Yus Kanta
Nemasrui̱ya̱ aṉkant awajtúsai tusar Yus seamu
Ju̱ yamaram kanta kantamtikniun áatar súsaiti. Nusha kanta “Emestukaip” tusar kantamámua nuja̱i̱ métek nakumsar kantamátniuiti. Tawitian máwarat tusa Saur ni takarniúri̱n Tawitia je̱e̱n akuprámia nui̱ Tawit jú̱ kantan áaruiti. (1 Sam. 19:11-12)
59 Winia Yusru winia nemasrui̱ya̱ aṉkant awajtusta tura winia kajertuinia nuya̱sha uwemtikrurta.
2 Yajauchin túruinia nuyá̱ aṉkant awajtusta
túram maṉkartin ainia nuya̱sha uwemtikrurta.
3 Maa Jiuwáa, winia yajauchi̱rja̱i̱nchu tura umitmákcha ai̱ṉ peṉké ántar kakaram ainia nu mantuataj tusar kajertuinia tu̱a̱rtukarai.
4 Kame wikia yajauchincha túrachu ai̱ṉ mantuataj turutainiawai.
Winia iṉkiuṉkataj tusam shintiaram íirsata.
5 Ame Jiuwaá, Nayaimpinmaya̱ Suntara Uuntri̱, Israera Yusri̱yá
ashí uunt nuṉkanam matsatainia nu asutiátaj tusam shintiarta.
Anaṉkartin yajauchin túrin ainia nuka ashí waitnentraraip. (Séraj)
6 Kí̱akui̱ ataksha ya̱wá̱ núnis ái̱ṉmakiar táiniawai
túrawar péprun téntak matsamtuk pujuráiniawai.
7 Yajauchin chichainiak ni chichame̱ṉka puyá̱ núnisaiti.
Tura chichainiak “¿Yaki antukat?” tuíniawai.
8 Maa Jiuwaá Ámeka ni wishikrartatme.
Ashí uunt nuṉka mátsatka ainia nuka wishikrartatme.
9 Winia nemasru kakarmari̱ya̱ṉka Ámin nákastatjame.
Warí winia ayamprútniuka Yúsaitme.
10 Winia waitnentrin Yuska winia ayamprutkattsa eem weruttiatui.
Tura Yuska winia nemasrun nupetmattruk wi wakeramun túrattui.
11 Maa Jiuwaá, ii tantari̱ntme. Nemasur máwaraip winia aentsur kajinmátramkiara̱i̱ṉ.
Antsu ame kakarmarmiji̱a̱i̱ tsakiṉmakarta túram imianchach awajsarta.
12 Ni yajauch tura wait chichatairi̱ji̱a̱i̱ṉ núnisaṉ
waantu enentáimtumatairi̱ji̱a̱i̱ṉ tura yajauch yumiṉkiartutairi̱ji̱a̱i̱ṉ sepunam eṉkeamu ántsaṉ ártí.
13 Ame suírumji̱a̱i̱ amukárta. Nu arant iwiaaku pujusára̱i̱ṉ tusam amukárta.
Yus Jakupai̱ akupea nuna nuṉka náṉkatra ímianai matsatainia nusha nekaawarti. (Séraj)
14 Kí̱arai̱ kaunainiawai tura ya̱wá̱ núnis áimnainiawai túrunawar péprun téntainiawai.
15 Yurumkan wáinkiatai tusar yujakni̱ ajainiawai.
Yurumá ejemarcha ásar kashi útainiawai.
16 Túrasha wikia Ame kakarmarmin kantamáttajai tura Ame waitnenkartutairmin káshik shiir awajsattajai.
Warí Ámeka winia ayamprutniuitme tura wi jakamnia nekapeamunmaya̱sha ú̱rkame.
17 Yusá winia ayamprutin asaakmin Ámin kantampruáttajme.
Warí Ámeka wi ejamkar pujutai̱ Yúsaitme tura winia waitnentrin Yúsaitme.