Juup
Uunt Yus nú arant Júupan chicharma
40 Nu arantcha Uunt Yus Júupan aya̱k
2 “Uunt Yusja̱i̱ jianaiya nusha, Ni enentáimna nuyá̱ ¿aṉkant ajasminkiait?
Wats Yusja̱i̱ tunaiya nuka ju̱na ai̱ktí” tímiayi.
3 Nuiṉkia Juup Uunt Yusan aya̱k
4 “¿Wikia peṉké ántraitiatnasha
warintiak ai̱kiainjiam?
5 Emka chichakaj nuya̱ṉka,
atakka peṉké ai̱kchamniaitjiame” tímiayi.
6 Uunt Yus nasenam páchitkia Júupan chicharuk,
7 “Yamaikia kakaram ajasam
Wi iniastatjamna nu ujatkata.
8 ¿Wi métek túrajna nu antra nútikiamniakaitiam?
¿Winia sumamtikruam péṉker túrinia núnikmiṉkiaitiam?
9 ¿Amesha Yusa kakarmari̱ji̱a̱i̱ métekaitiam?
¿Tura ame chichammesha Yusa chichame̱ ipiamta tímiankait?
10 Nuiṉkia úunt akupniua tímiatrusam iwiarmamprata.
Túrunam ame kakarmarmiji̱a̱i̱ṉ wincha ajasta.
11 Aents kajemtin ainia nu íisarta.
Túram ame kajetáirmiji̱a̱i̱ péejchach awajsarta.
12 Naṉkamantu enentáimtumainia nu peejcha awajsarta
tura Yusan enentáimtichu ainia nusha pujuinia nuiṉ naja̱warta.
13 Túram ashí nuṉkanam pujuinia nuka init iwiarsata,
túrakum jakaa pujuinia áitkiasmek init yutuawarta.
14 Antsu nuiṉkia Wisha ame kakarmarmiji̱a̱i̱ nupetmaktatmena nuna nekaan shiir awajsattajme.
15 Iisiana entsaya̱ yajasma pemut náartinia waakaya núnisaṉ nupá̱ yuun najanamiajai.
Kame Wisha amincha najanamiajme.
16 Wats iistá, suntunmasha
tura tantannumsha ya̱pé̱ írunna nuja̱i̱ kaka̱i̱niaiti.
17 Tura ujuké̱ja̱i̱ wáikmaksha sétrua tímianuja̱i̱ wáikmawiti
nuyá̱ ni namaṉke̱ṉka yá̱a̱pkete.
18 Ni ukunchi̱sha yaṉkú jírua imianú katsurmaiti
tuma asa kátsuram jírua núnisaiti.
19 Nunasha Yus ni nekatairi̱ji̱a̱i̱ tímiatrus najanaiti.
Tuma asa Niṉki nupetkamniaiti.
20 Tura ni yurumkari̱sha nupa̱ naint tsapainiawai.
Nuna ashí yajasma nakurukmaikia yurumáiniawai.
21 Nuyá̱ kuchá kucharmatniunam rutu kuku̱jrí̱n paantcha tepenaiti.
22 Nu numi entsá yantam mátsatkana nuna
mikintrari̱ nu yajasman ejawiti.
23 Núnisaṉ entsa ama̱a̱rkuisha ashamchaiti
tura Jurtan entsa amuamsha tee ajas wajawiti.
24 Tura ímiatrus íimiuncha
¿yaki achik nuji̱ ji̱i̱ri̱ jiṉkiawaint?