Weic Haaix Diuc Tin-Hungh Bun Maaih Kouv Naanc Caux Orqv Nyei Jauv?

1. Orqv nyei jauv hnangv haaix nor jiez gorn cuotv daaih?

Dongh Saadaan gorngv-baeqc daauh nzunc wuov, orqv nyei jauv se yiem naaic jiez gorn cuotv daaih. Zinh ndaangc, Saadaan se benx yietc dauh kuv fin-mienh, mv baac zoux gau “ninh . . . maiv a’hneiv zien leiz.” (Yoˆhan 8:44) Ninh hanc oix duqv mienh zangc ninh, dongh Tin-Hungh ganh nduqc dauh horpc zuqc duqv nyei wuov. Saadaan gorngv-baeqc nduov daauh dauh m’sieqv dorn, Haawaa, ei ninh, maiv ei Tin-Hungh. Aaˆndam yaac gan jienv Haawaa maiv ei Tin-Hungh. Laaix Aaˆndam hnangv naaic zoux, kouv naanc caux daic nyei jauv ziouc cuotv daaih aqv.​—Doqc Tin Deic Douh 3:1-6, 19.

Dongh Saadaan nduov Haawaa maiv ei Tin-Hungh wuov, ninh jiez gorn caux Tin-Hungh doix-dekc. Ninh zoux daaih gorngv Tin-Hungh se maiv puix duqv gunv baamh mienh fai benx Zoux Hlo Jiex Wuov Dauh. Mienh camv yaac gan jienv Saadaan maiv oix longc Tin-Hungh gunv ninh mbuo. Hnangv naaic, Saadaan cingx benx “gunv baamh gen wuov dauh.”​—Doqc Yoˆhan 14:30; 1 Yoˆhan 5:19.

2. Tin-Hungh zeix daaih nyei ga’naaiv maiv dunh yunh fai?

Yietc zungv Tin-Hungh zeix cuotv nyei ga’naaiv se dunh yunh nyei. Ninh zeix baamh mienh caux fin-mienh daaih haih dunh yunh nyei ei ninh. (Nzamc Leiz-Latc 32:4, 5) Ninh zeix mbuo daaih bun mbuo haih ginv oix zoux longx fai oix zoux orqv. Wuov nyungc, mbuo haih ginv oix zoux daaih gorngv mbuo hnamv Tin-Hungh.​—Doqc Yaagorpc 1:13-15; 1 Yoˆhan 5:3.

3. Weic haaix diuc Tin-Hungh bun maaih kouv naanc taux ih zanc?

Yiem zinh ndaangc daaih, Yeˆhoˆwaa bun mienh caux ninh doix-dekc, sueih ninh mbuo maiv longc ninh zoux hlo jiex gunv ninh mbuo. Weic haaix diuc Yeˆhoˆwaa bun hnangv naaic? Se bun mienh zieqv duqv maiv zeiz bun Tin-Hungh gunv baamh mienh nor, baamh mienh maiv haih duqv longx. (Gorngv Seix Zaangc 7:29; 8:9) Baamh mienh gunv baamh mienh duqv 6,000 hnyangx jiex daaih aqv. Ninh mbuo maiv haih zorqv guangc haengh orqv sic, baengc, mborqv jaax nyei jauv, fai maiv baengh fim nyei jauv.​—Doqc Yeˆleˆmi 10:23; Lomaa 9:17.

Tin-Hungh gunv baamh mienh se maiv hnangv baamh mienh gunv baamh mienh. Haaix deix zipv Tin-Hungh gunv ninh mbuo nor, ziouc duqv longx. (Iˆsaaˆyaa 48:17, 18) Maiv lauh, Yeˆhoˆwaa zorqv guangc nzengc baamh mienh nyei hungh jaa aqv. Kungx dongh ginv oix Tin-Hungh gunv ninh mbuo wuov deix duqv yiem naaiv norm baamh gen hnangv.—Iˆsaaˆyaa 11:9.​—Doqc Ndaaˆniˆen 2:44.

4. Tin-Hungh zoux hnyiouv ndaauv se bun mbuo haih zoux haaix nyungc?

Saadaan gorngv mienh fu-sux Yeˆhoˆwaa se weic Yeˆhoˆwaa kungx ceix fuqv bun hnangv. Mbuo haih zoux bun cing ninh nyei waac se maiv zien. Meih oix hnangv naaic zoux nyei fai? Tin-Hungh zoux hnyiouv ndaauv se bun mbuo yietc zungv haih zoux daaih bun cing mbuo oix Tin-Hungh fai oix baamh mienh gunv mbuo. Se gorngv mbuo oix Tin-Hungh gunv nor, mbuo a’zuqc zoux horpc ninh.​—Doqc Yopv 1:8-12; Cong-Mengh Waac 27:11.

5. Mbuo hnangv haaix nor haih ginv Tin-Hungh gunv mbuo?

Mbuo haih ginv Tin-Hungh gunv mbuo se gorngv mbuo longc Ging-Sou hoqc hiuv duqv zien leiz yaac longc zien leiz zangc ninh. (Yoˆhan 4:23) Mbuo haih ginv maiv longc Saadaan gunv mbuo se gorngv mbuo hnangv Yesu nor simv mborqv jaax nyei jauv yaac maiv caux baamh mienh nyei hungh jaa maaih buonc zoux.​—Doqc Yoˆhan 17:14.

Saadaan longc ninh nyei qaqv kuinx mienh zoux maiv luonx horngc nyei sic, zoux mun mienh nyei sic lo haaix. Se gorngv mbuo maiv zoux naaiv nyungc sic nor, maaih deix mbuo nyei doic caux mienh muoz haih gorngv doqc jatv doqc mbuo fai caux mbuo doix-dekc. (1 Bide 4:3, 4) Hnangv naaic, mbuo a’zuqc ginv oix hnangv haaix zoux. Mbuo oix caux dongh hnamv Yeˆhoˆwaa Tin-Hungh wuov deix nziaauc nyei fai? Mbuo oix ei dongh Tin-Hungh bun daaih longx haic nyei leiz nyei fai? Se gorngv oix nyei nor, mbuo zoux nyei sic se bun cing Saadaan gorngv-baeqc hnangv, weic zuqc ninh gorngv maiv maaih haaix dauh oix gan Tin-Hungh nyei waac zoux se gorngv ninh mbuo buangh zuqc kouv nyei sic nor.​—Doqc 1 Koˆlinˆto 6:9, 10; 15:33.

Weic Tin-Hungh hnamv baamh mienh, ninh laengz jienv zorqv kouv naanc caux orqv nyei jauv guangc nzengc. Haaix deix zoux daaih sienx kaux Tin-Hungh gorngv nyei waac nor, ninh mbuo ziouc duqv njien-yiouh baengh orn maengc yiem naaiv baamh gen yietc liuz.​—Doqc Yoˆhan 3:16.