Náṉkammari̱

Jakup Rakirja̱i̱ wainniaiyamu

29 Nuyá̱ Jakup Pitiran ikiuak etsa̱ jintiainmaani̱ aents matsamármia nuní̱ wémiayi. 2 Tura wesa taurma yumirmatan wainkiamiayi. Kame nú entsanam murik aatai̱ asa menaintiú akantrámu matsamiayi. Tura taurma yumirmatka kaya uuntja̱i̱ etektukmauyayi. 3 Tura murik iruntramtai murikiun wáinniuka aartai tusa kayan uratkar ain ármiayi. Tura ni murikrí̱n entsan aasua umik nú yumirmatan ataksha kayaja̱i̱ etektuk ikiú ármiayi. 4 Nuya̱ṉka Jakup murikiun wáinin armia nuna aniniak “Yatsuru atumsha ¿tuya̱mpaitrum?” tutai “Iikia Arannumia̱itji” tiármiayi. 5 Tura anintrak “¿Nakura uchirí̱ Rapan nékarmek?” tutai “Ee, nékaji” tiármiayi. 6 Tuíniakui Jakup chichaak “¿Péṉkerak pujá?” tutai “Ee, Rapanka péṉker pujawai. Tura ni nawantri̱ṉkia Rakirka murikiun yaruaki̱ winiana áuwiti” tiármiayi.

7 Tutai Jakup chichaak “Tsawantka wau kí̱i̱shtaiti. ¿Urukamtai wau kí̱i̱chat ai̱sha entsa áakrum ayuratai tusarum yarumtsuram? Warí murik wenuknum awayá̱r epentinkia wáuchuiti” tímiayi. 8 Kame nu tutai aimiainiak “Ame támena nu túrachminiaitji. Warí, ashí murikiun ikiankarmatai kaya jurusar entsa aartai tusar nákasartiniaitji” tiármiayi. 9 Tura Jakupka niji̱a̱i̱ chicháa wajainiai̱ṉ Rakirka aparí̱ murikrí̱n wáinin asa yaruaki̱ támiayi. 10 Túrunamtai Jakupka ni iichri̱ Rapana nawantri̱n Rakira wainiak taurma yumirmat kayaja̱i̱ etektukma amia nuna uratak ni iichri̱ murikrí̱n entsan árarmiayi. 11 Tura Jakupsha Rakiran amikmak mukuná kakantar útmiayi. 12 Nuyá̱ chichaak “Wikia Riwikia uchirí̱ntjiai tura Rapanka áwe̱ntjai” takui̱ Rakirka nuna antuk tsékeṉki̱ we aparí̱n ujakmiayi. 13 Nu ujakam Rapan ni umái̱ uchirí̱n Jakupan iṉkiuṉtaj tusa tseke werimiayi. Tura iṉkiuṉ miniakak mukuná je̱e̱ní̱ jukimiayi. Nui̱ Jakup ni urukamia nuna mash ujakmiayi. 14 Tura Rapan chichaak “Warí ámeka chíkich shuarchaitme antsu nekas wí shuaraitme” tutai Jakupsha chikichík nantu Rapanai̱ pujusmiayi.

Jakup Rían tura Rakiran nuatma

15 Nuya̱sha Rapan Jakupan chicharuk “Kame wi shuar asamek ¿ántram yáintkiatam kame urutmá akirkai tusam wakeram? turuttia” tímiayi. 16 Kame Rapana nawantri̱ṉkia jímiarauyayi, iwia̱i̱ri̱ṉkia Ría tura nuna patai̱ṉkia Rakirauyayi. 17 Tura Ríaka jí̱chiri̱ṉ shíirmachiyayi antsu Rakirka takamtsuk tí shiirmachiyayi. 18 Kame Jakup Rakiran anea asa chichaak “Ame nawantrum uchichia nuna Rakiran nuatkataj tusan siati uwí takarsatjame” tímiayi. 19 Nu tutai Rapan chicharuk “Chikichniaka sútsuk antsu imiankaska ámin amastájai. Wats nui̱ṉkia wiji̱a̱i̱ pujusta” tímiayi.

20 Nuní̱ tutai Jakup Rakiran nuatkataj tusa siati uwí Rapanan takarsamiayi. Kame Jakup Rakiran ti anea asa siati uwincha ishichik tsawanta núnis enentáimtusmiayi. 21 Nuya̱ṉka tsawant jeamtai Jakup Rapanan chicharuk “Yamaikia nawantrum surusta nuatkataj. Warí siati uwí ámin takarsan umirkachjamek” tímiayi.

22 Nuya̱ṉka Rapan ashí ni írutramuri̱n nuatma nampernum ipiaawarmiayi. 23 Tura nú kashi Rapan Rían jukí̱ Jakup tepamunam aeprumiayi. Tura Jakupsha Ríaja̱i̱ tsaniṉ kanarmiayi. 24 Nuyá̱ Rapan nuwa̱ Sérpan ni takamtiktairi̱n nawantri̱n Rían takarin atí tusa susamiayi. 25 Túrasha kashin tsawa̱r Jakup Ríaja̱i̱ tsaniṉkia kanarman nekaamiayi. Nuna nekáa Rapanan chicharuk “¿Ausha urukamtai áitkiaram? Wikia Rakiran nuatkashtaj tusanak ámin takatan yáiṉmajam. ¿Urukamtia anisha anaṉkruam?” tímiayi.

26 Nu tutai Rapan chicharuk “Warí ju̱yá̱ shuartikia iwiá̱i̱ nuatmamtiktsukka patai̱ṉkia nuatmamtikchaitji. 27 Antsu Ríaja̱i̱ tsaniṉma chikichík tumiṉ ejeeta túrawakmin ataksha siati uwí takarsatjame tákumni̱ṉkia Rakirnasha amastájai” tímiayi. 28 Tura Jakupka Rapan timia núnisaṉ Ríaja̱i̱ tsaniṉmán chikichík tumiṉ ejemtai Rapan Rakirnasha susamiayi. 29 Núnisaṉ Rapan ni takarniúri̱n Píran ni nawantri̱n Rakira takarniúri̱ atí tusa susamiayi. 30 Tura Jakupsha Rakiran nuatak Ríaja̱i̱ naṉkaamas aneemiayi. Nuyá̱ ataksha siati uwí Rapanan takarsamiayi.

Jakupa uchirí̱ akiiniawarma

31 Kame Jakup ni nua̱ri̱n Rían nakitiamun Uunt Yus nekáa uchi takustinian tsaṉkatkamiayi. Antsu Rakirka uchin takuchuyayi. 32 Ríaka ajapruk uchin takusmiayi. Tura takus Ruwin anaikiamiayi. Nekas Yus winia kúntutsrun nekartuayi uchirtin asamtai yamaikia winia áishur anentiatui, tú enentáimias uchirí̱nkia Ruwin anaikiamiayi.

33 Nuyá̱ ataksha Ríaka ajapruk uchin takusmiayi. Takus “winia áishur nakitrámun Uunt Yus anturtukai. Tuma asa chíkich uchin takustinian surusai” tú enentáimias Semiun anaikiamiayi. 34 Tura ataksha Ríaka takus chichaak “Yamaikia winia áishur wiji̱a̱i̱ tsaniṉ pujustatui. Warí yamaikia menaintiú uchin takursachjak.” Tú enentáimias Riwí anaikiamiayi. 35 Núnisaṉ ataksha Ríaka takus yamaikia Yusa náari̱n shiir awajsattajai tusa Jutá anaikiamiayi. Nuya̱ṉka uchi takustinian iniaṉnakmiayi.