GINC 4
Yesu Giduc Se Haaix Dauh?
1. Yesu nyei maengc hnangv haaix nor jiez gorn?
Yesu maaih haaix nyungc fiem-fingx zoux bun mienh zuoqc ninh?—MATVˆTAAI 11:29; MAAKO 10:13-16.
Yesu se maiv hnangv baamh mienh, weic zuqc dongh ninh maiv gaengh cuotv seix yiem baamh gen wuov, ninh se yietc dauh fin-mienh yiem tin-dorngh. (Yoˆhan 8:23) Ninh se Tin-Hungh zeix daaih nyei daauh nyungc ga’naaiv, liuz Tin-Hungh longc ninh tengx zeix cuotv maanc muotc. Dongh ninh ganh nduqc dauh hnangv Yeˆhoˆwaa Tin-Hungh ganh nyei buoz zeix daaih. Hnangv naaic, Ging-Sou cingx gorngv ninh se Tin-Hungh nyei “ndoqc” Dorn. (Yoˆhan 1:14) Yesu se zoux Tin-Hungh nyei Gorngv Waac Mienh. Weic naaiv, ninh se heuc “Doz.”—Doqc Cong-Mengh Waac 8:22, 23, 30; Koˆloˆsi 1:15, 16.
2. Weic haaix diuc Yesu njiec baamh gen?
Tin-Hungh paaiv ninh nyei Dorn njiec baamh gen. Ninh fungx ninh nyei Dorn nyei maengc yiem tin-dorngh bieqc dauh maiv gaengh bueix jiex dorn nyei m’sieqv dorn nyei gu’nguaaz-mbuoqc. Naaic dauh m’sieqv dorn se Yiutai Mienh, mbuox heuc Maaˆliˆyaa. Wuov nyungc, Yesu nyei baamh mienh die se maiv zeiz ninh nyei zien die. (Lugaa 1:30-35) Yesu njiec baamh gen se weic (1) njaaux zien waac gorngv taux Tin-Hungh, (2) zoux nyungc zeiv bun mbuo hiuv duqv hnangv haaix nor zoux Tin-Hungh nyei eix maiv gunv mbuo buangh zuqc haaix nyungc kouv naanc, caux (3) siev ninh nyei dunh yunh maengc “zuoqc mienh camv nzuonx.”—Doqc Matvˆtaai 20:28.
3. Weic haaix diuc mbuo a’zuqc longc dauh mienh zuoqc mbuo nzuonx?
Zuoqc mienh nzuonx nyei ga’naaiv se dongh a’zuqc jaauv nyei jaax-zinh weic bungx mienh leih ndutv zuqc daic nyei jauv. (Cuotv Iˆyipv 21:29, 30) Tin-Hungh jiez gorn nyei za’eix se maiv zeiz oix bun baamh mienh zuqc gox zuqc daic. Mbuo hnangv haaix nor hiuv duqv naaic? Tin-Hungh mbuox daauh dauh m’jangc dorn, Aaˆndam, se gorngv ninh zoux dorngc dongh Ging-Sou gorngv “baamz zuiz” wuov, ninh a’zuqc daic aqv. Hnangv naaic, se gorngv Aaˆndam maiv baamz zuiz nor, ninh zungv maiv zuqc daic. (Tin Deic Douh 2:16, 17; 5:5) Ziux Ging-Sou gorngv nyei waac, daic nyei jauv “bieqc” baamh gen se weic laaix Aaˆndam. Weic naaiv, Aaˆndam nyei zuiz ziouc linh jienv mingh bun ninh nyei fu’jueiv, fun-faqv, hoz doic zeiv-fun zuqc daic. Mbuo cingx daaih a’zuqc longc dauh mienh zoux zuoqc mbuo nzuonx nyei jaax-zinh bungx nqoi mbuo leih ndutv zuqc daic nyei jauv dongh yiem Aaˆndam baamz zuiz cuotv daaih hoic zuqc mbuo wuov.—Doqc Lomaa 5:12; 6:23.
Haaix dauh haih jaauv naaic norm jaax-zinh zuoqc mbuo nzuonx bun mbuo leih ndutv zuqc daic nyei jauv? Taux mbuo daic nyei ziangh hoc, mbuo jaauv duqv mbuo ganh nyei zuiz hnangv. Maiv dunh yunh nyei mienh maiv haih jaauv duqv dieh dauh mienh nyei zuiz.—Doqc Singx Nzung 49:7.
4. Weic haaix diuc Yesu daic?
Yesu se dunh yunh nyei, maiv hnangv mbuo nor maiv dunh yunh. Hnangv naaic, Yesu daic se maiv zeiz weic ninh zuqc jaauv ninh nyei zuiz. Ninh maiv baamz jiex haaix nyungc zuiz. Yesu daic se weic jaauv baamh mienh nyei zuiz. Tin-Hungh gengh hnamv haic baamh mienh cingx paaiv ninh nyei Dorn njiec daaih daic weic mbuo. Yesu mv baac gengh hnamv haic mbuo cingx ei jienv ninh nyei Die nyei waac zoux yaac siev ninh nyei maengc jaauv mbuo nyei zuiz.—Doqc Yoˆhan 3:16; Lomaa 5:18, 19.
Mangc fangx-nangh Weic Haaix Diuc Yesu Zuqc Daic?
5. Ih zanc Yesu zoux haaix nyungc?
Wuov zanc dongh Yesu yiem naaiv baamh gen wuov, ninh zorc longx butv-baengc mienh, dorh daic nyei mienh aengx nangh daaih, yaac njioux mienh cuotv ninh mbuo nyei zeqc naanc. Ninh zoux naaiv deix sic se bun mbuo hiuv yiem nqa’haav hingv ninh oix hnangv naaiv nor zoux bun yietc zungv muangx waac nyei baamh mienh. (Matvˆtaai 15:30, 31; Yoˆhan 5:28) Yesu daic mingh, Tin-Hungh aengx bun ninh nangh daaih benx dauh henv haic nyei fin-mienh yiem tin-dorngh. (Eˆfeˆso 1:20) Yesu ziouc zueiz jienv Tin-Hungh nyei mbiaauc maengx bung zuov taux Yeˆhoˆwaa bun ninh maaih lingc zoux Hungh gunv baamh gen. (Hipvˆlu 10:12, 13) Ih zanc, Yesu yiem tin-dorngh zoux jienv Hungh nyei. Ninh nyei sai-gorx mbuo yaac zunh jienv naaic norm kuv fienx gormx naaiv lungh ndiev mbuox mienh camv.—Doqc Ndaaˆniˆen 7:13, 14; Matvˆtaai 24:14.
Maiv lauh, Yesu longc ninh zoux Hungh nyei qaqv zorqv guangc nzengc yietc zungv kouv naanc caux zoux orqv zoux waaic nyei mienh. Haaix dauh sienx kaux Yesu yaac ei jienv ninh nyei waac zoux ziouc duqv njien-yiouh nyei maengc yiem orn-lorqc dorngx yiem naaiv baamh gen.—Doqc Singx Nzung 37:9-11.