Náṉkammari̱
Aprajáman Yus nekapsamu
22 Nu naṉkaamasu ai̱ Yus Aprajáman nekapsataj tusa “Aprajámá” tutai Aprajám áimiuk “Jaá, ju̱i̱ pujajai” tímiayi. 2 Takui̱ Yus Aprajáman chicharuk “Ame uchiram Isak chikichkichik asamtai ti anenaitmena nu jukim Muríaj nuṉkanam wetá. Túram náintian Wi iniaktustatjamna nui̱ jeam Yúsnaiti tusam uchiram maam takamtsuk áesturata” tímiayi.
3 Tutai Aprajámka káshik nantaki̱ jinia nakar umpururi̱n áentsak Yus timia nú nuṉkanam uchirun takamtsuk áestuataj tusa wémiayi. Nui̱ wéak Aprajámka Isakan nuyá̱ jimiará iniatairi̱n aya̱rmiayi. 4 Tura menaintiú tsawant wekas Aprajámka wajas iimkiamá nu nuṉkan árantiaṉ wainkiamiayi. 5 Tura Aprajám ni takarniúri̱n chicharainiak “Átumka umpuruja̱i̱ ju̱i̱ pujú ajatarum. Tura wikia uchirja̱i̱ Yus tikishmátratai tusar wéaji. Túrar ataksha waketkir ju̱i̱ṉ tátatji” tímiayi. 6 Nuyá̱ Aprajámka Yus takamtsuk áestakur ikiamkatin nakashun Isakan ayankamiayi tura niṉkia kuchiin nuyá̱ jinia jukí̱ jímiarchik wéarmiayi. 7 Tura Isak jintiá wesa “Apawá” tutai “Waritia uchiru” takui̱ “Apawá íimsakia, nakashsha ántsarik jisha júaji tura Yus takamtsuk áestuatniusha muriksha ¿tui̱ wajá?” tímiayi Isak. 8 Tutai aparí̱ chicharuk “Uchiru, muriknaka Yusak amastatui” tu ái̱kmiayi. Nuna túkiar wéarmiayi.
9 Tura Yus timia nú nuṉkanam jeawar Aprajámka awaṉkar Yus áestutai̱n kayá irumar najana nui̱ nakashun patarmiayi. Nuya̱ṉka Yus áestutai̱niam nakash patarmanum ni uchirí̱n Isakan jiṉkiar patakmiayi. 10 Tura Aprajám kuchiiri̱n ukuiniak uchirí̱n ijiutaj tusa takurun 11 Yusa suntari̱ nayaimpinmaya̱ṉ Aprajáman untsúak “¡Aprajámá, Aprajámá!” tutai “Warinmea Uuntá” tímiayi. 12 Tutai Yusa suntari̱ Aprajáman chicharuk “Ame uchiram yajauch awajsaip. Warí yamaikia Yus nekas umiriamna nuna ti paant nékajai. Ame uchiram chikichik aak maam surustin suritrukchame” tímiayi.
13 Tutai Aprajám íimiaj tukamá murik áishmaṉ kachurí̱ji̱a̱i̱ numí kanawe̱n awaṉkemar wajan wainkiamiayi. Kame ni uchirí̱nkia máatsuk nu murikiun achik maa Yus áestutai̱niam patak Yusan shiir awajeak takamtsuk áestuamiayi. 14 Nu túruna asamtai Aprajámka nú nuṉka náari̱nkia “Uunt Yus Amaawiti”* tú anaikiamiayi. Tuma asamtai yamaiya̱ ju̱i̱sha “Uunt Yusa náintri̱nkia Yus amaawiti” tiniu áiniawai.
15 Nuyá̱ Uunt Yusa suntari̱ nayaimpinmaya̱ṉ ataksháa Aprajáman untsukmiayi. 16 Tura chicharuk “Yus chichartamuk ‘Wi Uunt Yus asan nekasan tájame, Winia enentáimtursam uchiram surustin chikichik aak suritrukcha asakmin 17 ti nekas shiir awajsattajme. Túran ame shuarumin nayaimpiniam yaa ti untsurí tura entsá naikim írunna imianú nukap awajsattajai. Tura nisha ni nemasri̱n tuke nupetin ártatui. 18 Tura ámeka Winia chichamur umirtuku asakmin ame shuarumji̱a̱i̱ tura ashí aents péṉker árat tusan péṉker awajsartatjai’ ” Yusa suntari̱ ujakmiayi.
19 Nuyá̱ Aprajámka ni iniatairi̱n apujkiarmia nui̱ waketkiar taar métekrak Pirshiwianam wéarmiayi. Tura Aprajámka nui̱ pujusmiayi.
Nakura uchirí̱ armia nu
20 Tura nú tsawant naṉkaamasu ai̱ ni yachi̱ Nakura nuwe̱ Mirka uchi takusman Aprajámnaka ujakármiayi. 21 Tura ni uchirí̱ṉkia ju̱ ármiayi, iwia̱i̱ri̱ṉkia Us nuna patái̱ Pus, nuya̱ṉka Kemuirauyayi. Kame Kemuirka Arama aparí̱yayi. 22 Kemuira patai̱sha Kíset, Asu, Pirtas, Jitraks nuyá̱ Pitiuir ármiayi. 23 Tura Pitiuirka, Riwikia aparí̱yayi. Kame Mírkaka ju̱ uchu uchin Nakurnan takusmiayi. Tura Nakurka Aprajáma yáchi̱ya̱yi. 24 Nu arantcha Nakurka apatkauyayi, ni naari̱ Reuma. Nui̱sha yajutmakmiayi. Nuna náari̱sha Tepa, Kajam, Tajas, tura Maaka ármiayi.