Yus Kanta
Yus Ni najankamuri̱ji̱a̱i̱ shiir awajsata
Jú̱ kantan kantamtikniun áatar súsaiti.
66 Ashí nuṉkanam matsatrumna nútirmeka warasrum Yus untsuktarum.
2 Ni Naari̱ naṉkamantu náakam asamtai kantampruátarum.
Túrarum Ni páantniuri̱ shiir awajsatarum.
3 Yus chicharkum “¡Ame najankamurmeka ii ajamai áiniawai.
¡Tura Ame kakarmarmeka timiá uunt asamtai nemasrumka ashampramak umirtamu ajainiawai!” titiarum.
4 Ashí nuṉka matsatainia nu Amincha tikishmátramprartatui.
Núnisaṉ Ámin shiir awajtámainiak kantamprútmawartatui.
Ame Náarmin úuntaiti tusa nisha kantamprútmawartatui. (Séraj)
5 ¡Yus najankamu winirum iitiarum! ¡Ni aents yáiṉtaj tusar najankamuka ii ajamainti!
6 Ni nayantsan akanák núṉkak kukach awajsámiayi.
Tura entsa wekaasar jiniatsuk katia̱rarmiayi.
Ni nui̱ túramuri̱ji̱a̱i̱ wararsartai.
7 Ni kakarmari̱ji̱a̱i̱ tuke akupniuiti.
Uunt nuṉka mátsatkamu ainia nunasha Ni iyawai.
Yusan umirkatniun nakitín ainia nuka Yusja̱i̱ wajatnairataj tu enentáimsacharti. (Séraj)
8 ¡Ashí aentstiram ii Yusri̱ shiir awajkuram chichammiji̱a̱i̱ ántumtikiatarum!
9 Iwiaaku apujtamas wáitmajnia nuka Níyaiti
tura ii nawé̱ atajkintra̱i̱ tusa wáitmaji.
10 Warí, Ame Yusá iin nekapkartusume
tura winchá jiru unuikiar imiatkincha awajsamua nútikiartuame.
11 Túram nekanam eṉkekratkame
túram ii tuntupén kijin awaṉtkartukume.
12 Ii nemasri̱ kawainium eketka muuknum najarkutak naṉkakartukit tusam tsaṉkatkarmame.
Tura jiniumaṉ ántsaṉ entsa tsuumainiumaṉ naṉkamakmiaji.
Nu naṉkarakrin peṉké atsumachminnium apujkartusmame.
13 Ame Je̱e̱minkia taṉkun takamtsuk aestuataj tusan itiattajai.
Tí nekas túrattajai tímiaj núnaka umiktatjai.
14 Warí, wi wáittsan pujumaj nui̱
wi chichakmaj núnaka umiktatjai.
15 Taṉku jaerman takamtsuk aestuan murik áishmaṉka mukuintiuri̱n akuptúktatjame.
Tura waaka nuyá̱ chipiu áishmaṉkan aestuatniun itiartitiajme. (Séraj)
16 Ashí Yus arantak umirin árumna nútiram winirum antuitiarum
túrawakrumniṉkia winia iwiaakmarja̱i̱ túrama nuna ashí ujaktatjarme.
17 Winia wenurja̱i̱ yaintkiat tusan Nin untsukmajai
túran chichampruja̱i̱ shiir awajsámjai.
18 Wi enentái̱rja̱i̱ṉkia tunaan aneayatnak Yusan áujsaitkiuiṉkia
Uunt wíniaka anturtukcha̱a̱yi.
19 Antsu wi yáintkiata tusan seamaj núnaka
Yus ti nekas wíniaka anturtukmai.
20 ¡Wi seamuncha
tura Ni waitnenkartutairi̱ncha winia suritrukcha asa
Yus shiir awajsamu atí!