Kuv Fienx Hnangv Haaix Nor Gorngv Taux Buoqc Zangc Nyei Jauv?

1. Yietc zungv buoqc zangc nyei jauv se longx bun mbuo nyei fai?

Yietc zungv buoqc zangc nyei jauv se maaih hnyiouv longx nyei mienh nyei. Se longx haic, Tin-Hungh hiuv duqv naaic deix mienh nyei yaac nzauh heix taux ninh mbuo. Mv baac maaih mienh dorh buoqc zangc nyei jauv daaih zoux orqv sic. (2 Koˆlinˆto 4:3, 4; 11:13-15) Ziux lungh ndiev nyei fienx gorngv daaih, maaih deix buoqc zangc nyei jauv zungv caux jienv maaih buonc zoux doqc zoux ciouv haeqv mienh gamh nziex, njiec hnyiouv daix mienh camv weic oix mietc nzengc ninh mbuo, mborqv jaax weic nzaeng deic-bung fai nzaeng zoux hlo, caux zoux doqc fu’jueiv fai caa fu’jueiv bueix. Hnangv naaic zoux daaih, zien sienx Tin-Hungh wuov deix haiz nzauh haic!​—Doqc Matvˆtaai 24:3-5, 11, 12.

Zien buoqc zangc nyei jauv zoux daaih se ceng Tin-Hungh, mv baac jaav buoqc zangc nyei jauv zoux daaih ninh maiv a’hneiv. Jaav buoqc zangc nyei jauv njaaux nyei jauv-louc se maiv yiem Ging-Sou, liemh jienv dongh ninh mbuo njaaux jaav leiz gorngv taux Tin-Hungh caux daic nyei jauv. Mv baac Yeˆhoˆwaa oix mienh hiuv duqv zien ninh se hnangv haaix.​—Doqc Eˆseˆken 18:4; 1 Tiˆmoˆtai 2:3-5.

2. Kuv fienx hnangv haaix nor gorngv taux buoqc zangc nyei jauv?

Jaav buoqc zangc nyei jauv se maiv haih nduov duqv zuqc Tin-Hungh. Ninh mbuo nyiemc ninh mbuo hnamv Tin-Hungh, mv baac zien nor, ninh mbuo nyei hnyiouv zungv bun nzengc Saadaan nyei lungh ndiev mi’aqc. (Yaagorpc 4:4) Tin-Hungh nyei waac yiem Ging-Sou bun mbuo hiuv duqv yietc zungv jaav buoqc zangc nyei jauv se heuc “Mbaaˆmbiˆlon Domh Zingh.” Mbaaˆmbiˆlon Zingh se loz-hnoi nyei zingh. Dongh jiex liuz mbiungc-suiv-imx yiem Noyaa nyei ziangh hoc wuov, jaav buoqc zangc nyei jauv se yiem Mbaaˆmbiˆlon Zingh jiez gorn cuotv daaih. Maiv lauh, Tin-Hungh oix liemh zeih mietc nzengc buoqc zangc nyei jauv dongh zoux nduov mienh caux zoux doqc zoux hoic mienh wuov.​—Doqc Laauc Yaangh 17:1, 2, 5, 16, 17; 18:8.

Kuv fienx nyei waac se aengx maaih gauh camv naaiv. Yeˆhoˆwaa maiv la’kuqv hnyiouv longx nyei mienh gormx naaiv lungh ndiev dongh faatv nzaanx mingh yiem zuqc jaav buoqc zangc nyei jauv wuov. Ninh njaaux naaic nyungc mienh zien leiz, bun ninh mbuo daaih gapv zunv gan ninh nyei jauv yangh.​—Doqc Mikaa 4:2, 5.

3. Hnyiouv longx nyei mienh horpc zuqc hnangv haaix nor zoux?

Dongh hnamv zien leiz yaac oix zoux longx nyei mienh, Yeˆhoˆwaa oix hnamv ninh mbuo. Ninh heuc ninh mbuo oix zuqc gaanv deix yiem jaav buoqc zangc nyei jauv cuotv daaih. Dongh maaih hnyiouv hnamv Tin-Hungh wuov deix oix a’hneiv nyei goiv daaih zoux horpc ninh.​—Doqc Laauc Yaangh 18:4.

Yiem gu’nyuoz daauh baeqv hnyangx nyei ziangh hoc wuov, hnyiouv longx nyei mienh duqv haiz liuz gong-zoh mbuo zunh nyei kuv fienx, ninh mbuo ziouc a’hneiv nyei zipv. Ninh mbuo duqv Yeˆhoˆwaa njaaux ninh mbuo siang-jauv hnangv haaix nor yiem, se gauh longx nyei jauv weic bun ninh mbuo maaih nyungc zoux caux maaih lamh hnamv dorngx. Ninh mbuo se zoux kuv nyungc zeiv bun mbuo ih jaax hnoi nyei mienh weic zuqc ninh mbuo zipv wuov kuv fienx dorh Yeˆhoˆwaa daaih ndaangc nyungc-nyungc.​—Doqc 1 Teˆsaaˆloˆniˆgaa 1:8, 9; 2:13.

Haaix deix biaux cuotv jaav buoqc zangc nyei jauv, Yeˆhoˆwaa a’hneiv nyei zipv ninh mbuo bieqc daaih benx zangc ninh nyei biauv zong mienh. Se gorngv meih zipv Yeˆhoˆwaa nyei cingv fienx nor, meih duqv ninh benx meih nyei doic yaac duqv dongh zangc Yeˆhoˆwaa wuov deix benx meih nyei siang-hmuangv-doic. Ninh mbuo maaih hnyiouv hnamv mienh. Maiv daan mbuoqc naaic, meih yaac duqv yietc liuz nyei maengc.​—Doqc Maako 10:29, 30; 2 Koˆlinˆto 6:17, 18.

4. Tin-Hungh hnangv haaix nor dorh njien-yiouh nyei jauv bieqc norm-norm deic-bung?

Taux ziangh hoc siemv jaav buoqc zangc nyei jauv se benx kuv fienx. Naaic se bungx nqoi mienh maanh gormx naaiv baamh gen, bun ninh mbuo duqv kuv-yiem, maiv zuqc maaih haaix nyungc daaih zoux doqc zoux hoic ninh mbuo. Yiem naaic mingh maiv aengx maaih jaav buoqc zangc nyei jauv daaih nduov mienh maanh bun nqoi benx ziex guanh aqv. Dauh dauh yiem njiec se dongh diuc hnyiouv kungx zangc nduqc dauh zien Tin-Hungh hnangv.​—Doqc Laauc Yaangh 18:20, 21; 21:3, 4.