2 Akupin

Ukuséas jákatniun Irías etserkamu

1 Úunt akupin Akaap jakamia nuyá̱ ukunam Muap aents Israer shuarka yamaikia umirkashtatji tiármiayi. 2 Ukuséas Samarianam ni je̱e̱ya̱ asa̱a̱sa iimtai̱rí̱ya̱ yakiya̱ akaikí̱ iniarmiayi. Túruna jaa ajas chichaman etserniun akatar akupeak “Wetarum túrarum Ikruna najanamu yusri̱ Paarsepúp chicharkuram ‘Ju̱ suṉkuran achimiákjana ju̱nasha tsuamartajash túramui’ titiarum” tímiayi. 3 Nuyá̱ Uunt Yusa suntari̱ Tispi nuṉkanmaya̱ Iríasan chicharuk “Wetá. Samarianmaya̱ úunt akupin chichama etserin akupkámu winiana nu iṉkiuṉta. Túram chicharkum ‘¿Israernumka Yuska atsawak átum Ikruna yusri̱n Paarsepúpai̱ nekaataj tusa wétinia?’ 4 Ti nekas Uunt Yus jú̱nis tawai ‘Peakrumin tepesam nuya̱ṉka nantakchattame antsu ti nekas jakattame’ titiá” tímiayi. Nuna ti ikiuak Iríaska wémiayi.

5 Nuya̱ṉka chichaman etserniusha úunt akupin pujamunam waketki̱ káunkarmatai chicharainiak “¿Urukamtai waketkintrum?” 6 Tutai aimiainiak “Áishmaṉ iin iṉkiuṉmak chichartamuk ‘Waketkitiarum úunt akupin pujana nui̱ túrarum Uunt Yus nin chicharuk “¿Israer nuṉkanmaṉka Yuska atsawak. Urukamtai Ikruna yusri̱ Paarsepúpai̱ nekáa ikiutarum tusasha akuptámkarum? Wats, peaknum tepesai̱ya̱ nuya̱ṉka ti nekas jakattawai” titiarum’ turamarmaji” tiármiayi. 7 Úunt akupin chichaak “¿Iin iṉkiuṉmak ju̱ chichaman túramji támena nú aishmaṉsha uruku íirkait?” tu inintrúsmiayi. 8 Tutai chichainiak “Nu áishmaṉka ure ajakniuiti tura nuapen emenmamaiti” tuíniakui nisha chichaak “Nuka Tíspinmaya̱ Iríasaiti” tímiayi.

9 Nuyá̱ Ukuséas suntara úuntri̱n seṉkuintia suntara yaruak Iríasan achiktaj tusa wéarmiayi tura Iríaska naintia pakari̱n waka pujumiayi. Nuyá̱ suntara uuntri̱ chicharuk “Maa, Yúsna aishmaṉka, úunt akupin chichartamuk ‘akaikiti’ túramui” tímiayi. 10 Tutai Irías seṉkuintia suntara úuntri̱n aya̱k “Wi Yúsna áishmaṉkaitkiuiṉka nayaimpinmaya̱ ji iniar seṉkuintiaitrumna nútirmin amutmakarti” takui̱ nayaimpinmaya̱ ji iniantar seṉkuintia armia nuna suntara úuntrimiak amukármiayi. 11 Nuyá̱ úunt akupin ataksha áitkiasaṉ chíkich suntara úuntri̱n seṉkuintia suntarja̱i̱ akupkámiayi. Nusha núnisaṉ chicharuk “Maa, Yúsna aishmaṉka, úunt akupin jú̱nis túramui ‘Wárik akaikiti’ túramui” tímiayi. 12 Tutai Irías áimiuk “Wi Yúsna áishmaṉkaitkiuiṉka nayaimpinmaya̱ ji iniaar seṉkuintiaitrumna ju̱na amutmakarat tusan akuptúktatjarme” takui̱ nayaimpinmaya̱ Yusa jiri̱ iniantar seṉkuintia suntaran úuntri̱ntiuk amukármiayi.

13 Ataksha awaiṉki̱ suntara úuntri̱n seṉkuintia suntarja̱i̱ menaintiú akupkámiayi. Menaintiú akupkámu armia nuna uuntri̱ waruk jearí Iríasan tikishmátar chicharuk “Maa, Yúsna aishmaṉka, waitneasam winia iwiaakmarsha tura ame seṉkuintia takartámniu iwiaakmari̱sha arantúkarta tusan seajme. 14 Warí nayaimpinmaya̱ ji iniar emka jimiará úuntri̱n ni suntari̱miak mai̱ seṉkuintia seṉkuintia armia nuna amukármiayi. Antsu winia iwiaakmarka arantúkta” tímiayi. 15 Nuna takui̱ Yusa suntari̱ Iríasan chicharuk “Pai, yamaikia niji̱a̱i̱ wetá, ashamkaip” nuní̱ tutai Irías wajaki̱ taarmia nuja̱i̱ úunt akupin pujamunam wémiayi. 16 Tura úunt akupniun jearí chicharuk “Uunt Yus chichartamuk ‘Chichaman etserniun Paarsepúpai̱ Ikruna najanamu yusri̱n nekáa ikiuta tusam akupkámame. Kame ¿Israernumka Yuska atsawak nekáa ikiuta tusam akuptinia? Tuma asam peaknum wakam tepesumna nuya̱ṉka akaikishtatme antsu ti nekas jakattame’ túramui” tímiayi.

17 Uunt Yus timian Irías ujakmia núnisaṉ Ukuséaska jakamiayi. Tura Jusapáta uchirí̱ Juram Jutá nuṉkanam jimiará uwí úunt akupin pujái̱ Ukuséas uchirmachu jaka asamtai chíkich Juram* Israernum úunt akupin ajasmiayi. 18 Kame Ukuséas túramia nuka Israernumia̱ Úunt Akupin Túrunawarma Aatai̱ papinium áarchamuk ainia.