Yus Kanta

Núnisnak Uunt Yusan titiaraktak ajatsuk enentáimtusuitjiai.

 2 Maa Uunt Yusá íirsam nekaprusta winia enentái̱rsha

tura winia enentáimtai̱rsha imiatkincha awajtúrsata.

 3 Warí Ame aneṉkrattairmeka wini̱ni̱ṉ awai

tura péṉker jintimín wekaajai.

 4 Shuar yajauch chichamtin ainia núja̱i̱sha pujuschaitjiai

núnisnak wáitian wáitrin ainia núja̱i̱sha tsaniṉchaitjiai.

 5 Yajauch shuar ainia nu iruntai̱nmasha nakitiajai

tura Yusan umircha ainia núja̱i̱sha peṉké pujuschaitjiai.

 6 Winia uwejrunka nijiamaran tunaarincha awajsaitjiai.

Nuní̱ túran Uunt Yus áestutairmi yantamén wekasattajai.

 7 Yumiṉsajme tusan untsumkan ántumtikiattajai

túran ashí aents túrachmin túraitmena nuna áujmattsattajai.

 8 Maa Uunt Yusá Ame pujutai̱ je̱e̱min aneawitjiai

Ame wincharum pujutai̱ je̱a̱ nuṉke̱n.

 9 Yajauch shuarja̱i̱ métek winia jurukip.

Shuar maṉkartin ainia nui̱sha winia iwiaakmar ikiurtusaip.

10 Ni uwejé̱nka nuna itiurchat awai

tura untsuur uwejé̱nka akikiar útsukma áiniawai.

11 Tura wikia esetran winia wekatairui̱ni̱ṉ wekasattajai

winia waitnentruram awaṉtuktia.

12 Wikia tuke péṉkernak túriniaitjiai.

Uunt Yusan iruntramunmasha shiir awajsattajai.