1 Akupin
Israer nakakamu
12 Nuya̱ṉka Rupuam úunt akupin awajsar ekentsatai tusar ashí Israer shuarsha Sekim nuṉkanam wéarmatai nisha Sekimnum wémiayi. 2 Tura úunt akupin Saramúṉ mátaj tutai Nawata uchirí̱ Jirupuám Ejiptu nuṉkanam pisarmia nu nuna antuk Ejiptunmaya̱ waketkimiayi. 3 Nui̱ṉkia Jirupuáman tatí tusar untsukarmiayi. Tura ashí Israer shuarja̱i̱ irunar káunkar Rupuaman chicharainiak 4 “Ame apa ti itiurchat takatja̱i̱ wáitkiarmamiaj nu ame yamaikia nu itiurchatja̱i̱ wáitiamunmaya̱ aṉkant awajkartusta. Nu túrawakmiṉkia ámin takarin ajasártatji” tiármiayi. 5 Nu tutai Rupuam chicharainiak “Waketkitiarum tura menaintiú tsawant pujusrum ataksha taruttiarum” tímiayi. Tutai ashí shuar pujuarmia nusha waketkiarmiayi.
6 Nuya̱ṉka úunt akupin Rupuam ni aparí̱ Saramúṉ iwiaakuya nui̱ nin takarin uunt armia nuna anintruiniak “Ju̱ aentsun warí tiártataj nu turuttiarum” tusa seawarmiayi. 7 Takui̱ nisha aimiainiak “Amesha yamái ju̱ aentsu takarniúri̱ ajasam yaiṉkiartajtsam péṉker áimkiumni̱ṉkia nisha tuke ámin takartámin ajasártatui” tiármiayi. 8 Túrasha uunt armia nuna chichame̱nka anturtsuk antsu natsa niji̱a̱i̱ métek tsakaku ni takarin pujuarmia nuna aniasarmiayi. 9 Tura chicharainiak “Ju̱ aents chichainiak ‘Ame apa takatja̱i̱ wáitkiarmasmiaj nuyá̱ yamaikia ame aṉkant awajkartusta’ turutainia ju̱nasha warí tiártataj atumsha ¿waritia enentáimprum?” tu aniasarmiayi. 10 Tutai natsa armia nu áiniak “Aents chichartamainiak ‘Ame ápaka takatja̱i̱ wáitkiarmasmiaji tura yamaikia ámeka ayamtikiarturta’ turamainiatsuk. Túrasha ámeka chicharainiakum ‘Winia tsara uwejur uchichia nusha winia aparu yakaiji̱a̱i̱ṉkia naṉkaamas úuntaiti. 11 Tuma asamtai winia aparka takatja̱i̱ wáitkiarmasmiarme túrasha wikia nuna naṉkaamas takamtiksattajrume. Núnisaṉ winia aparka chapikji̱a̱i̱ asuttiámamiarme túrasha wikia titiṉji̱a̱i̱* asutiáttajrume’ tiartá” nátsaka tiármiayi.
12 Nuya̱ṉka úunt akupin Rupuamsha menaintiú tsawantin taruttiarum tiniu asamtai Jirupuámka ashí Israer shuarja̱i̱ iruntrar Rupuaman tariarmiayi. 13 Kame ni takarin uunt armia nu jú̱nisam nu aentska tiartá timianka iniais úunt akupin Rupuamka shuar nui̱ káunkarmia núnaka kakanchim ái̱kiarmiayi. 14 Natsa tiarmia núnisaṉ chicharainiak “Winia aparka takatja̱i̱ wáitkiarmasmiarme túrasha wikia nuna naṉkaamas takamtiksattajrume. Núnisaṉ winia aparka chapikji̱a̱i̱ asuttiámamiarme túrasha wikia titiṉji̱a̱i̱ asutiáttajrume” tiármiayi. 15 Tura úunt akupniusha Israer shuar tiarmia nuna anturkacharmiayi. Warí Uunt Yus Siru péprunmaya̱ Ajíasan akatar Nawata uchirí̱ Jirupuáman ujakmia nu uminkiati tusa túrunamiayi.
16 Nuiṉkia ashí Israer shuar ni searmia nu anturkacharam nisha chichainiak
“Iisha Tawitji̱a̱i̱sha ¿warí íistiniaitiaji?
¡Isái uchirí̱ Tawitia shuari̱ṉkia iiniu átinkia peṉké atsawai!
¡Israer shuartirmeka atumí je̱e̱n waketkitiarum!
¡Yamaikia Tawitia, amé shuarak Iistá!”
