Náṉkammari̱
Nuwái shuari̱
10 Ama̱a̱rak naṉkaamasmia nuyá̱ Nuwái uchirí̱ Semsha Kaamsha tura Jajetsha pampararmiayi. Tura nu shuarka ju̱ ármiayi, 2 Jajeta uchirí̱ṉkia Kúmir, Makuk, Matái, Japan, Tupar, Misek tura Tíras. 3 Tura Kúmira uchirí̱ṉkia Askiniás, Ripat tura Tukarma ármiayi. 4 Nuyá̱ Japana uchirí̱ṉkia Irisa, Társes, Kitim tura Tutaním ármiayi. 5 Kame Jajet shuarka nayants supichik aṉkant aṉkant ní nuṉke̱ni̱ṉ úunt matsatka najankar matsamsarmiayi. Túrasha nuamtak ni chichame̱ja̱i̱ṉ anturnainiarmiayi.
6 Tura Kaama uchirí̱ṉkia Kus, Mesraim, Put tura Kanaan ármiayi. 7 Nuyá̱ Kusa uchirí̱sha Sewa, Awiira, Sapta, Rama tura Sapitkia ármiayi. Núnisaṉ Rama uchirí̱sha Shiwia tura Tetan ármiayi. 8 Kus chikichniasha áishmaṉchin yajutmar Nimprut anaikiamiayi. Kame Nimprutka nupetmak kakaram ajakí̱ emka akupin ajasmiayi. 9 Kame Uunt Yus íimmianum Nimprutka tí e̱a̱mniuyayi. Tuma asamtai tí e̱a̱mniun pachisar “Maa, Uunt Yus íimmianum Nimprutja̱i̱ métek tí e̱a̱mniuiti” tu tiniu ármiayi. 10 Tura Nimprutka Papir, Irik, Akat nuyá̱ Karni péprunam akupniuyayi. Nu pépruka Senar nuṉkanam ármiayi. 11 10:11-12 Nú nuṉkanmaya̱ jiinkí̱ Asiria nuṉkanam wémiayi. Nui̱sha Níniwi, Rejuputir, Kara tura Risen péprun najankamiayi. Risenka úunt pepruyayi tura Níniwi péprunmaya̱ Kara pepru ajapén étentamunam ámiayi.
13 Tura Mesraimia shuari̱ mátsatka armia nuka Ruut aents, Anam aents, Riap aents, Naptuj aents, 14 Patrú aents, Kasru aents, tura Kaptur aents ármiayi. Tura Kasru shuarnumia̱ Jiristíu aents akiinkiarmiayi.
15 Tura Kanaana uchirí̱ iwia̱i̱ri̱ṉkia Setun náartiniuyayi. Nuyá̱ chíkich uchirí̱nkia Jet anaikiamiayi. 16 Kame Kanaana shuari̱ṉkia Jípius aents, Amur aents, Jírjis aents, 17 Jep aents, Araak aents, Sen aents, 18 Arpat aents, Semar aents tura Amat aents armia nuka aṉkant aṉkant kanarar matsamkarmiayi. Nuyá̱ Kanaan aents tsakiṉmaakarmiayi. 19 Tura Kanaan aentsu nuṉke̱nka Jirarnumaani̱ṉkia Setunnumia̱ juarki̱ Kaasa tímianai náṉkatkauyayi. Núnisaṉ Sutuma, Kumura, Atma tura Sepuimnumaani̱ṉkia Rasa tímianai náṉkatkauyayi. 20 Kame ju̱ aentska Kaama shuari̱ ármiayi. Tura ní chichame̱nak chicháu ásar aṉkant aṉkant ní shuari̱ji̱a̱i̱ṉ matsamkar ní nuṉke̱ni̱ṉ uunt péprun najankar matsamsarmiayi.
21 Núnisaṉ Jajeta yachi̱ iwia̱i̱ri̱ Semsha uchin yajutmakmiayi. Tuma asa ashí Iwira uchirí̱ armia nuka Sem aents ármiayi. 22 Tura Sema uchirí̱ṉkia Iram, Ásur, Arpaksat, Ruut tura Aram ármiayi. 23 Arama uchirí̱sha Us, Jur, Jetir tura Mas ármiayi. 24 Arpaksata uchirí̱ Sérajauyayi tura Séraja uchirí̱ṉkia Iwirauyayi. 25 Iwira uchirí̱ṉkia jímiar ármiayi. Iwiai̱ṉkia Pirikiauyayi. Kame ni pujumia nú tsawantin nuṉká kanakármiayi. Tuma asamtai ni naari̱ Pirik* anaikiamuyayi. Ni patai̱ṉkia Juktan náartiniuyayi. 26 Juktana uchirí̱ ju̱ ármiayi, Armutat, Serip, Asarmawít, Jera, 27 Aturam, Usar, Tikra, 28 Upar, Apimair, Shiwia, 29 Upir, Awiira tura Jupap. Nuka ashí Juktana uchirí̱ ármiayi. 30 Ni nuṉke̱sha Misa nuṉkanmaya̱ jukí̱ etsa̱ jintiainmaani̱ naintiar naintiar nuṉká tímianai Sejuarnum jeauyayi. 31 Kame Sema shuari̱ṉkia ju̱ ármiayi. Tura aṉkant aṉkant matsamkar ní chichame̱nak tura ní nuṉke̱ni̱ṉ uunt péprun najankar matsamsarmiayi.
32 Kame ama̱a̱rak naṉkaamasmia nuya̱ṉka kanarar ashí nuṉkanam wéar matsamkarmiayi. Túrunawar nú aentsnumia̱ṉ untsurí pampaṉkarmiayi. Tura nú aentska Nuwái shuar ármiayi.