Náṉkammari̱

Isak nuatkatniun Aprajám sumarkamu

24 Kame Aprajámka tí nukap uwí pujá asa úuntach ajasmiayi tura Uunt Yus ashí yaya̱m shiir pujusmiayi. 2 24:​2-4 Aprajáman emka takarniúri̱ ni warirí̱n mash péṉker wáitniuya nuna chicharuk “Winia uchir Isakka Kanaannum wi pujajna ju̱yá̱ nuwa̱n nuatkat tusam tsaṉkatrutkaip. Antsu winia nuṉkarui̱ weme wí shuarnumia̱ nuwa̱k sumarturkata. Tura Uunt Yus nayaimpincha tura nuṉkancha nérentniua nu íimmianum támena nuna umirkattajme tusam makurui̱ wakenmaani̱ uwejém weartukta” tímiayi.

5 Tutai ni takarniúri̱ aya̱k “Tura nuwa̱ wean wainkiamaitiat winitniun nakitiakuisha ¿itiurkatjak? Antsu nui̱ṉkia uchirmin ame nuṉkemíin ¿jukimniakaitiaj?” tímiayi. 6 Tutai Aprajám ni takarniúri̱n chicharuk “Atsá, nú nuṉkanam jurutkip. 7 Warí Uunt Yus nayaimpin nérenniua nu, winia nuṉkaruí̱ya̱ tura wí shuarui̱ya̱ ji̱i̱rki̱ ju̱i̱ itiari chichartak ‘Pujamna jú̱ nuṉkan ame shuarumin susattajai’ turutchamkia. Nú Yusak ni suntari̱n ame wéamurmin eem akupkáttawai. Ni yaya̱muja̱i̱ winia uchir nuatkatin nú nuṉkanmaya̱ nuwa̱ itiarturtiatme. 8 Tura nuwa̱ winitniun nakitrámtaiṉkia nui̱ṉkia aṉkantaitme. ¡Antsu winia uchirka nú nuṉkanam peṉké jurutkipia!” tímiayi.

9 Nu tutai takarniusha ni uuntri̱ Aprajáma makui̱n wakenmaani̱ ni uwejé̱n wearkámiayi. Tura chichaak “Támena nuna nekas umirkattajme” tímiayi. 10 Nuyá̱ takarniusha ni uuntri̱ takaruya nuna ashí iis nekas péṉkeri̱ irunmia nuna ántar súsatniun nuyá̱ tias kamiyun jukí̱ wémiayi. Tura Misiuputámianam Aprajáma yachi̱ Nakur pujumia nú peprunam jeamiayi. 11 Nui̱ jeá Aprajáma takarniúri̱sha Nakura pépruri̱ á̱a̱ri̱n taurma yumirmat yantamach ni kamiyuri̱n tikishmátkiarar matsasmiayi. Kame nantu patamsamunam nuwa̱ yumin shikiktai tusar tuke tau ásarmatai túramiayi.

12 Tura nui̱ Yusan áujeak “Uunt Yusá, winia uuntru Aprajáma Yusri̱ntme. Winia úuntur Aprajám waitnentrata. Túram winiasha yáintkiata. 13 Nuwa̱ yumin shikiktai tusar tainiai̱ wikia ju̱i̱ṉ taurma yumirmatnum pujustájai. 14 Uunt Yusá, Isak nuatkatin tú nuwa̱ achikium nuka jú̱nis atí. Wi chicharkun ‘Entsa shikikiam surusta, umartaj’ títiatjai. Tutai nuwa̱ ái̱ruk ‘Ayu, amastajme tura kamiyurmincha aturtajme’ túrutkuiṉkia Isak nuatkatin achikiumna nuna paant nekaattajai. Núnisnak winia úuntur Aprajám waitnentramna nunasha nekaattajai” tú aujsamiayi.

