Di Izrelait dem lef fram Mount Sainai an dem go chuu wan dezot we niem Pieran fi kech a di plies we dem kaal Kiedish. Wen dem de de, Jeuova tel Muoziz se: ‘Pik wan man fram evri wan a di chraib dem an sen dem 12 man ya fi go spai out Kienan. A da lan de mi a-go gi tu di Izrel piipl dem.’ So Muoziz pik di 12 man dem an se tu dem se: ‘Ga’a Kienan an go fain out ef di lan we de de gud fi plaant fuud pan. An fain out ef di piipl dem wiik ar dem chrang an ef dem liv iina tent ar dem liv iina siti.’ So di 12 spai dem lef fi go a Kienan an tuu a dem did niem Jashwa an Kieleb.

Di spai dem did go we fi 40 die an dem kom bak wid fig, prangganat an griep. Ier wa dem se: ‘A wan gud piis a lan de de. Bot yu si di piipl dem, dem chrang bad an di waal dem we de roun di siti dem ai bad.’ Bot Kieleb se: ‘No wach dat man. Kom mek wi go rosh dem nou, kaa wi kyan don dem!’ Yu nuo wa mek Kieleb did se dat? Kaa im an Jashwa did chos iina Jeuova. Bot ier wa di ada 10 man se: ‘Yu mosi mad! Yu no si ou di piipl dem uova de big laik jaiyant! Wen yu luk pan wi an dem, wi komiin laik graasapa.’

Wen di piipl dem ier dis, dem aat jrap a grong. Dem staat grombl grombl an se tu dem wan aneda se: ‘Kom mek wi pik sumadi els fi liid wi an go baka Iijip yaa. Wa mek wi fi go de fi dem kil wi aaf?’ Bot Jashwa an Kieleb tel dem se: ‘No fried man. Jos mek wi du wa Jeuova se wi fi du. Jeuova a-go tek kier a wi.’ Bot di Izrelait dem wudn lisn tu dem. Dem did aal waahn kil aaf Jashwa an Kieleb!

So wa Jeuova did du? Im tel Muoziz se: ‘Afta evriting we mi du fi di Izrelait dem, dem stil naa du wa mi se dem fi du. Yu si kaaz a dat, dem a-go tan iina da wildanes ya fi 40 ier, an a ya-so dem a-go ded. A onggl dem pikni dem an Jashwa an Kieleb a-go get fi go iina di lan we mi pramis fi gi dem.’

Wen di Izrelait dem did stil iina di wildanes, Kuora, Dietan, Abairam, an 250 ada man staat fi fait gens Muoziz. Dem se tu im se: ‘Wi taiyad a yu nou man! Wa mek a yu afi a liid wi an wa mek Ieran a di liida fi di priis dem? Afta a no yu an Ieran wan Jeuova a yuuz, im a yuuz aal a wi tu.’ Jeuova neehn laik dat at aal. Kaa di wie ou Jeuova si’it, a neehn Muoziz an Ieran dem did a fait gens. A im dem did a fait gens!

Muoziz tel Kuora an di wan dem we a bak im se: ‘Kom a di tent tumaro, an kya di sitn we unu bon swiit spais iina wid swiit spais iina it. Jeuova a-go mek wi nuo uu im pik.’

Di neks die, Kuora an di 250 man dem ga’a di tent go miit Muoziz. Wen dem kech de, dem bon swiit spais laik se dem a priis. Jeuova tel Muoziz an Ieran se: ‘Muuv fram wich paat Kuora an di man dem we a bak im de.’

Iivn duo Kuora did ga’a di tent go miit Muoziz, Dietan, Abairam an dem fambili neehn go no we. So Jeuova tel di Izrelait dem fi muuv we fram wich paat dem man ya tent dem did de. An di Izrelait dem neehn ich fi du dat. Dietan, Abairam, an dem fambili did tan op outsaida dem tent. Den aal av a sodn, di grong uopm op an tek dem iin! Kuora did stil de a di tent we dem yuuz fi worship Gad, an faiya kom dong fram evn an bon im op an di 250 man dem we did a bak im tu.

Den Jeuova tel Muoziz se: ‘Tek wan waakn tik fram evri wan a di liida dem fi di difrant difrant chraib dem an rait dem niem pan it. Bot yu si di waakn tik we yu tek fram Liivai chraib, rait Ieran niem pan it. Put di wol a di tik dem iina di tent, an mi a-go mek flowaz gruo pan di waakn tik fi di man we mi pik.’

Di die afta dat, Muoziz kya out aal a di waakn tik dem an shuo di liida dem fi di chraib dem. Ges uufa tik did av flowaz a gruo pan it an aal raip aamanz tu? No Ieran! Dis did shuo se a im Jeuova pik fi bi di liida fi di priis dem.