2 Samuir

Ispushét maamu

4 Ápnerka Eprunnum jákaiti táman Saura uchirí̱ Ispushét antuk kakarmachu nekapramiayi tura Israer shuarsha ashí sapijmiakarmiayi. 2 Saura uchirí̱ṉkia jimiará aishmaṉkan suntara úuntri̱n takakuyayi. Ni náari̱ṉkia Paana tura chíkichkia Rekap. Pirutnumia̱ Rimiuna uchirí̱ ásar Piṉjiamínia shuari̱ ármiayi. (Kame Pirutka Piṉjiamín shuara núṉkente tiniu ármiayi. 3 Kame Pirutnumia̱ shuarka pisarar Jitiaimnium wéarmiayi tuma ásar írara núnisar yamaisha nui̱ṉ matsatainiawai.)

4 Kame Saura uchirí̱ Junatánka uchi tunamárun takakuyayi. Saurka Junatánja̱i̱ jákaiti tama Jisriirnumia̱ chícham antukamia nui̱ṉkia uchi seṉku uwí takakuyayi. Nuna antuk nuwa̱ uchí wáinin uchin achik pisarmiayi. Kame pisak wárik wéaj tukamar uchin aju̱a̱rmiayi. Túruna shutuap juákmiayi. Ni náari̱ṉkia Mijipiusétauyayi. 5 Pirutnumia̱ Rimiuna uchirí̱ Rekapka Páanaja̱i̱ wéar étsa̱ka ti kakantar etsanmanum Ispushétka tutupin ai̱ yurumá áyameak je̱e̱n kanú tepan jeariármiayi. 6 Tura nekaata, je̱a̱ wáinin tríkiun ipiantainiai̱ kanarmatai Rekapka ni yachi̱ Páanaja̱i̱ je̱a̱ init waya̱warmiayi. 7 Tura Ispushéta peakri̱n tepan utuawar íjiuar máwarmiayi. Máwar muuke̱nka tsupirak juruiniak Arapá jintianmaani̱ weká wekakua tsawa̱rarmiayi. 8 Ispushéta muuke̱n júkiar Tawit pujamunam Eprunnum jeawarmiayi. Tura úunt akupniun chicharainiak “Nekaata, ame nemasrum Saur ámin mantamataj timia nuna uchirí̱ Ispushéta muuké̱ ju̱á. Kame yamái winia úuntur úunt akupniun Sáurai̱ya̱ tura ní shuari̱ya̱ Uunt Yus yapajmiátkayi” tiármiayi.

9 Tuíniakui Pirutnumia̱ Rimiuna uchirí̱ Rekapan ni yachi̱ Páanaja̱i̱ Tawit chicharainiak “Ashí itiurchatnumia̱ winia iwiaakmarun uwemtikin Uunt Yuska iwiaakui. 10 Warí, chikichik aents péṉker chichaman ujaktaj tu enentáimias chichartak ‘Saurka jákaiti wi achikian Sekraknum maajai’ takui̱ nú péṉker chicham ujatkámunam akíakun itiurkámaj. 11 Núnaka túrayatnakek netse aents nekasa nuja̱i̱ métek túrinian ni je̱e̱n peakri̱i̱n kanú tepan máwarunka pachischartataj. Antsu yamaikia wisha núnisnakka ¿yapajkianka ju̱ nuṉkanmaya̱ṉka emeṉkákchartajtsuka?” tímiayi. 12 Nuya̱ṉka Tawit natsan mátarum tusa akupkarmiayi túram máwarmiayi. Túrawar uwejé̱ncha tura nawe̱ncha tsupirar Eprunnum entsa pajamtainiam ayamach nenawarmiayi. Antsu Ispushéta muuke̱nka júkiar Eprunnum Ápner iwiarsamuya̱ nui̱ iwiarsarmiayi.