Yus Kanta
Yus tí uuntaiti tura najankamu yus peṉké antraiti
135 Naṉkamantuitme Jiuwá
¡Jiuwá naari̱ shiir awajsamu atí!
Jiuwá takarniutirmesha Ni shiir awajsatarum.
2 Átum Jiuwáa Je̱e̱n takarin pujatirmesha
ii Yusri̱ Je̱e̱n á̱a̱ri̱n pujarmena nútirmeka Ni shiir awajsatarum.
3 Jiuwaka shiir awajsamu atí, warí, Ninkia ti péṉkeraiti
Ni naari̱ pachisrum Yus kanta tampruátarum,
warí Ninkia ti shiiraiti.
4 Jiuwá Jakupan Winia atí tusa anaiyak
tura Israernaka Winia atí tusa achikmiayi.
5 Warí Jiuwaka ti kakaram arantumainti, wikia nuna nékajai.
Ii Yúsri̱nkia ashí yus írunna núja̱i̱sha naṉkamas naṉkamantuiti.
6 Jiuwaka nayaimpinmasha
tura nuṉkasha núnisaṉ nayantsanmasha
tura ashí wa̱a̱ náṉkatkachu áiniana nui̱sha ni wakerana nuna túrawai.
7 Nuṉka náṉkatrana tímianaiya̱n yuraṉmincha takúawai.
Tura yumi jámainiana péemniasha awajui
núnisan nasencha ikiusma aan jíiniawai.
8 Ejiptunmaya̱ shuara uchirí̱ iwia̱i̱ri̱ iwiaakmari̱ncha Ni jurutkiarmai
nuyá̱ ni taṉkuri̱ emka petsakarmancha núnisan túramai.
9 Ejiptuá, Parauṉkan nuyá̱ ashí ni takarniúri̱ncha aentsun enentáimtikrataj tusa
aentsti túrachminian péṉker pujuschamnia iniaktustaj tusa aminii akuptúkarmiayi.
10 Untsurí nuṉka mátsatkamunam
untsurí úunt akupin kakaram armia nunasha máwarmiayi.
11 Amur shuara úunt akupniuri̱ Sejunan
tura Pasannumia̱ úunt akupin Úknasha
núnisan ashí úunt akupin Kanaannumia̱ncha máwarmiayi.
12 Nu aentsu nuṉke̱n Yus Israer shuaran tuke niniu árat tusa súsarmiayi.
13 Jiuwáa Ame náarmeka náṉkatkachuiti.
Áminkia yamaisha ukunmasha nuyá̱ ukunam akiiniawartatna nusha enentáimturmartatui.
14 Ti nekas ni shuari̱ ainia núnaka ni túramuri̱ji̱a̱i̱ métek akikiártatui.
Jiuwá Ni takarniúri̱nkia waitnentrartatui.
15 Uunt nuṉka mátsatkamu ainia nuna najankamu yusri̱ṉkia winchá jiru tura kuri áiniawai.
Nusha aents najankamu áiniawai.
16 Wene̱n takakainiawai túrasha chichainiatsui,
ji̱sha awai túrasha wáinmainiatsui.
17 Kuishi̱ncha takakainiawai túrasha ántuiniatsui
núnisaṉ wene̱nmaya̱sha mayainkia jiiniainiatsui.
18 Nuna najanainiana nusha niji̱a̱i̱ métek áiniawai
tura ashí aents nekas enentáiji̱a̱i̱ nuna enentáimtuiniasha núnisan áiniawai.
19 ¡Israer shuartirmeka Jiuwá páantin naat awajsatarum!
¡Araun shuartirmesha Jiuwá páantin naat awajsatarum!
20 ¡Riwí shuartiram, Jiuwá páantin naat awajsatarum!
¡Jiuwá ashamniutirmeka, Jiuwá páantin naat awajsatarum!
21 ¡Jiuwá Jerusaréṉnum pujana nú
Seúnnumia̱ṉ shiir awajsamu atí!
¡Naṉkamantuitme Jiuwá!