Wan Uman Uufa Ozban Ded Bwai Pikni Kom Bak Alaiv

Iina di taim wen no rien neehn a faal, Jeuova tel Ilaija se: ‘Go a Zarifat, an wan uman uufa ozban ded a-go gi yu fuud fi nyam.’ Wen Ilaija riich a di siti giet, im si wan puor uman uufa ozban ded a gyada op som wud. Im aks ar fi som waata fi jringk. An wen shi a go get di waata, Ilaija se tu ar se: ‘Du, gi mi piis a bred tu.’ Bot di uman se: ‘Mi no av no bred kyan gi yu. Di likl flowa an ail we mi av lef a jos fi mek likl fuud fi mi an mi bwai pikni iit.’ Ilaija tel ar se: ‘Jeuova pramis se, ef yu mek di bred fi mi, di flowa an ail we yu av naa go ron out til rien staat faal agen.’

So di uman go uom an go mek di bred fi Ilaija. An di sed ting we Jeuova pramis se did apm fi chuu. Iina di taim wen no rien neehn a faal, di uman uufa ozban ded an ar bwai pikni did aalwiez av fuud fi nyam. Ar flowa an ail neva ron out.

Afta dat, wan torbl sitn apm. Di uman bwai pikni tek sik an en op ded. An shi beg Ilaija fi elp. So Ilaija tek di likl bwai fram im mada an kya im go iina wan ruum we de opstiez. Im put im dong pan di bed an staat fi prie an se: ‘Jeuova, du, mek da likl bwai ya kom bak alaiv.’ Yu nuo wa mek dis wuda bi wan big ting fi Jeuova du? A kaa wi neva ier se nobadi eva kom bak alaiv bifuo da taim de. An di uman an ar son a nat iivn did Izrelait.

Bot di likl bwai kom bak alaiv! Ilaija tel di uman uufa ozban ded se: ‘Si yu son ya! Im no ded agen.’ Shi se tu Ijaija se: ‘Yu a riili Gad prafit fi chuu. Kaaz evriting we yu se, mi kyan si a Jeuova tel yu fi se it.’