Meih Hnangv Haaix Nor Haih Mingh Nitv Jienv Tin-Hungh?

1. Tin-Hungh muangx yietc zungv daux gaux nyei waac nyei fai?

Tin-Hungh heuc ziex nyungc mienh daaih daux gaux nitv ninh. (Singx Nzung 65:2) Mv baac, ninh maiv muangx, fai maiv zipv, yietc zungv daux gaux nyei waac. Gorngv nyungc zeiv se hnangv naaiv, se gorngv m’jangc dorn zoux waaic bun ninh nyei auv nor, ninh zoux waaic nyei sic se haih laanh jienv ninh daux gaux nyei waac. (1 Bide 3:7) Dongh wuov zanc Iˆsaaˆlaaˆen Mienh maiv kangv goiv ninh mbuo zoux waaic nyei sic wuov, Tin-hungh maiv muangx ninh mbuo daux gaux nyei waac. Mv baac, Tin-Hungh zungv oix zipv zuiz-mienh daux gaux nyei waac se gorngv ninh mbuo maaih hnyiouv guangc zuiz nor, maiv gunv ninh mbuo duqv baamz jiex zuiz ndongc haaix hlo. Naaiv bun mbuo hiuv duqv cing, daux gaux nyei jauv se yietc nyungc Tin-Hungh bun nyei lengc jeiv zingh nyeic.​—Doqc Iˆsaaˆyaa 1:15; 55:7.

2. Mbuo horpc zuqc hnangv haaix nor daux gaux?

Mbuo zangc Tin-Hungh se oix zuqc daux gaux. Mbuo horpc zuqc kungx daux gaux bun Yeˆhoˆwaa nduqc dauh ganh hnangv weic zuqc ninh se dongh Zeix mbuo daaih Wuov Dauh. (Matvˆtaai 4:10; 6:9) Mv baac weic mbuo maiv dunh yunh, mbuo a’zuqc dengv jienv Yesu nyei mbuox daux gaux weic zuqc ninh daic nzaaux mbuo nyei zuiz. (Yoˆhan 14:6) Yeˆhoˆwaa maiv oix mbuo dorh mienh fiev daaih nyei waac fai kungx jiangx jienv haaix deix waac daaih paan mingh puoqv nzuonx daux gaux kungx gorngv dingc naaic deix waac hnangv. Ninh oix mbuo maaih haaix nyungc yiem hnyiouv se ziux naaic gorngv.​—Doqc Matvˆtaai 6:7; Fiˆlipvˆpoi 4:6, 7.

Zeix mbuo daaih Wuov Dauh zungv haih muangx duqv haiz mbuo yiem hnyiouv gu’nyuoz daux gaux nyei waac nyei. (1 Saaˆmuˆen 1:12, 13) Ninh oix mbuo maaih haaix nyungc yaac daux gaux bun ninh. Mbuo haaix zanc daux gaux yaac duqv, hnangv lungh ndorm, lungh muonz, nyanc hnaangx nyei ziangh hoc, caux haaix zanc mbuo buangh zuqc haaix nyungc sic.​—Doqc Singx Nzung 55:22; Matvˆtaai 15:36.

3. Weic haaix diuc Giduc Mienh gapv zunv buangh?

Mingh nitv fatv Tin-Hungh se maiv hec weic zuqc mbuo yiem zuqc maiv sienx Tin-Hungh nyei mienh mbu’ndongx. Ninh mbuo yaac oix guatc doqc jatv Tin-Hungh laengz nyei waac oix bun naaiv norm lungh ndiev baengh orn daaih. (2 Tiˆmoˆtai 3:1, 4; 2 Bide 3:3, 13) Hnangv naaic, mbuo cingx a’zuqc caux dongh caux mbuo juangc nyungc sienx nyei mienh nziaauc, bun mbuo lomh nzoih laanh kuinx laanh.​—Doqc Hipvˆlu 10:24, 25.

Caux hnamv Tin-Hungh nyei mienh nziaauc se tengx mbuo haih mingh nitv Tin-Hungh. Yeˆhoˆwaa nyei Zorng-Zengx mbuo nyei wuic se zoux daaih bun mienh maaih kuv ziangh hoc duqv buatc dieh deix nyei sienx fim ziouc haih tengx ninh mbuo ganh sienx aengx gauh henv.​—Doqc Lomaa 1:11, 12.

4. Meih hnangv haaix nor haih mingh nitv jienv Tin-Hungh?

Meih haih mingh nitv jienv Yeˆhoˆwaa se gorngv meih fei-fangv taux dongh meih duqv hoqc taux nyei jauv yiem Ging-Sou wuov. Oix zuqc hnamv taux Yeˆhoˆwaa zoux nyei sic, ninh njaaux nyei jauv, caux ninh laengz nyei waac. Se gorngv mbuo daux gaux bun Yeˆhoˆwaa yaac fei-fangv taux ninh nyei jauv nor, naaic se tengx mbuo haih maaih hnyiouv zongc zingh haic Tin-Hungh nyei cong-mengh caux ninh hnamv mienh nyei jauv.​—Doqc Yoˆsuˆwaa 1:8; Singx Nzung 1:1-3.

Meih haih mingh nitv jienv Tin-Hungh se gorngv meih kaux ninh, se gorngv meih maaih sienx fim. Mv baac sienx fim nyei jauv se beiv hnangv taux ga’naaiv-zuangx nor zanc-zanc a’zuqc fuqv wuom goux jienv yiem cingx daaih haih hlo. Meih a’zuqc zanc-zanc zaah mangc meih sienx nyei jauv weic tengx meih goux jienv meih nyei sienx fim bun meih haih sienx wuonv.​—Doqc Matvˆtaai 4:4; Hipvˆlu 11:1, 6.

5. Mingh nitv jienv Tin-Hungh nor, naaic hnangv haaix nor haih tengx meih?

Yeˆhoˆwaa korv-lienh dongh hnamv ninh wuov deix mienh. Ninh haih beu jienv ninh mbuo nyei sienx fim caux dongh ninh mbuo hnamv jienv oix duqv yietc liuz nyei maengc wuov. (Singx Nzung 91:1, 2, 7-10) Ninh donv mbuo haaix nyungc jauv haih zoux bun mbuo maiv wangc yaac maiv njien-yiouh. Yeˆhoˆwaa njaaux mbuo hnangv haaix nor yiem se gauh longx jiex.​—Doqc Singx Nzung 73:27, 28; Yaagorpc 4:4, 8.