Tul kat ul u Mam Jabʼaleʼ: ¿abʼil kat niman Aak Tiixheʼ?

Unqʼa xaoleʼ tiqʼii aak Noéjeʼ mamaʼla txoj la txumbʼaleʼ nikat ibʼaneʼ (Génesis 6:5)

Aak Adáneʼ tukʼ aak Evaeʼ kat chee veʼt italintxaʼ chaʼma, as oora chit kat naʼ veʼt xaol vatz u Txʼavaʼeʼ. As kaʼt unqʼa ángeleʼ ech kat ibʼan veʼteʼ u Txʼiʼlanajeʼ as yeʼ kat inima veʼt chajnaj Aak Tiixheʼ.

As kat kuʼ chʼuʼl chajnaj tu almikaʼ as kat ibʼan chajnaj ichiʼol echeʼ xaol, tan nikat isaʼ chajnaj ichukat tixqel. Kat chee veʼt ikʼaol chajnaj poro yeʼ bʼaʼn itxumbʼal as nim chit iyakʼil tiʼ kaʼt unqʼa xaoleʼ.

U vatz Txʼavaʼeʼ kat noo veʼt taʼn xaol yeʼ bʼaʼn itxumbʼal. U Bibliaeʼ nital isuuchil uvaʼ kat naʼ veʼt unqʼa vaaʼ vatz u Txʼavaʼeʼ as aʼ kuxh u txoj la txumbʼaleʼ nititzʼa unqʼa najeʼ ibʼanat veʼteʼ.

Kat inima aak Noéjeʼ Aak Tiixheʼ as kat ibʼan aak umaʼl u arca (Génesis 6:13, 14, 18, 19, 22)

Kat tal Aak Jehováeʼ te aak Noé, umaʼl u bʼaʼnla naj, uvaʼ la isojsa Aak unqʼa xaoleʼ txoj itxumbʼal taʼn u Mam Jabʼaleʼ.

Tal Aak Tiixheʼ uvaʼ laik ibʼan aak Noéjeʼ umaʼl u nimla kaaxha, uveʼ arca ibʼii. Laik toksa ok aak unqʼa tatineʼ stuul as skajayil vatzul unqʼa txokopeʼ.

Kat tal aak Noé isuuchil te unqʼa xaoleʼ tiʼ uvaʼ laik ul umaʼl u mam jabʼal, poro yeʼxhibʼil kat abʼin. Nikat kuxh itzeʼle unqʼa xaoleʼ as nikat mox tul iviʼ umpajte.

Tul kat tzojpu veʼt aak Noéjeʼ tiʼ u arcaeʼ, kat taqʼ veʼt ok aak unqʼa txokopeʼ stuul.