Nui̱ṉkia Israer shuarka ni je̱e̱ni̱i̱ṉ waketrarmiayi. 17 Túrasha Rupuamka Jutá nuṉka pépruri̱n Israer shuar matsamármia nui̱ úunt akupin ajasmiayi. 18 Nuyá̱ akupin Rupuam, Aturaman akupniu takarniúri̱ uuntri̱ asamtai akupkámiayi. Túrasha ashí Israer shuar kayaja̱i̱ tukurar máwarmiayi. Nuna túrawarmatai akupin Rupuamsha pisar Jerusaréṉnum wétaj tusa wáuras káruri̱n eṉkempramiayi. 19 Nuní̱ túrunawarmia tímianaiya̱ṉ yamaiya̱ ju̱i̱sha Israer shuarka Tawitia shuari̱ji̱a̱i̱ṉkia kanakiaruiti. 20 Nuyá̱ Israer shuarka Jirupuám waketki̱ tayi táman ashí antukarmiayi. Tura iruntrar matsatainia ásar untsukar támatai ashí Israer shuarnum úunt akupin awajsarmiayi. Tura Tawit aentsnaka peṉké nemarkacharmiayi. Áyatik Jutá weanmaya̱ṉ Tawit aentsnaka nemarkarmiayi.
Rupuam Israer shuaran mesetan jurusiat iniaisámu
21 Nuyá̱ Rupuamka Jerusaréṉnum jeá Jutá tura Piṉjiamín weanmaya̱n siantu uchaintia mir suntaran mesetan unuimiátkaru juurma armia nuna irurmiayi. Núnaka Israer shuar mánaikiar Saramúṉka uchirí̱ Rupuam akupeamuri̱n awaṉtumtiktiaj tusa túramiayi. 22 Nuyá̱ Yusa enentáimtin áishmaṉ pujumia nú Semayásan Yusa chichame̱ tarí chichaak 23 “Saramúṉka uchirí̱ Jutanmaya̱ akupin Rupuam tura Jutá núnisaṉ Piṉjiamín shuarsha nuyá̱ ashí shuar chicharainiakum 24 ‘Uunt Yus chichaak “Atumí yachi̱ Israer shuarja̱i̱ mánaiktaj tusarum wérap. Antsu atumí je̱e̱ni̱ṉ waketratarum. Warí jú̱naka Wi jú̱tikiajai” tawai’ titiá” Uunt Yus Semayásan tímiayi. Tutai Uunt Yusa chichame̱n antukar umirainiak wécharmiayi.
Jirupuám Israer shuaran Úunt Yusai̱ya̱ akanma
25 Tura Jirupuám, Eprain naintiar naintiar nuṉkanam Sekim péprun iwiarak nui̱ pujusmiayi. Nuyá̱ Piniuir pépruncha iwiarkamiayi. 26 Tura Jirupuámka ní enentáimsaṉ “Yamaikia akupeamuka Tawit shuarnumaṉ ataksha waketkittiawai. 27 Núnisaṉ ju̱ shuar Uunt Yusa Je̱e̱n taṉkun áestuawartaj tusa Jerusaréṉnum wénakka ni úuntri̱n Rupuaman Jutanmaya̱ úunt akupniun ataksha enentáimturartatui. Túmainiakka wíniaka mantuawar Jutanmaya̱ akupniúnam Rupuamai̱ waketkiartatui” tu enentáimsamiayi. 28 Tura anintrus chíkich aentsu chichame̱n anturak úunt akupniuka jimiará waaka uchichin kuriji̱a̱i̱ najanamiayi. Tura aentsun chicharainiak “Jerusaréṉnum ti wakettsa pujusúrme. Tuma asamtai Israera, pai yamaikia, nekaatarum ju̱i̱ti atumí yusri̱ṉkia, Ejiptunmaya̱ ji̱i̱rmarmiarmena nú yusaiti” tímiayi. 29 Nuyá̱ Pitirnum chikichkiniak apujas chikichnaka Tánnum apujsamiayi. 30 Aents nuja̱i̱ tunaan ti túrawarmiayi. Warí nu nakumkamun tikishmátratai tusar Tanka tímianaisha waketrú wéarmiayi. 31 Núnisaṉ nainnium ántar yus enentáimtutai̱ je̱a̱ncha je̱a̱mkarmiayi. Tura ántar yúsnan takarin atí tusa Riwí shuarchan anairarmiayi. 32 Nuya̱ṉka Jirupuám Jutá nuṉkanam namperan najanin armia nuja̱i̱ métektaku atí tusa nantu úchutin tura tsawantcha kínsetin námper atí tusa chichaman najanamiayi. Tura Pitir nuṉkanam waaka uchichin kuriji̱a̱i̱ najanamia nuna áestuattsa wémiayi. Núnisaṉ Pitir nainnium ántar yus áestutai̱ṉ najanamia nui̱sha ántar yúsnan takarin ártí tusa anairamiayi. 33 Tura ni wakeruk náṉkamas tsawantan achik nantu úchutin tura tsawantcha kínsetin námper najantai atí timia nu tsawantin Jirupuámsha Pitir nuṉkanam we Israer shuaran namperan najatamiayi. Tura áestutai̱niam ántar yusan kuṉkuinian áestuamiayi.