Yus Kanta
Yus nékarui
Tawit kantamámu
139 Uunt Yusru, ashí íirsam nekarame.
2 Pujamursha núnisaṉ wajamursha ashí nékaitme.
Winia enentáimmiarsha íiṉkiá nekartuame.
3 Wi wekaamursha tepamursha nekartuame.
Wi tui̱ wekaaj nui̱sha ashí waitme.
4 Yusá, chichaatsa̱i̱ṉ chichastatjana nu mash nékame.
5 Úkurui̱sha eemsha shiir íirsam téntatrukume.
Tura yáintkiataj tusam Ame tarutniume.
6 Nu nekaatniusha wíji̱a̱i̱ṉkia naṉkamakuiti.
Ti uunt asamtai peṉké nekaachminiaitjiai.
7 ¿Ame Wakanmíya̱sha tuiṉ wétaj?
¿Kame Aminí̱ya̱sha tuiṉ pisaraintiaj?
8 Nayaimpiniam wakataj tákuisha, Ámeka nui̱sha pujame,
jákaru matsamtai̱niam pujustaj tákuisha nui̱sha Ame pujame.
9 Nanapruran nayants náṉkatkamunam wéakuisha,
10 tímianaisha untsuurumini̱ apujtusam waitkiattame.
11 Kiritniunam ú̱mkataj tákuisha,
tsawai̱tiat kashi ajastatui, tu enentáimkiuisha,
12 Ámiji̱a̱i̱ṉkia kiritniunmasha ú̱mkatin atsawai.
Káshisha tsawai̱ya núnisaṉ paant ajawai.
Kiritniusha tsáapnincha Ámiji̱a̱i̱ṉkia métekete.
13 Warí, wíniaka Amek najataitme.
Kame winia nukuru waké̱ ínitiaṉ émamkesam wíniaka najatamiame.
14 Maa, Ame túrutairam aentstikia tujintkiamnia áiniawai.
Núnaka paant nékajai.
Nuna enentáimsan aya Amek naṉkamantuitme tájame.
15 Kame winia aya̱shur paantcha
init ú̱kmanum émamkesar najanamu ai̱ṉ
Ámeka winia aya̱shur paant nekamame.
16 Yusru, yama najatmiam nuya̱ṉ akiinmam wáitmiame.
Nu túram ashí winia tsawantur tsaṉkatrukmiam nusha
chikichkisha táamtiktsuk ame Papirumíin mash áatrurmiame.
17 ¡Maa nekas, Yusá, wíji̱a̱i̱ṉkia ame enentáimmiarmeka ti shiir áiniatsuk!
¡Tuma asamtai yaki nunasha ímiannasha máshisha nekaamniait!
18 Náikmiji̱a̱i̱ naṉkaamas asa nekapmarchamniaiti.
Kame wi kanaran shintiaknasha Amiini̱ṉ tuke pujá nekapeajai.
19 ¡Maa, yajauchin túrin ásar maṉkartin ainia nuka wini̱ya̱ṉka kanakiárat tusan
wakerakun Yusá, ajakrarmeka wíji̱a̱i̱ṉkia maak ainti tajai!
20 Yusru, Ámin yajauch enentáiji̱a̱i̱ chichartamainiawai.
Ame nemasrumsha túkeneas náarmin páchiniawai.
21 Maa Uunt Yusá, Ámin nakitramainia nuna wisha nakitiáiniatsjak.
Tura Ámin kajertamainia nuna wisha kajerainiatsjak.
22 ¡Maaj íitniasha nakitiajai!
Nekas nemasrua núnis enentáimtuiniajai.