Yus Kanta
Yus nekas enentáimtusar tura Ni chichame̱ enentáimtustin
Tawit kantamámu
56 Winia Yusá, shuar wajatrurarmatai winia waitnentrurta.
Tura tsawant takamtsuk jatetainiak wáitkiarainiawai.
2 Waantu enentáimtumasar jatetainia nuka
untsurí ásar tsawant takamtsuk winia nemasruka amutúrainiawai.
3 Sapijmiajna nu tsawantka
wikia Áminiak enentáimtajme.
4 Yúsnaka chichame̱ja̱i̱ shiir awajeajai.
Yúsnak enentáimtusan ashamkashtatjai.
Tu enentáimiá pujai̱sha ¡aentsush winiasha warí itiurtuktiṉ!
5 Tsawant takamtsuk winia chichamprunka antuk ni chichame̱n wi chichakchamua nuyá̱ patak yapaji̱á etserainiawai.
Winia emesturtaj tuinia ásar ashí ni enentáimmiari̱ṉkia yajauch áiniawai.
6 Niṉkia chikichji̱a̱i̱ iruntrar u̱mainiawai.
Túrawar mantuataj tusar wi wekakámun émamkes nawe̱n íirtuiniawai.
7 Nekasaṉ ¿ni yajauchiri̱ji̱a̱i̱ ú̱mkartata? Yusá,
ju̱ aents ainia ju̱ka Ame suírumji̱a̱i̱ emesrarta.
8 Winia wekaamurka Ame nekapmarume.
Túram winia nea̱jkirka Ame mutirumin ikiurtusta.
Warí ame papirumin ¿áarchamukait?*
9 Wi Ámin yainkiai tusan seakui winia nemasruka pisarartatui.
Yus wiji̱a̱i̱ pujana nuna nékajai.
10 Yusan enentáimtusan Ni chichame̱n shiir awajjai.
Tura núnisnak Uunt Yusnaka Ni chichame̱n enentáimtusan shiir awajjai.
11 Aya Yúsnak enentáimtusan pujakun ashamkashtatjai.
Tu enentáimiá pujai̱sha ¡aentsush winiasha warí itiurtuktiṉ!
12 Maa Yusá, amastájai tímiaj nuka wini̱ṉkiti.
Yumiṉsajme tusan ántar súsatniuncha amastatjai.
13 Jákatniunmaya̱ tura tukumkatniunmaya̱sha winia iwiaakmarka aṉkant awajtúrsamame.
Tura Yusja̱i̱ wekasat tusam iwiaakma tsáapniji̱a̱i̱ iwiaaku awajtúrsamame.*