15 Tura Aprajáma takarniúri̱ Yusan áujas umíatsa̱i̱ṉ nuwa̱ natsa entsan áimkiataj tusa yumiri̱n yakainium ekenka winian wainkiamiayi. Tura nu nuwa̱sha Pitiuira nawantri̱ Riwikiauyayi. Tura Pitiuirka Nakura tura Mirka uchirí̱yayi. Kame Nakurka Aprajáma yáchi̱yayi. 16 Tura Riwikiaka natsa tí shiirmachiyayi. Núnisaṉ áishmaṉja̱i̱sha peṉké tsaniṉchauyayi. Tura Riwikiaka taurma yumirmatnum we yumin áimiak waketmiayi. 17 Nuyá̱ yumin áimiak wáketun Aprajáma takarniúri̱ tsékeṉtki̱ amayá̱ṉ “Waitneasam ame yumirmiya̱n entsan umartaj surusta” tímiayi. 18 Tutai Riwikia aya̱k “Umarta uuntru” tímiayi. Tinia ni yumiri̱n yakainium ekenkamun wárik akaki̱ takuras áarmiayi. 19 Tura Aprajáma takarniúri̱ entsan umar umikmatai Riwikiaka chicharuk “Ame kamiyuram umartinniasha shikikiá uturiartájai ni wakeramun umararat tusan” tímiayi. 20 Nuna tinia wárik entsa aatai̱ tuntuipiniam entsan yará ikiuak ataksha yumin áimiak uturiarmiayi. Nuní̱ tura ashí ejematkiakmiayi.

21 Nuna túrakui Aprajáma takarniúri̱nkia túrataj tusan tarijnia nuna Uunt Yus yaintkiayi tú enentáimias chichatsuk wajas ii wajamiayi. 22 Tura Riwikiaka kamiyun entsan aar umikmatai Aprajáma takarniúri̱ aki̱i̱tiai̱ kuriji̱a̱i̱ najanamun kijintri̱ sikru ajapéri̱n jean tura jimiará pataken kuriji̱a̱i̱ najanamun kijintri̱ tias sikru naṉkaamas jean Riwikian susamiayi. 23 Tura Riwikian susa iniais chicharuk “¿Amesha yana nawantri̱ntiam? ¿Wi yarumkainiajna ju̱sha tura wi kanartincha ame apa je̱e̱n aṉkant áwash? Wait aneasam turuttia” tímiayi.

24 Nu tutai Riwikia áimiuk “Wikia Pitiuira nawantri̱ntjiai. Nukuchruka Mírkaiti tura apachruka Nakuraiti. 25 Nuyá̱ ii je̱e̱n átum kanartiṉkia aṉkant awai tura kamiyu yurumke̱sha ti núkap írunui” tímiayi.

26 Tura Aprajáma takarniúri̱ nu tutai nui̱ṉkia tikishmá Uunt Yusa náari̱n shiir awajuk 27 “Winia uuntru Aprajáma Yusri̱ya shíiraitme. Winia úuntur Aprajámja̱i̱ṉkia tuke péṉker túriniaitme tura tuke waitnenkartiniaitme. Tuma asam wi wekái̱ winia úuntur Aprajáma yachí̱ je̱e̱n ímiatrusmek itiarniume” tímiayi.

28 Tura Riwikiasha ashí túrunamia nuna ujaktajtsa nukurí̱i̱n tseke wémiayi. 29 24:​29-30 Tura Riwikia umái̱ Rapancha aki̱i̱tiai̱ kuriji̱a̱i̱ najanamu nuji̱niam akí̱an tura kuriji̱a̱i̱ patake najanamu patakeman wainkiamiayi. Tura nu aents nuní̱ túrutui tusa ni umái̱ étserman antuk Rapancha taurma yumirmatnumaani̱ tseke wémiayi. Nui̱ jeá Aprajáma takarniúri̱ kamiyuri̱ji̱a̱i̱ yumirmat ayamach wajainian wainiak 31 chicharuk “Uunt Yus shiir yaya̱mu ¿urukamtia a̱a̱sha wajam? Je̱á̱ wetái. Ame pujustinniasha tura kamiyu matsamsatniuncha iwiarajai” tímiayi.

32 Tutai Aprajáma takarniúri̱sha je̱á̱ wémiayi. Tura jearmatai Rapancha kamiyunam kijin áentskamuya nunasha ashí jusa aṉkant awajás kamiyun ayurkamamiayi. Nuyá̱ Aprajáma takarniúri̱ncha tura áishmaṉ niji̱a̱i̱ taarmia nunasha nawe̱n nijiararat tusa entsan súsarmiayi. 33 Tura yurumátin apujtusam Aprajáma takarniúri̱ chichaak “Wi chichaman takakjana ju̱na ujatskeka yurumáchminiaitjiai” takui̱ Rapan chicharuk “Wats ujatkata” tímiayi.

