Náṉkammari̱
Aprajám Awimiríkji̱a̱i̱
20 Tura Aprajámka ni pujamunmaya̱ jiinkí̱ Jirar péprunam pujustaj tusa Nekep nuṉkanam wémiayi. Kame Jirarka Káatish tura Shur ajapén étentamunmaiti. 2 Tura Aprajámka nui̱ pujus ni nuwé̱ Saran pachis “Ju̱ka winia umaruiti” tímiayi. Aprajám nuna takui̱ Jirar nuṉka úunt akupniuri̱ Awimirík Sará nuatkataj uturtitiarum tusa akupkámiayi. 3 Tura itiarmiánum kashi úunt akupin Awimiríkian Yus mesekranam chicharuk “Jakattame. Warí nuwa̱ nuatkataj támena nuka nuatkamuiti” tímiayi.
4 Tutai Awimirík nú nuwa̱n peṉké antiṉcha asa aya̱k “Tura winia Uuntru, ¿wikia yajauch túrachu ái̱ṉkik mantuataj tú enentáimturam? 5 Warí Aprajám ní nua̱ri̱niak chicharuk winia umaruiti turutchamka. Tura Sarasha áintsaṉ Aprajámka winia umaruiti títchamka. Tú tuíniakui nuna túrajai péṉker enentái takusan yajauchia núnaka peṉké túrachjai” tímiayi. 6 Tutai Yussha aya̱k “Péṉker enentáimji̱a̱i̱ túramna nuna ti paant nekaajai. Kame nú nuwa̱n nuatak Winí̱ tunaan túrawa̱i̱ṉ tusan tsaṉkatkachjame. 7 Yamaikia Aprajáma nuwe̱ awaṉtuktia. Túrakminkia nisha Yúsnan etserin asa ame iwiaaku pujustinian seatramtiatui. Antsu ni nuwe̱ awaṉtachkumka amesha tura amé shuarsha ashí jakattarme” tímiayi Yus.
8 Nuya̱ṉka Awimirík káshik nantaki̱ ni iniatairi̱n ashí untsukar mesekrampramuri̱n ujakármiayi. Tura nisha nuna antukar ti ashamkarmiayi. 9 Nuyá̱ Awimirík Aprajáman untsuk chichareak “¿Wisha warí yajauchinia túraj? ¿Warí itiurka asamtai winiasha tura wí akupeamunmasha Yusai̱sha makukratni̱ṉsam? Túramna nuka peṉké túrashtiniaiti” tímiayi. 10 Nu arantcha Awimirík Aprajáman chicharuk “¿Ju̱sha itiur enentáimsamea tímiam?” tímiayi.
11 Tutai Aprajám aya̱k “Jú̱ nuṉkanmaya̱sha Yusan enentáimtichu ásarmatai tura winia nua̱run wakeruiniak winia mantuawara̱i̱ṉ tú enentáimsan nuna tímiajai. 12 Nekasaiti winia aparu nawantri̱ asa Sáraka winia umaruiti. Túrasha chíkich nuwa̱nmaya̱iti. Tuma asamtai nin nuatkatniujai. 13 Tura ‘Ame nuṉkemíinia̱ jiinkitia’ Yus turutmia nui̱ Saran chicharkun ‘Ii tui̱ jeataji nui̱ṉkia “Winia umaruiti” turuttia’ timiajai” tímiayi Aprajám.
14 Nuya̱ṉka Awimiríksha Aprajáma nuwe̱n Saran awaṉtukmiayi. Tura awaṉtak muriknasha waakancha tura ni iniatairi̱n áishmaṉnasha nuyá̱ nuwa̱ncha suramiayi. 15 Tura nú arantcha chicharuk “Winia nuṉkar nui̱ awai, ame túa wakeram nu iisam achikta” tímiayi. 16 Nuyá̱ Sarancha chicharuk “Ame umai̱min súsaitjiana nuka mir kuit jeaiti. Núja̱i̱ṉ ashí aents ámiji̱a̱i̱ pujuinia nu ame yajauch awajnáschamun nekaawartatui. Chikichkiksha ámin yajauch áujmatramsatniun tujintkiartatui” tímiayi Awimirík.
17 20:17-18 Kame Saran júkin asamtai Uunt Yuska Awimiríkia nuwe̱ncha ni iniatairi̱ncha uchí takuchu awajsarmiayi. Tura Aprajám Yusan seatmia nui̱ Yus Awimiríkian péṉker awajsámiayi. Nuyá̱ ni nuwe̱ncha ántsaṉ ni iniatairi̱ncha ataksha uchin takusarat tusa Yus tsuararmiayi.