Yus Kanta
Tujintkiachu Yus Israeran yaiṉma
105 Uunt Yus yumiṉsarum ni naari̱ pachisrum seatarum.
Túrarum ashí nuṉkanam ni túramuri̱ nékamtikiartarum.
2 Tura kantampruárum shiir awajeakrum
ashí ni túramuri̱ áujmatsatarum.
3 Kame Uunt Yus enentáimtatirmeka
ni naari̱ shiira nu enentáimtusrum warastarum.
4 Uunt Yus enentáimtakrum ni kakarmari̱ tuke tsawant searmena nútirmeka,
Niji̱a̱i̱ pujustin enentáimsatarum.
5 105:5-6 Israer shuartiram Yusa takarin Aprajáma weatirmeka Yus anaikiamuitrume.
Tuma asakrumin atumíin Uunt Yus ni chichame̱ja̱i̱ akupkámia nu tura aentsti túrachminian túramia nusha kajinmátkirap.
7 Níṉkiti ii Uunt Yusri̱.
Tura ashí aents matsatainia nui̱ ni akupeamuri̱sha awai.
8 Yus aentsja̱i̱ chichaman najanamia núnaka peṉké kajinmatkichmiayi.
Kame Israer shuarja̱i̱ chichaman najanamia nuka tuke átiniuyayi.
9 Kame Aprajámja̱i̱ nu chichaman najanamiayi.
Nuyá̱ Isaknaka ímia Niṉki pachimias umiktatjai tímiayi.
10 Jakupnasha tuke átin chichaman najanamia nuna
nekas túrattajai tu ujakmiayi.
11 Tura chichaak “Kanaan nuṉkaka atumnia átiniaiti tímiaj núnaka nekas súsatniuitjiarme” tímiayi.
12 105:12-13 Kame ishichik armia nui̱ṉkia írara núnis
chíkich chíkich nuṉkanam pujukní̱ ajá wekain ármiayi.
14 Túmainiakuisha yaaksha wáitkiasara̱i̱ṉ tusa Uunt Yus tsaṉkatkacharmiayi.
Antsu nin ayampruiniak imia úunt akupin armia nunasha asutiáwarmiayi.
15 Tura “¡Wi anaikiamu nuyá̱ Wínian etserin ainia nu yajauch awajtúrsairap!” Yus tímiayi.
16 Tura nuṉkanmaṉka Uunt Yus tsukamtikiamiayi.
Túramtai yúatniusha peṉké atsumiayi.
17 Túrasha nu jeatsa̱i̱ṉ Uunt Yuska ni anaikiamun Jusen yáunchuk akupkáuyayi.
Kame niṉkia iniatai̱ atí tusa surukarmiayi.
18 Kame nincha kuntujnum jirun unuṉkrar,
nawe̱nmasha jiruja̱i̱ jiṉkiawar sepunam eṉkea wáitkiasarmiayi.
19 Tura Uunt Yus nekas tawai takui̱
Jusé ujakma umimiám aṉkant jiinkimiayi.*
20 Nu uminkiamtai úunt akupin Jusé atíatarum tutai
atía aṉkant awajsarmiayi.
21 Tura úunt akupin ni je̱e̱n tura niniu irunmia nuna
ashí wáinin armia nunasha uuntri̱ atí tusa anaik apujsamiayi.
22 Tura úuntnasha ni itiur wakera núnis chicharkarat tusa
tura páantin armia nunasha nekatai̱n unuiniararat tusa anaikiamiayi.
23 Ukunam Jakup Ejiptunam taa írara ánis pujusmiayi.
24 Nuya̱ṉka Uunt Yus Jakupa shuari̱n ti untsurí awajás
ni nemasri̱ji̱a̱i̱ṉkia naṉkaamas ti kakaram awajsarmiayi.
25 Tura Jakupa shuari̱n kajerainiak anaṉkawarat tusa
Uunt Yuska Ejiptu aentsun nisháa enentáimtikrarmiayi.
26 Nuyá̱ Yus ni anaikiamuri̱ Muisaisan
tura Araunnasha akuptúkarmiayi.
27 Tura ni kakarmari̱n Kaam nuṉkanam
aentsti túrachminian iniakmasarat tusa ikiaká̱rarmiayi.
28 Nui̱ ti tee wainmakchamnia awajsámiayi.
Tuma ai̱ṉ Muisais Araunja̱i̱ ujainiamsha peṉké anturkacharmiayi.
29 Núnisaṉ entsancha numpa awajsámtai
namaksha ashí jákarmiayi.
30 Nu arant mukunt nu nuṉkanam pampaṉmiayi.
Túruna úunt akupniu pujutái̱ri̱ncha piákmiayi.
31 Nuya̱sha Uunt Yus takui̱ anchiji̱a̱i̱,
tura temaja̱i̱ Ejiptunmaya̱ aentsun wáitkiasarmiayi.
32 Núnisaṉ ni nuṉke̱n yumi yútana nútikias michan akaketar
tura jiniasha akuptúkarmiayi.
33 Nuyá̱ ashí ni nuṉke̱n úwancha
núnisaṉ ikiu irunmia nunasha
tura numincha kupir ashí amukmiayi.
34 Nu arant Uunt Yus takui̱
nekapmarchamnia titikriáts káutkar ukatkarmiayi.
35 Tura nu nuṉkanam ashí nupa̱n
sa̱a̱kniasha yua mash amutkarmiayi.
36 Nu arant Ejiptunmaya̱ ashí iwia̱i̱ri̱ armia nusha jákarmiayi.*
37 Tura Israer shuaran Uunt Yus Ejiptunmaya̱n kuítri̱ntiuk kurirtiuk ji̱i̱rmia nui̱ṉkia
jaaka chikichkisha peṉké atsumiayi.
38 Warí, Ejiptunmaya̱ aentska Israer shuaran ti ashamainia ásar
ni jiiniainiakui warasarmiayi.
39 Wénakui Uunt Yus tsawai̱kia tarachia nútikias yuraṉmin ejatámiayi tura káshikia
ji tsáapnin awajmiayi.
40 Tura namaṉke̱n seamainiakui puusha ániun ikiatkarmiayi.
Núnisaṉ nayaimpinmaya̱ yurumkan yuáwar ejemakarmiayi.
41 Núnisaṉ kátsuram kaya nakaakamtai entsa jíintrarmai.
Túrunatai kúkachnumaṉ tuke waa núnis éntsaka kararmiayi.
42 Kame Uunt Yus ni takarniúri̱n Aprajáman
yaunchu nekas umiktatjai timia nuna enentáimtus túramiayi.
43 Nuní̱ tura Uunt Yus ni shuari̱n
ti shiir waramtiksar jí̱i̱kiarmiayi.
44 Túrawar Israer shuarnaka Yusan nékachu armia nuna nuṉke̱n súsarmiayi.
Túram nu shuara takakmasmari̱n akintrukarmiayi.
45 Warí, Uunt Yuska wi akupkámu chichaman umirtukarmi tusa túramiayi.
¡Naṉkamantuitme Uunt Yusá!