34 Tura nu tutai Aprajáma takarniúri̱ chichaak “Wikia Aprajáma takarniúri̱ntjiai. 35 Winia úuntrun Aprajáman Uunt Yus ti shiir awajás muriknasha waakancha kurincha kuítniasha kamiyuncha tura umpuruncha ántsaṉ iniatairi̱ncha susa kuítrintin awajsaiti. 36 Tura nú arantcha ni nuwe̱ Sara tí uuntach ajasunak uchi takustinniasha súsaiti. Tuma asa winia úuntur Aprajámka ashí ni achíakmari̱n ni uchirí̱n ikiurkitniuiti. 37 24:​37-38 Winia úuntur Aprajámsha ti paant chichartak ‘Winia uchirka wi pujajna jú̱ nuṉkanmaya̱ Kanaan nuwa̱n nuatkati tusam tsaṉkatrutkaip. Antsu winia nuṉkarui̱ wí shuar matsatainia nui̱ weme nuyá̱ nuwa̱ wainkiam winia uchir nuatkatin itiarturtia’ turutmiai. Túrutkui Yus íimmianum ‘nekas umirkatjame’ timiajai. 39 Tura winia úuntur nuna túrutkui wi chichaakun ‘Winia uuntru, nuwa̱ winí̱ nemaki̱ tátinian nakitrámtaisha ¿itiurkatjak?’ timiajai. 40 Tutai winia úuntur chichartak ‘Wisha Uunt Yusja̱i̱ tuke wekasaitjiai. Tuma asamtai ámin wi tájamna nu péṉker uminkiat tusa ni suntari̱n akuptúrmaktatui. Túrunamtai winia aparu shuari̱ pujuinia nuyá̱ nuwa̱ winia uchir nuatkatin itiarturtia turutmiai. 41 Antsu wi shuarnum jeawakmin nuwa̱n suritramkarmatai̱ṉkia Yus íimmianum wi tájamna nuya̱ṉka aṉkant átatme’ turutmiai. 42 Tura ju̱ ki̱arai̱ taurma yumirmatnum tana Uunt Yusan áujkun ‘Winia uuntru Aprajáma Yusri̱ya, wi túratniuitjiana nu Ame jintintrakminkia jú̱nis túrunati. 43 Ju̱i̱ taurma yumirmat ayamach wajajna ju̱i̱ nuwa̱ natsa yumí shikiktajtsa taa entsan shikik wáketkui “Ame yumirmiya̱n entsan umartaj surusta” titiajai. 44 Tura wi nuna tutai ni ái̱ruk “Ayu, umarta tura ame kamiyurmincha entsa áartinniasha uturtiájai” tana nú nuwa̱ winia úuntur Aprajáma uchirí̱ nuatkat tusam achikman nekaattajai’ tú timiajai. 45 Tu tinia Yusan áujsan umíatsa̱i̱ṉ Riwikia ni yumiri̱n yakai̱nium ekenka winiaiti. Tura entsan áimiak wáketun chicharkun ‘Waitneasam entsa júamna nu surusai’ tijiai. 46 Tura nu tutai tí warik yumi yakai̱nium ekenkamun nuṉká apujas chichartak ‘Pai, entsa umarta tura ame kamiyuram umartinniasha entsan shikikian uturiartájai’ tu tinia entsan surusai. Núnisaṉ winia kamiyurnasha entsá umartinian suruttsarai. 47 Túramtai anintrakun ‘Amesha ¿yana nawantri̱ntiam?’ tutai ni chichartak ‘Wikia Pitiuiran nawantri̱ntjiai. Tura Nakura nuyá̱ Mirka tiraṉki̱ntjiai’ túrutui. Nuna túrutkui aki̱i̱tiai̱ kuriji̱a̱i̱ najanamun nuji̱niam akiimtikian jimiará patakencha patakeajai. 48 Nuna túran Yus jintiá péṉker waitkia asamtai ímia uuntru yachí̱ nawantri̱n uuntru Aprajáma uchirí̱ nuatkatniun iniaktursayi. Tuma asamtai winia uuntru Aprajáma Uunt Yusri̱n tikishmátran yúmiṉkiakun shiir awajsájai. 49 Kame winia úuntur nekasa nuja̱i̱ waitnentrutakrumka yamaik paant ‘ee’ nuíchuka ‘atsá’ turutiarum. Wisha nekaataj tusan wakerajai” tímiayi.

