Yus Kanta

Kame wi anaṉmatsuk untsúajam nu émamkesam anturtukta.

 2 Núnisaṉ wi yapajmiáktincha aminí̱ya̱ atí.

Tura Ame jí̱mikia aya péṉkera nunak iistí.

 3 Kame kashi iirsattsam tame winia enentái̱rsha émamkesam iirtusuume.

Tura émamkesam iirsamsha yajauchikia peṉké waitrukchame.

Warí, wiki enentáimtumasan náṉkamsaṉka chichakchatjai tumamniuitjiai.

 4 Tura chíkich aents túruinia nuya̱ṉka yajauch aentsu túrutairi̱niaṉka

Ame chichammiji̱a̱i̱ wáinmamkajai.

 5 Atajkintra̱i̱j tusan wikia Ame jintimíini̱ṉ wéajai.

 6 Maa Yusá wíniaka anturta asakmin wikia Ámin untsúajme.

Antú antut ajasam winia chichamprusha anturtukta.

 7 Ámin nekas enentáimturmainiaka ni nemasri̱ya̱ Ame untsuurumji̱a̱i̱ uwemtikiainiame.

Tuma asam Ame waitnenkartutairmijia̱i̱ aents túrachmin ainia nu iniakmasta.

 8 Ame ji̱mi wáinmena ímiatrusam wáitkiata

túram tí anenta asam atash uchirí̱n etektus pujurna nútiksam ú̱rkata.

 9 Yusan enentáimtichu itiurchat awajkartin ainia nuna jí̱ya̱ṉka ú̱rkata.

Tura winia nemasur mantuataj tusar téntatkarainia nuya̱sha wáitkiata.

10 Niṉkia ní machari̱ji̱a̱i̱ṉ machararai

ni wene̱ja̱i̱ waantu enentáimtumainiawai.

11 Yamaikia ii wekakámunam weantrarai,

aju̱nmártai tusa iis pujurtamainiaji.

12 Winia nemasruka úunt ya̱wa̱ kuntinia esái yuátaj tusa itiura,

tura úunt ya̱wa̱ uchirí̱sha ú̱mak tepana núnis áiniawai.

13 Maa Uunt Yusru íisarta túram iṉkiunaiktaj tusam weritia túram tikishmamtikrarta.

Ame puya̱rmiji̱a̱i̱ winia wakaniur Yusan enentáimtichu ainia nuyá̱ aṉkant awajtusta.

14 Uunt Yusá Ame uwejmiji̱a̱i̱ aya ju̱ nuṉkanmaya̱ nunak enentáimtin aents ainia nuyá̱ aṉkant awajtusta.

Kame niṉkia núkap takurmakainiaksha ni uchirí̱sha núkap yurumá ejemararsha

tura nuya̱sha uchichíri̱n kuítian ikiuráiniawai.

15 Antsu wikia Ame yapimin nekasa nuja̱i̱ métek íistatjai.

Tura Ámiji̱a̱i̱ métektaku ajasan shintiaran warastatjai.