Yus Kanta
Wáitiakur Yus untsuamu
Tawit Yusan enentáimtu pujuttajai tusa ju̱ kanta áaruiti.
38 Uunt Yusá suir kaje̱nturkam chichartukaip
tura kajetcha kajekam asutiuáwaip.
2 Ame naṉkiram winia aya̱shrui̱ akumturkarai
tura Ame uwejém winia aya̱shrui̱ akattúrkiyi.
3 Ame kajetáirmiji̱a̱i̱ winia aya̱shrui̱ṉkia yajauch awajkámu asan péṉkerka peṉké atsawai
wi yajauch túrutairja̱i̱ ukunchrui̱sha ayama pujatsui.
4 Winia yajauch túrutairuk muukruncha naṉkaikiyi.
Túmak ti kijin muuknum patatkamua nútikrua nu arant awajtúsai.
5 Winia wáurtairja̱i̱ṉ winia kuímiarka pukumanch piak meje̱a̱wai.
6 Punukan peṉké péejchach ajasjai.
Tuke tsawant uutu wekaajai.
7 Núnisaṉ winia tuntuprui̱ṉkia ashí kápa̱a̱r awajtuiniawai
tura winia aya̱shrui̱ṉkia péṉkerka atsawai.
8 Aya̱shnium ju̱yu̱ awajsamu asan kakarmachu nekapeajai.
Tura wi kaje̱ntka núnis nekapeakun wikia utjai.
9 Maa Uuntá Ame pujamunmaṉka wi wakeramuka ashí Amiin írunui.
Tura wi útmaka Aminí̱ṉkia úmkachminiaiti.
10 Winia enentái̱rka tí warik tek tek ajawai tura kakarmachu ajasjai.
Tura winia ji̱ru tsáapnintri̱nkia ikiurkiyi.
11 Kuchapja̱i̱ jaa asamtai winia amikrusha tura winia tsaniṉkia wekatairsha wini̱ya̱ṉka íkiaṉ ajainiawai
tura wí shuarsha nisháa kanakí̱ pujuiniawai.
12 Winia mantuataj tusa e̱a̱tainia nuka jintian akirturainiawai.
Núnisaṉ winia yajauch awajtústaj tusa wakerutiarma nuka mantuataj turutainiawai
tura ashí tsawant anaṉkruatniun iwiarturainiawai.
13 Túrasha wikia empekua núnisan ántatsjai
tura muutua núnisan chichaatsjai.
14 Wikia aents ántichua núniniaitjiai
núnisan chichamprumakchamnia núniniaitjiai.
15 Uunt Yusá Ámin nákajme.
Ámeka Uunt Yus winia Yusru ai̱rkattame.
16 Wi atajkintramtai winia wishikrurara̱i̱ṉ tímiajai.
Wíniaka iniarmatai nupetkáji tu enentáimturacharti.
17 Kame wikia iniastatuk pujajai
tura winia najamprutamurka nu arant tuke ajakí̱ wéawai.
18 Tuma asamtai winia tunaarunka etsertumakin wétatjai.
Winia yajauchirja̱i̱ṉ kúntuts pujustatjai.
19 Winia nemasur ainia nuka yajauch túratniun júujut enentáimin tura kakaram áiniawai.
Tura warí itiurkachmanum nakitruinia nuka kawentrukarai.
20 Wi péṉkernumaani̱ wekáa asamtai winia nemasur péṉkerja̱i̱ yapajtiutsuk antsu
yajauchinmaani̱ yapajtiúkarai.
21 Maa Uunt Yusá ajapa iniaitiusaip.
Winia Yusru wini̱ya̱ṉka kanakip.
22 Kame yáintkiataj tusam winia uwemtikrin Uuntá wárik juiktá.