Yus Kanta
Uunt Yus yaintkiat tusar seam
Kurái uchirí̱ aarma
44 Yusá tí yaunchuk ii uuntri̱ nu tsawantin pujuarmia nu
ame itiurkamiam nuna ujatmainiakrin ti paant antukuitji.
2 Tura aents ántar yusan tikishmátin armia nuka
wáitkiasam amukáram ii uuntri̱ ni nuṉke̱n matsasármiame.
3 Warí ni kakarmari̱ji̱a̱i̱ṉ mánaikiar nuṉkan akinkiacharmiayi.
Antsu Ame kakarmarmiji̱a̱i̱
tura waitnenkartutairmiji̱a̱i̱sha
yáiṉkiam nupetmamtikiarmiame.
4 Yusá, Ámeka winia Úunt Akupniuruitme.
Tuma asam Jakupa shuari̱ yaiṉtá.
5 Aya Ámiji̱a̱i̱ṉ ii nemasri̱ṉkia nupetkartatji
tura Ame náaram pachisar kakarmachu awajsartatji.
6 Warí tíshimkiurnasha enentáimtuschattajai
tura puya̱rusha uwemtikrurchattawai.
7 Kame aya Amek ii nemasri̱ya̱ uwemtikkiarturume.
Túram iin kajertamainiaji nusha iniatsá̱rarume.
8 Tura asakmin ashí tsawant Ámin pachisar shiir wararsattaji.
Tura “ii Yusri̱ṉkia aya Ameketme” títiatji.
Túrakur Ame náaram pachisar Ámin shiir awajkur kantamprittiaji. (Séraj)
9 Túmaitiatam iniaikiartusam iniatsá̱kratramame.
Núnisaṉ ii suntarí̱sha ikiakáiniatsme.
10 Nuja̱i̱ ii nemasri̱ nupetkarat tusam tsaṉkamkartukume.
Túrukratawakmin ii warirí̱n atantramainiaji.
11 Tura mátai̱niam murikiun juinia nútiksamek surutkratkame.
Núnisaṉ yajá nuṉkanam aṉkant aṉkant akupkartukume.
12 Tura amé shuarsha kuítchaja̱i̱ ántram surukuitme.
Tura timianú kuítiaiti tátsume.
13 Tura ayaam pujuinia nu áujmattsar
wishikiainiak natsanmai̱ awajiarat tukartame.
14 Chíkich nuṉkanmaya̱ aents íirmasar “ániusha” turamarat tusam apujkartusuitme.
Tuma asamtai iin nakitramainiak muuke̱n pe̱a̱tramainiaji.
15 Ashí tsawant natsaamajai.
Winia awajirmaruk naka íimsachmin awajtawai.
16 Winia nemasur mantuataj tuinia nu ímiancha iirainiak itiurchat enentáimtikruiniawai.
Tura chichainia nuja̱i̱ iniatsá̱tainiawai.
17 Kame ashí itiurchat wáinkiursha Ámiṉkia peṉké kajinmatkichuitji.
Tura Ámiji̱a̱i̱ chícham najanamusha tímiatrusrik umikiuitji.
18 Tura Amiiya̱ kanaktincha peṉké enentáimprachji.
Áintsaṉ Ámiji̱a̱i̱ péṉker wekasatniusha iniaisachji.
19 Tura árini̱ṉ atsamunmaya̱ ya̱wá̱ matsamtai̱niam
kiritniunmaṉ pujustinia ánis tsaṉkamkartukuitme.
20 44:20-21 Ii Yusri̱ kajinmátkir iniaisar
chíkich yus aents najanamua nu umirkaitkiurnisha
¿nu túramun Yus nekaachminkiait?
Warí Niṉkia ii tunaarí̱ ú̱kmancha ashí nékawai.
22 Warí Ámin umirkurin tuke tsawant mantamainiaji.
Murik mátai̱niam júkitin matsasma núnis enentáimturmainiaji.
23 Uunt Yusá ¿urukamtai pachikrattsum?
¡Shintiarta! Maaj, tuke iniaikiartusaip.
24 ¿Urukamtai imiá wáitiarnisha íikrattsuksha iniaikiartusum?
25 Ii wakaní̱sha ti wáitiainiawai.
Tura ii aya̱shí̱sha ti yawe̱rarai.
26 ¡Tuma asamtai wárik yáiṉkratkata.
Túram Ame waitnenkartutairmiji̱a̱i̱ uwemtikkiartukta!