Wuov Kuv Fienx Se Gengh Zien Yiem Tin-Hungh Daaih Fai?

1. Haaix dauh fiev Ging-Sou daaih?

Kuv fienx gorngv taux mienh haih duqv yiem baamh gen yietc liuz se fiev jienv yiem Ging-Sou nyei. (Singx Nzung 37:29) Ging-Sou se 66 buonv sou-dorn gapv daaih. Tin-Hungh longc 40 dauh hnyiouv zingx nyei m’jangc dorn fiev naaiv deix sou-dorn. Ndaangc wuov deix biaa buonv sou-dorn se Mose fiev daaih, aav lamh duqv 3,500 hnyangx aqv. Nqa’haav wuov buonv se Yoˆhan wuov dauh gong-zoh fiev daaih, jiex ndaangc 1,900 hnyangx mi’aqc. Fiev Ging-Sou nyei mienh fiev njiec haaix dauh nyei za’eix? Tin-Hungh longc ninh nyei singx lingh caux fiev Ging-Sou nyei mienh jiu tong. (2 Saaˆmuˆen 23:2) Ninh mbuo fiev njiec Tin-Hungh hnamv cuotv nyei jauv, maiv zeiz ninh mbuo ganh hnamv cuotv nyei jauv. Hnangv naaic, Yeˆhoˆwaa se zoux dongh fiev Ging-Sou daaih wuov dauh.​—Doqc 2 Tiˆmoˆtai 3:16; 2 Bide 1:20, 21.

2. Mbuo hnangv haaix nor haih hiuv duqv cing Ging-Sou se zien nyei?

Mbuo hiuv duqv Ging-Sou se yiem Tin-Hungh daaih weic zuqc Ging-Sou jaa-ndaangc gorngv taux nqa’haav hingv nyei jauv-louc se gorngv daaih muonc nyei yaac zuqc nyei. Maiv maaih haaix dauh baamh mienh haih zoux hnangv naaic. (Yoˆsuˆwaa 23:14) Dongh Nernh Jiex nyei Tin-Hungh nduqc dauh ganh hnangv haih hiuv duqv cing baamh mienh nyei hoz nqaang.​—Doqc Iˆsaaˆyaa 42:9; 46:10.

Yiem Tin-Hungh daaih nyei sou nor, mbuo hnamv daaih se benx lengc jeiv sou, ganh nyungc nyei, maiv hnangv dieh deix sou. Ging-Sou se m’daaih gengh hnangv naaic. Ziex ziepc waanc-waanc buonv Ging-Sou se duqv bun cuotv yiem ziex baeqv fingx waac mi’aqc. Ging-Sou se zinh ndaangc loz-hnoi fiev daaih nyei sou. Maiv gunv ndongc haaix loz, ih zanc baamh mienh koqv hiuv nyei ziex nyungc ga’naaiv yiem naaiv baamh gen se zungv maaih gorngv taux nyei yiem zinh ndaangc fiev daaih nyei Ging-Sou. Yaac maiv daan mbuoqc naaic, fiev Ging-Sou wuov deix mienh zungv fiev waac daaih doix-diuc nzengc. Jiex mingh, Ging-Sou gorngv taux hnamv mienh nyei jauv se bun mbuo hiuv cing waac se maiv zeiz yiem haaix dauh baamh mienh daaih, se yiem Tin-Hungh daaih, yaac maaih lingc maaih qaqv haih goiv yienc mienh nyei hnyiouv daaih zoux kuv sic bun ninh mbuo duqv gauh kuv-yiem. Naaiv deix zien jauv-louc bun ziex baeqv waanc dauh mienh hiuv duqv mengh Ging-Sou se Tin-Hungh nyei Waac.​—Doqc 1 Teˆsaaˆloˆniˆgaa 2:13.

3. Ging-Sou gorngv taux haaix nyungc?

Ging-Sou se maaih kuv fienx gorngv taux Tin-Hungh maaih longx haic nyei jauv bun baamh mienh. Ging-Sou nyei waac porv mengh baamh mienh zinh ndaangc hnangv haaix nor maiv duqv yiem orn-lorqc baamh gen, yaac porv mengh yiem nqa’haav hingv ninh mbuo hnangv haaix nor aengx haih duqv yiem orn-lorqc baamh gen.​—Doqc Laauc Yaangh 21:4, 5.

Ging-Sou se maaih Tin-Hungh nyei doz-leiz, maaih zien leiz nyei gorn-ndoqv, yaac maaih waac njaaux mienh zoux longx, zoux horpc. Maiv daan mbuoqc naaic, zinh ndaangc Tin-Hungh hnangv haaix nor goux baamh mienh se zungv maaih fiev jienv yiem Ging-Sou nyei, bun mienh hiuv duqv Tin-Hungh nyei fiem-fingx se hnangv haaix. Hnangv naaic, Ging-Sou se haih tengx meih daaih hiuv duqv Tin-Hungh yaac se porv mengh meih hnangv haaix nor haih benx Tin-Hungh nyei doic.​—Doqc Singx Nzung 19:7, 11; Yaagorpc 2:23; 4:8.

4. Meih hnangv haaix nor haih bieqc hnyiouv Ging-Sou?

Longc naaiv buonv sou tengx meih bieqc hnyiouv Ging-Sou se hnangv Yesu longc nyei za’eix njaaux mienh wuov nor. Yesu ziux Ging-Sou nyei waac gorngv yaac porv mengh Ging-Sou nyei jioux-jioux waac.​—Doqc Lugaa 24:27, 45.

Maiv maaih camv-nyungc ga’naaiv ndongc Tin-Hungh nyei kuv fienx kuv-muangx. Mv baac, maaih deix mienh maiv oix muangx Tin-Hungh nyei kuv fienx, maiv mangc taux, maiv guen taux. Maaih deix yaac zungv haiz yioux gau. Mv baac meih maiv dungx hnyiouv namx. Se gorngv meih oix duqv yietc liuz nyei maengc nor, meih m’daaih a’zuqc hiuv duqv Tin-Hungh.​—Doqc Yoˆhan 17:3.