Weic Haaix Diuc Tin-Hungh Maaih Norm Gorn Zangc?

1. Weic haaix diuc zinh ndaangc Tin-Hungh dorh Iˆsaaˆlaaˆen Mienh gapv zunv maaih dongh diuc hnyiouv?

Zinh ndaangc maaih dauh m’jangc dorn heuc Apcˆlaaˆham. Ninh ei Yeˆhoˆwaa Tin-Hungh nyei waac zoux. Tin-Hungh dorh Apcˆlaaˆham nyei zeiv-fun gapv zunv benx yietc guoqv mienh, liuz bun doz-leiz ninh mbuo. Ninh cuotv mbuox heuc naaiv norm guoqv “Iˆsaaˆlaaˆen,” liuz bun ninh mbuo zoux gorn dorh zien buoqc zangc nyei jauv yaac dorh ninh nyei waac. (Singx Nzung 147:19, 20) Hnangv naaic, maanc guoqv nyei mienh oix duqv longx weic Iˆsaaˆlaaˆen.​—Doqc Tin Deic Douh 22:18.

Tin-Hungh ginv Iˆsaaˆlaaˆen Mienh benx ninh nyei zorng-zengx mienh. Ninh mbuo zinh ndaangc zoux jiex nyei jauv-louc bun hiuv mienh hnangv haaix nor duqv longx se gorngv ei Tin-Hungh nyei leiz nor. (Nzamc Leiz-Latc 4:6) Hnangv naaic, weic Iˆsaaˆlaaˆen Mienh, dieh deix cingx daaih haih hiuv duqv zien wuov dauh Tin-Hungh.​—Doqc Iˆsaaˆyaa 43:10, 12.

2. Weic haaix diuc zien Giduc Mienh gapv zunv maaih dongh diuc hnyiouv?

Zoux gau, Iˆsaaˆlaaˆen Mienh maiv kangv zoux horpc Tin-Hungh, liuz Yeˆhoˆwaa guangc naaic guoqv mienh ziouc dorh Giduc Mienh daaih div ninh mbuo. (Matvˆtaai 21:43; 23:37, 38) Guangc liuz Iˆsaaˆlaaˆen Mienh, Yeˆhoˆwaa dorh zien Giduc Mienh daaih benx ninh nyei zorng-zengx mienh.​—Doqc Gong-Zoh 15:14, 17.

Wuov zanc, Yesu heuc dongh gan ninh nyei mienh mingh zunh doz njaaux maanc fingx mienh benx ninh nyei sai-gorx. (Matvˆtaai 10:7, 11; 24:14; 28:19, 20) Ih zanc se yiem zuqc setv mueiz nyei hnoi-nyieqc. Zunh doz nyei gong se aav lamh ziangx aqv. Yiem zinh ndaangc daaih taux ih zanc, naaiv se daauh nzunc Yeˆhoˆwaa dorh ziex baeqv waanc dauh mienh yiem norm-norm guoqv daaih gapv zunv dongh hnyiouv nyei longc zien leiz zangc ninh. (Laauc Yaangh 7:9, 10) Zien Giduc Mienh se dongh diuc hnyiouv nyei laanh kuinx laanh yaac tengx doic. Gormx naaiv lungh ndiev, ninh mbuo nyei wuic njaaux taux Ging-Sou nyei jauv-louc se fih hnangv nyei.​—Doqc Hipvˆlu 10:24, 25.

3. Yeˆhoˆwaa nyei Zorng-Zengx nyei ih jaax hnoi gorn zangc se hnangv haaix nor jiez gorn daaih?

Yiem gu’nyuoz 1870 mingh taux 1879 wuov deix hnyangx, maaih guanh zoqc nyei horqc saeng hoqc taux Ging-Sou ziouc jiez gorn lorz buatc Ging-Sou nyei zien leiz. Ninh mbuo hiuv duqv wuov zanc Yesu njaaux Giduc Mienh mingh zunh doz, liuz ninh mbuo ziouc jiez gorn mingh ziex norm deic-bung zunh doz gorngv taux Tin-Hungh nyei Guoqv. Taux 1931 wuov hnyangx, ninh mbuo duqv Yeˆhoˆwaa nyei Zorng-Zengx naaiv norm mbuox daaih longc.​—Doqc Gong-Zoh 1:8; 2:1, 4; 5:42.

4. Yeˆhoˆwaa nyei Zorng-Zengx hnangv haaix nor gapv zunv maaih dongh diuc hnyiouv?

Yiem gu’nyuoz daauh baeqv hnyangx, maaih guanh mienh gox se zoux gorn goux Giduc Mienh nyei yietc zungv jiu-bang yiem ziex norm deic-bung, se dorh jauv bun jiu-bang maaih sienx fim longx. Naaic deix mienh gox zieqv duqv Yesu se zoux jiu-bang nyei m’nqorngv. (Gong-Zoh 16:4, 5) Ih jaax hnoi yaac fih hnangv nyei, maaih guanh mienh gox se zoux gorn goux yietc zungv jiu-bang gormx naaiv lungh ndiev, se dorh jauv bun Yeˆhoˆwaa nyei Zorng-Zengx maaih sienx fim longx. Naaiv guanh mienh gox se goux Yeˆhoˆwaa nyei Zorng-Zengx nyei gorn zangc dongh faan waac, yienx sou, caux fungx cuotv longc hoqc Ging-Sou nyei ga’naaiv wuov. Longc hoqc Ging-Sou nyei ga’naaiv se faan daaih maaih jiex ndaangc 800 nyungc waac. Hnangv naaic, naaiv guanh mienh gox haih bun cuotv Ging-Sou nyei waac daaih kuinx caux dorh jauv jiex ndaangc 120,000 norm jiu-bang gormx naaiv lungh ndiev. Yiem yietc norm yietc norm jiu-bang, puix duqv benx mienh gox nyei m’jangc dorn wuov deix se zoux mienh gox. Naaic deix jiu-bang nyei mienh gox se longc hnyiouv goux longx jiu-bang nyei mienh.​—Doqc 1 Bide 5:2, 3.

Yeˆhoˆwaa nyei Zorng-Zengx mbuo mbenc jauv daaih zunh kuv fienx caux njaaux mienh benx Yesu nyei sai-gorx. Yie mbuo yiem yietc norm biauv zunh jiex yietc norm biauv, m’daaih hnangv zinh ndaangc gong-zoh mbuo zoux wuov nor. (Gong-Zoh 20:20) Yie mbuo yaac tengx dongh maaih hnyiouv oix gan zien leiz wuov deix hoqc bieqc hnyiouv Ging-Sou. Mv baac Yeˆhoˆwaa nyei Zorng-Zengx se maiv zeiz kungx benx norm gorn zangc hnangv. Yie mbuo se benx yietc hmuangv mienh juangc dauh hnamv haic dorn-jueiv nyei Die. Yie mbuo se benx gorx-yiouz dorc muoc, laanh hnamv laanh. (2 Teˆsaaˆloˆniˆgaa 1:3) Weic Yeˆhoˆwaa nyei mienh mbenc jauv daaih zoux horpc Tin-Hungh caux tengx dieh deix mienh, ninh mbuo gapv daaih se benx a’hneiv jiex nyei mienh hmuangv yiem naaiv baamh gen.​—Doqc Singx Nzung 33:12; Gong-Zoh 20:35.