen. Ninh zeix cuotv baamh gen caux nyungc-nyungc yiem baamh gen nyei ga’naaiv weic zuqc ninh hnamv baamh mienh. Maiv lauh ninh oix zoux bun baamh mienh yiem norm-norm dorngx duqv gauh longx ih zanc, liuz maiv bun maaih haaix nyungc daaih zoux bun ninh mbuo zuqc kouv.​—Doqc Yeˆleˆmi 29:11.

Maiv maaih jiex haaix norm hungh jaa haih zorqv guangc nzengc mienh zoux ciouv zoux waaic nyei jauv, baengc nyei jauv, fai daic nyei jauv. Mv baac se maaih kuv fienx bun mbuo nyei. Maiv lauh Tin-Hungh maiv bun maaih baamh mienh nyei hungh jaa aqv, liuz bun maaih ninh ganh nyei hungh jaa hnangv. Ninh nyei baeqc fingx ziouc njien-yiouh baengh orn, wangc siangx nyei yiem.​—Doqc Iˆsaaˆyaa 25:8; 33:24; Ndaaˆniˆen 2:44.

2. Weic haaix diuc naaiv kuv fienx se jienv haic?

Zuov taux Tin-Hungh fioux liuz baamh gen, zorqv guangc zoux waaic sic nyei mienh mingh, baamh gen cingx daaih maiv maaih kouv naanc nyei jauv. (Seˆfanˆyaa 2:3) Haaix zanc cingx daaih benx hnangv naaic? Tin-Hungh nyei Waac jaa-ndaangc gorngv ziangx maaih sic hnangv ih zanc mbuo buatc nor, cuotv daaih hoic mienh maanh. Ih zanc cuotv daaih nyei camv-nyungc waaic sic se bun cing Tin-Hungh nyei ziangh hoc dongh ninh oix fioux baamh gen wuov se taux fatv aqv.​—Doqc 2 Tiˆmoˆtai 3:1-5.

3. Mbuo oix zuqc zoux haaix nyungc?

Mbuo oix zuqc hoqc Ging-Sou, hoqc taux Tin-Hungh nyei jauv. Ging-Sou se hnangv zeiv fienx yiem dauh hnamv haic dorn-jueiv nyei die bun taux mbuo. Ging-Sou mbuox mbuo hnangv haaix nor haih duqv njien-yiouh nyei yiem ih zanc caux hnangv haaix nor haih yietc liuz njien-yiouh nyei yiem yiem naaiv baamh gen nqa’haav hingv. Zien nyei, maaih deix mienh maiv oix meih duqv mienh tengx meih bieqc hnyiouv Ging-Sou. Mv baac maiv dungx piatv dongh meih haih duqv longx haic nyei maengc yiem nqa’haav hingv wuov.​—Doqc Cong-Mengh Waac 29:25; Laauc Yaangh 14:6, 7.