Náṉkammari̱

Esaú shuari̱

36 Ju̱ka Esaú shuari̱nti (ni chíkich náari̱ṉkia Etum). 2 Esausha Kanaannumia̱ nuwa̱n Áatan tura Auripiáman nuatkamiayi. Áatasha Jet aents Iriuna nawantri̱yayi tura Auripiámasha Aná nawantri̱yayi tura Jep aents Sepiuna tiraṉki̱yayi. 3 Tura nu arant Ismaera nawantri̱n Pasemátan nuatkamiayi. Nisha Nepayúta umai̱yayi. 4 Esauka Áatai̱ṉkia Eripiásan tura Pasemátai̱ṉkia Reueran 5 tura Auripiámai̱ Jiushan, Jaaraman tura Kuraincha yajutmakmiayi. Kame Esaú uchirí̱ armia nuka Kanaannum akiiniawarmiayi.

6 Kame Esaú ni nua̱ri̱ji̱a̱i̱ uchirí̱ji̱a̱i̱ nawantri̱ji̱a̱i̱sha tura ashí niji̱a̱i̱ pujuarmia nusha ni yachi̱ Jakupai̱ya̱ kanakí̱ yajá nuṉkanam wéarmiayi. Kanaannum pujus ni warirí̱ncha tura taṉkuri̱ncha takakuya nuna ashí yarumak wémiayi. 7 Kame mái̱ metek warirí̱ṉkia tí nukap ásarmatai tsaniṉkiar pujustinian tujintkiarmiayi. Tura nú naṉkaamas taṉku matsastincha nuṉka aṉkant atsumiayi. 8 Tuma asamtai Esaú, chíkich naari̱ Etum, Sair nuṉkanam mura armia nui̱ pujustaj tusa wémiayi.

9 Esauka Etum aentsu apachri̱yayi. Nú shuarka naintiar naintiar nuṉkanam Sáirnum pujú ármiayi. 10 Kame Esaú shuari̱ naari̱ ju̱ áiniawai, ni nua̱rí̱ Aatai̱ Esaú Eripiásan yajutmarmiayi. Chíkich nua̱ri̱n Pasemátai̱ Reueran yajutmarmiayi. 11 Nuyá̱ Eripiása uchirí̱ṉkia ju̱ ármiayi, Teman, Aumar, Sepu, Eṉkatám, tura Kenas. 12 Tura Eripiássha chíkich nuwa̱n apatkamiayi, nuna náari̱ṉkia Timna. Nisha uchin takus Amarík anaikiamiayi. Nusha Esaú uchirí̱ Aatai̱ yajutmakma áiniawai. 13 Esaú nua̱rí̱ Pasemátai̱ya̱ Reuera uchirí̱ṉkia Naat, Tsera, Sama tura Misia ármiayi. 14 Esaú chíkich nua̱rí̱ Auripiám takusmaka Jiush, Jaaram tura Kurái ármiayi. Tura Auripiámka Aná nawantri̱yayi núnisaṉ Ana Sepiuna uchirí̱yayi.

15 Nuyá̱ Esaú wea úuntri̱ṉkia ju̱ ármiayi. Kame Esaú iwia̱i̱ri̱ Eripiása uchirí̱ṉkia ju̱ ármiayi, Teman, Aumar, Sepu, Kenas, 16 Kurái, Eṉkatám tura Amarík. Nisha Aata tiraṉki̱ ármiayi tura Etumnum pujuarmiayi. Tura Eripiás aents ásar ní weak úuntrintin ármiayi.

17 Tura Esaú uchirí̱ Reuera uchirí̱ṉkia ju̱ ármiayi, Naat, Tsera, Sama tura Misia. Nisha Pasemáta tiraṉki̱ ármiayi tura Etumnum pujuarmiayi. Nusha Reuer aents ásar ní weak úuntrintin ármiayi.

