Náṉkammari̱
Yus Apramja̱i̱ chícham najanamu
15 Nuyá̱ ukunam Uunt Yus Apraman ishí íkiajtiusaṉ ímiaja̱i̱k chicharuk
“Apramá, ashamkaipia,
tantarja̱i̱ ejaktinia áintsanak ejaajme.
Amincha nekas péṉker pujustinian amastatjai” tímiayi.
2 15:2-3 Tutai Apram Yusan aya̱k “Uunt Yusru, wi uchin takaktsujna nusha nékarme. Túmaisha amastájai túrutmena nu ¿itiura yáintkiattam? Winiaja chikichík uchiksha yajutmartin tsaṉkatrukchaitme. Tuma asamtai winia iniatai̱r Tamaskunmaya̱ Iriesér ashí takakjana núnaka nérentin ajastatui” tímiayi. 4 Takui̱ Uunt Yus Apraman aya̱k “Atsá chíkichkia nérentin ajaschattawai. Antsu ame nekas uchiram nérentin átatui” tímiayi. 5 Tura Uunt Yus Apraman “a̱a̱ jiinkitia” tinia chicharuk “Nayaimp nakaasa iisam yaa nekapmarianá. Wats jeakmeka nekapmarta. Yaa wáinmena imianú untsurí áme shuarumin awajsattajai” tímiayi. 6 Nuyá̱ Apramsha nekas nuna túrattawai tu enentáimias nekas enentáiji̱a̱i̱ Uunt Yusan enentáimtusmiayi. Tú enentáimkiui Yus “nekas péṉkeraitme” tímiayi. 7 Tura nú arant chicharuk “Witjiai Uunt Yus. Ju̱ nuṉkan amasan apujsatjam tusan Kartíu aentsnumia̱ Ur péprunmaya̱ jí̱i̱kin itiamiajme” tímiayi. 8 Tutai Apramsha Yusan aya̱k “Winia Uunt Yusru, ¿wariji̱a̱i̱ wisha jú̱ nuṉkan nekas pujursattajai tu enentáimsattaj?” tímiayi. 9 Tutai Yus chichaak “Waaka nuwa̱ tura chípiu nuwa̱sha murik áishmaṉ menaintiú uwí takakainia nu, tura yámpits uuntcha nuyá̱ uchichisha chikichik chikichik itiartiarta” tímiayi. 10 Tutai Apramka Yus timia nú taṉkun susataj tusa ikiankamiayi. Tura nú taṉkun namaṉke̱n Apramka jímiapetek nakar akanák íṉkiuasmak áeprarmiayi. Antsu yampitsnaka takamtsuk áeprarmiayi. 11 Túramunam chuaṉsha taṉkú namaṉke̱n káutainiakui Apramka kiik ashimiarmiayi.
12 Tura nú ki̱arai̱sha Apram ti kanarmiayi. Tura kanar tepái̱ ti kirit ajattsamiayi. Túrunamtai ti sapijmiakmiayi. 13 Nuyá̱ Yus Apraman chicharuk “Amé shuarum chíkich nuṉkanam yajá pujusártatna nuna paant ujajme. Tura nui̱ iniatai̱ tuke wáitsar kuatrusiántu uwí pujusártatui. 14 Tura Wisha amé shuarumin takamtikiu pujuartatna nú aentsun asutiáwartatjai. Túrunamtai amé shuarka tí kuitrintin ajasár aṉkant wéartatui. 15 Antsu ámeka nu itiurchatka wáintsuk tí uuntach ajasam jakattame. 16 Tura tí ukunam ame tiraṉmi tiraṉki̱ iwiaakainia nu yajá nuṉkanmaya̱ jú̱ nuṉkanam ataksha táartatui. Kame Amur aents jú̱ nuṉkanam matsatainia nu, ti yajauchin túrin áiniayat ataksha nú tunaarintin ajasár amuukartinia nunasha nékajai. Nu tsawant jeamtai amé shuarumin ataksha itiartatjai” tímiayi Yus.
17 Tura etsa̱ akaikí̱ kirit ajasmanum ji mukuintiuki̱ jiintimiayi. Núnisaṉ shiripik keá namaṉ ajapén nakakma tepearmia nuna ajapéri̱n naṉkaaman Apramka wáinmiayi. 18 Tura nú tsawantin Uunt Yus Apramja̱i̱ chichaman nájanuk
“Jú̱ nuṉkan ame shuarumin Ejiptu entsari̱ya̱
nuyá̱ juárkiniak uunt entsa Yúpratisa tímianai susattajai.
19 Kame Kiin aents nuyá̱ Kinis, Katmun 20 tura Jet, Píris, Repa, 21 Amur, Kanaan, Jírjis tura Jípius aentsu nuṉke̱n mash amasártatjai” tímiayi Uunt Yus.