Yus Kanta
Uunt Yusa waitnenkartutairi̱ tuke áwiti
118 ¡Uunt Yus tí peṉker asamtai shiir awajsatarum!
¡Warí ni waitnenkartutairi̱ṉkia peṉké amuichaiti!
2 Israer shuartiram waitneasrum chichakrum
“Uunt Yusa ame waitnenkartutairmeka peṉké amukashtiniaiti” titiarum.
3 Tura atumsha Arauna shuari̱tirmesha waitneasrum
“Uunt Yusa ame waitnenkartutairmeka peṉké amukashtiniaiti” titiarum.
4 Uunt Yus ashamniutirmeka waitneasrum
“Uunt Yusá ame waitnenkartutairmeka peṉké amukashtiniaiti” titiarum.
5 Wi wáitsan pujakun Uunt Yusan untsukmajai.
Túram anturtuk uwemtikrurmai.
6 Warí, Uunt Yus wiji̱a̱i̱ pujá asamtai
yaaksha itiurchat awajtúkminia nuna ashamkashtatjai.
7 Winia yaintiainia nui̱ Uunt Yus wiji̱a̱i̱ pujawai
tura wíniaka niṉki yaintiui.
Tuma asamtai winia kajertuinian nupetnakun wakeraj nuna wainkiattajai.
8 Warí, aentska enentáimtutsuk nekaska Uunt Yusak enentáimtustin imiá péṉkeraiti.
9 Núnisaṉ uunt anaikiamu kakaram ainia nusha enentáimtutsuk
nekaska Uunt Yusak enentáimtustin imiá péṉkeraiti.
10 Ashí nuṉkanmaya̱ aents winia téntatkarmai.
Túrasha wikia Uunt Yusa náari̱n pachisan mash amukártatjai.
11 Kame ashí shuar winia téntatkar jíinkichmin awajtúsarmai.
Túrasha wikia Uunt Yusa náari̱n pachisan mash amukártatjai.
12 Téntatkarmia nuka u̱yu̱yu̱ja̱i̱ métek amutáwarmai.
Tura jaṉki meserarma najamniua tímiatrus najamprutiarmai.
Túrasha wikia Uunt Yusa náari̱n pachisan mash amukártatjai.
13 Aju̱ntrataj tusar kakaram shitiatawarmai.
Túrasha Uunt Yus yaintkiamai.
14 Ayamprutin asamtai wikia Úunt Yusrunak kantampruátniuitjiai.
Níyaiti winia uwemtikrana nuka.
15 Péṉker túrinia nuna je̱e̱nkia Yusa nupetmakmari̱n ti shiir kantampruiniawai.
Warí, Uunt Yus ni kakarmari̱ji̱a̱i̱ nekaachminia nuna túriniaiti.
16 Uunt Yusa kakarmari̱ṉkia naṉkamantuiti.
Uunt Yus ni kakarmari̱ji̱a̱i̱ nupetturmakuitji.
17 Tuma asamtai játsuk iwiaaku pujuttajai.
Túran Uunt Yus túrawarman áujmatuu pujuttajai.
18 Uunt Yus winia tí naṉkaamas asutiuámai
túrasha jakat tusa iniaitiuschamai.
19 Yus pujutai̱ waiti uratritiarum.
Nui̱ waya̱n Úunt Yusan yumiṉsataj.
20 Nu waiti Úunt Yusnaiti.
Tuma asamtai Yusna ainia nuka nuní̱ waya̱wartatui.
21 Uunt Yusru winia anturtukam uwemtikruru asakmin
Ame náarmin shiir awajsattajai.
22 Je̱a̱ je̱a̱min kayan nakitrarmia nú kaya emka apujtuamuri̱ atí tusa apujamuiti.*
23 Nuka Úunt Yusai̱ya̱iti.
Aents nekaachmin asamtai
ti enentáimtusminiaiti.*
24 Uunt Yus túramia nuka nu tsawantaiti.
Tuma asamtai yamaikia Nin warastai.
25 Waitneasam Uunt Yusá uwemtikkiarturta
túram kakaram awajkartusta.
26 Uunt Yusa náari̱n pachis winiana nu shiir atí,
Uunt Yus pujamunmaya̱ṉ shiir awajeajrume.
27 Uunt Yuska nekas Yúskete.
Tuma asa tsáapninian suramsaitji.
Tuma asamtai maar áestuatin áestutai̱ kachuri̱n jiṉkiatarum.
28 Ámeka winia Yúsruitme.
Áminkia yumiṉsan ti páantin awajsattajme.
29 Uunt Yus tí peṉker asamtai shiir awajsatarum.
¡Warí ni waitnenkartutairi̱ṉkia peṉké amuichaiti!
Yusa Chichame̱ pachisar waramu
Ju̱ Yús Kantanam chíkich chíkich tesamunam ashí uchichiri̱ nu rétraja̱i̱ juárainiawai.
Nu arantcha ashí tesamu Ipríu chicham rétrari̱ aakma ainia nuja̱i̱ juárainiawai.