18 Tura Aná nawantri̱ Auripiám Esaú chíkich nua̱rí̱ uchirí̱ṉkia ju̱ ármiayi, Jiush, Jaaram, tura Kurái. Nisha Auripiám aents ásar ní we̱a̱k úuntrintin ármiayi.

19 Nusha ashí Esaú uchirí̱ṉ ármiayi. Ni chíkich náari̱ṉkia Etumauyayi. Kame nuka mash ni shuari̱ uuntri̱ ármiayi.

Saira shuari̱

20 36:​20-21 Tura Jur aents Saira tiraṉki̱ uuntri̱ Etumnum tuke pujú armia nuka Rutan, Supar, Sepiun, Aná, Tesun, Eser tura Tesan nu ármiayi. 22 Nuyá̱ Rutana uchirí̱ṉkia Auri tura Iman ármiayi. Tura Tímnaka Rutana umai̱yayi. 23 Núnisaṉ Supara uchirí̱ṉkia Arpan, Manaat, Epar, Sepu tura Aunam ármiayi. 24 Nuyá̱ Sepiuna uchirí̱ṉkia Ayas tura Aná ármiayi. Anaka kampuntin atsunum ni aparí̱ umpururi̱n wáiniuk pujus púkuninmaya̱ entsa tsuéran wainkiamiayi. 25 Tura Aná uchirí̱ṉkia Tesun nuyá̱ nawantri̱ṉkia Auripiámauyayi. 26 Núnisaṉ Tesuna uchirí̱ṉkia Imtan, Espan, Itran tura Kirian nu ármiayi. 27 Esera uchirí̱ṉkia Pirjan, Saapan tura Akan nu ármiayi. 28 Tesana uchirí̱sha Us tura Aran ármiayi.

29 Kame Jur aentsu úuntri̱ṉkia ju̱ ármiayi, Rutan, Supar, Sepiun, Aná, 30 Tesun, Eser, tura Tesan. Nisha Jur aentsu uuntri̱ Sáirnum pujuarmiayi.

31 Israer shuarnumka úunt akupin atsa̱i̱ṉ Etumnumka ju̱ úunt akupin ármiayi. 32 Piura uchirí̱ Pira Etumnum akupniuyayi tura niṉkia Tiniapa péprunam pujuyayi. 33 Pira jakamtai Tserá uchirí̱ Jupap Pusra péprunam úunt akupin ajasmiayi. 34 Jupap jakamtai Temanmaya̱ Úusam úunt akupin ajasmiayi. 35 Úusam jakamtai Awit péprunmaya̱ Pitiata uchirí̱ Atat úunt akupin ajasmiayi. Pitiatcha Muápnum Matian aentsun mesetnum nupetkarmiayi. Atata pépruri̱ṉkia Awitiauyayi. 36 Atat jakamtai Masrikia péprunmaya̱ Sampra úunt akupin ajasmiayi. 37 Sampra jakamtai Saur úunt akupin ajasmiayi. Saurka Rijupút pepru Entsá ayamach pujuyayi. 38 Saur jakamtai Ákpura uchirí̱ Paaranán úunt akupin ajasmiayi. 39 Ákpura uchirí̱ Paaranán jakamtai Pau péprunmaya̱ Atar úunt akupin ajasmiayi. Ni nua̱ri̱ṉkia Mijitiapírauyayi. Nisha Matritia nawantri̱ tura Misaapa tiraṉki̱yayi.

40 Kame Esaú shuar mátsatkamusha tura nuṉke̱sha tura náari̱sha ju̱ áiniawai, Timna, Arpa, Jetet, 41 Auripiáma, Ira, Piniun, 42 Kenas, Teman, Mípsar, 43 Maktiar tura Iram. Nuka Etum nuṉkanam uuntri̱ ármiayi. Tura ní nuṉke̱ni̱ṉ akupin ármiayi. Kame Esaú chíkich náari̱ṉkia Etum asa Etum aentsu aparí̱yayi.