Náṉkammari̱
Yus Apramja̱i̱ chichaamu
12 Nuna yáunchuka Uunt Yus Apraman chicharuk
“Ame apá je̱e̱sha ame shuarumsha
tura nuṉkemsha ikiukim Wi nuṉkan iniaktustatjamna nui̱ wetá.
2 Amé shuarnak untsurí aents awajsattajme.
Tura amincha shiir awajeakun nuna uuntri̱ awajsattajme.
Nui̱ṉkia chíkich aents shiir awajin átatme.
3 Tura péṉkerja̱i̱ yumiṉkramainia núnaka péṉker pujutnum yumiṉkrartatjai.
Tura yajauchiji̱a̱i̱ yumiṉkramainia núnaka yajauchiniam yumiṉkrartatjai.
Kame amiiní̱ ashí nuṉkanam matsatainia núnaka shiir awajsartatjai” tímiayi Yus.
4 Yus timia asa Apramka Rautja̱i̱ Arannumia̱ jíinkiarmiayi. Nu tsawantiṉkia Apramka sataintiséṉku uwí takakuyayi. 5 Apramka ni nuwé̱ Sarain tura ni kaná uchirí̱n Ráutan núnisaṉ ni warirí̱ncha nuyá̱ Aran nuṉkanam pujus aentsun sumarmia nunasha weak mash yaruak Kanaan nuṉkanam wéar jeawarmiayi. 6 Tura Apramsha nu nuṉkan naṉkaikiar yujá yujakua Sekim péprunam jeawarmiayi. Nui̱ uunt numi Murái náartin wajauyayi. Kanaannumia̱ aents nú nuṉkanam matsamin ármiayi. 7 Tura nú nuṉkanam Uunt Yus Apraman wantintiuk “Amé shuaran jú̱ nuṉkan susattajai” tímiayi. Tutai Apramka Yus wantintiukma asa Yusan shiir awajeak nui̱ kayan irumar Uunt Yus shiir awajkur áestutai̱n najanamiayi. 8 Nuna tura ikiuak Apramka etsa̱ jintiainmaani̱ naint wájaruya̱ nuní̱ wémiayi. Tura nui̱ jutai̱ je̱a̱n je̱a̱mmiayi. Ni je̱a̱mmia nuya̱ṉka Pitir nuṉkaka etsa̱ akatainmaani̱ tura Aai nuṉkaka etsa̱ jintiainmaani̱ ámiayi. Nui̱ ajapén Apramka kayan irumar Yus shiir awajkur áestutai̱n najana Uunt Yusan áujsamiayi. 9 Nuna tura ikiuak Apramka Nekep nuṉkanam jeataj tusa nuí̱ pujuá nuyá̱ pujuá nuṉkaani̱ ajasmiayi.
Apram Ejiptunam pujusma
10 Tura Nekepnumka tsuka asamtai Apramka Ejiptunam pujustaj tusa wémiayi. 11 Nui̱ nuntumas ni nua̱ri̱n Sarain chicharuk “Nua̱ru, ámeka tí shiirmachitme. 12 Shíirmach asakmin Ejiptunmaya̱ aents ámin waitmakar ‘Au nua̱ri̱nti tusa aishri̱ mantuatai’ turutiartatui. Tura áminkia mantamtsuk ‘juramkitiaj’ turamartatui. 13 Tuma asamtai nua̱ru amiin mantamnawa̱i̱j ‘Winia umaruiti’ turuttia shiir awajtúsarat” tímiayi.
14 Nuna tinia Apramka nua̱ri̱ji̱a̱i̱ Ejiptunam jearmatai Ejiptunmaya̱ aents Sarain tí shiirmachin wáinkiarmiayi. 15 Núnisaṉ Parauṉka yaintri̱ peṉkeri̱ armia nusha Sarain wáinkiar wararsarmiayi. Túrawar nú nuwa̱n Parauṉka je̱e̱n júkiarmiayi.
16 Tura Parauṉsha ejeetim Saraikia Aprama umai̱nti tu enentáimias nuatkataj tusa wakera asa Apraman ti shiir awajmiayi. Peṉké ántar muriknasha waakancha ni takamtiktairi̱ncha kawaincha tura kamiyuncha mash suramiayi. 17 Tura Aprama nuwe̱n jurukín asamtai Yuska Parauṉnasha tura ni shuari̱ncha mash suṉkurmatkiakarmiayi. 18 Túrunamtai Parauṉ Apraman untsuk chicharuk “¿Urukamtai jú̱tikruam? ¿Urukamtai ame nua̱rmesha ‘winia nua̱ruiti’ turutchamam? 19 ‘Umaruiti’ tau asakmin ame nua̱rmin nuatrunkiakjame. Pai, yamaikia awaṉtajme. Nua̱ram jukim ju̱ya̱ṉka jiinkim wetá” tímiayi. 20 Parauṉka ni takarniúri̱n chicharainiak “Apram ni nuwe̱ja̱i̱ tura ashí wariri̱ntiuk Ejiptunmaya̱ yaruakrum kuákrum akupra ikiuutarum” tusa akuprámiayi.