50 Nu tutai Pitiuirsha tura Rapancha aimiainiak “Ame támena nusha Úunt Yusai̱ya̱nchukait. Ayu títincha tura atsá títincha íiniuchuiti. 51 Wats Riwikiaka ju̱i̱ pujawai. Jukim wetá. Yus túramna núnis úuntrum Aprajáma uchirí̱ nuatkati” tiármiayi.

52 Aprajáma takarniúri̱ nuna antuk tikishmar nuṉká piniakumar tepes Uunt Yusan shiir awajsámiayi. 53 Nuya̱ṉka ni atakmattsamun kurincha kuítniasha tura pushincha Riwikian jusa susamiayi núnisaṉ Riwikia nukurí̱ncha tura umai̱ncha súsatniua nuna ántraṉ súsarmiayi. 54 Tura Aprajáma takarniúri̱sha nuyá̱ niji̱a̱i̱ taarmia nusha nui̱ṉkia warasar yurumáwar kanararmiayi. Tura kashin tsawa̱rar Aprajáma takarniúri̱ “Yamaikia winia uuntru je̱e̱n waketkitin tsaṉkatrukta” tímiayi.

55 Tura Aprajáma takarniúri̱ nuna takui̱ Riwikia nukurí̱sha tura umai̱sha chicharainiak “Antsu tuke Riwikia iiji̱a̱i̱ tias tsawant pujusti nuya̱ṉka jukimnium” tiármiayi. 56 Tuíniakui Aprajáma takarniúri̱ áimiuk “Antsu nuka wait aneasrum turutirap. Wi péṉker tátinian Yuska tí peṉker yaintkiayi. Tuma asamtai tsaṉkatruktarum uuntrui̱ waketkitiaj” tímiayi. 57 Aprajáma takarniúri̱ nuna takui̱ nisha aimiainiak “Wats nui̱ṉkia Riwikia untsuktai nisha wariṉtiṉ” tiármiayi. 58 Tura Riwikian untsuk aniniak “¿Amesha Aprajáma takarniúri̱ wáketkui yamaik wétin wakeramek?” tiármiayi. Tutai Riwikia áimiuk “Ee wetajai” tímiayi. 59 Tura nuna takui̱ Rapan ni umái̱ Riwikian tura nin wainiak tsakatmaruya nuja̱i̱ akupkámiayi. Núnisaṉ Aprajáma takarniúri̱ji̱a̱i̱ tura niji̱a̱i̱ taarmia nunasha áujsar akupkarmiayi. 60 Tura Riwikian akupénak shiir pujutnum yumiṉkiainiak

61 Nui̱ṉkia Riwikiasha tura nin wainiak tsakatmarmia nusha kamiyunam ekemkar Aprajáma takarniúri̱ wéakui nemaki̱ wéarmiayi. Nuní̱ Aprajáma takarniúri̱sha Riwikian jukí̱ waketkimiayi.

62 Tura Isakka Nekepnum pujá asa “Yus Iwiaakna tura Iirna Nu” tu anaikiamuya nú yumirmatnum we winimiayi. 63 Nuyá̱ Isaksha kí̱arai̱ jiinkí̱ enentáimia wekas kamiyu wininian wainkiamiayi. 64 24:​64-65 Núnisaṉ Riwikiasha jintiá wínisaṉ íimiaj tukamá Isakan wainiutakmiayi. Tura Aprajáma takarniúri̱n anintrak “Ii wéamunmaani̱ winiana ausha ¿yait?” tutai Aprajáma takarniúri̱ aya̱k “Winia úuntur Isakaiti” tímiayi. Nuna takui̱ Riwikiaka kamiyunmaya̱ akaikí̱ tarachin jusa yapi̱n nukukmiayi.

66 Tura Aprajáma takarniúri̱sha Isakan ashí ni túrunamia nuna ujakmiayi. 67 Nuyá̱ Isakka ni nukurí̱ Sará je̱e̱n Riwikian jukimiayi. Tura nuatak ti anea asa ni nukurí̱ jaka asamtai kúntuts pujamunka asakmarmiayi.