Yus Kanta
Kúntuts pujakur untsumkatin
Tawit kantamámu
69 Uunt Yusá, uwemtikrurta.
Entsá ki̱akan jakea núnis nekapeajai.
2 Maa, mukutniunam jíinkichminium
kame entsá wáinchiri̱ jurukí̱ init kunanam ewekámma ánis nekapeajai.
3 Warí, untsú untsumu sue̱ruí sa̱a̱rjai tura pimpiki̱ pujajai.
Kame urutái winia Yúsrusha yáintkiata tusan útkun ji̱rui̱sha e̱a̱kjiai.
4 Winia nemasur peṉké ántar kajertuiniak itiurchat awajtústai tuinia nu,
intiashruja̱i̱ naṉkaamas ti untsurí kawentrukai.
Nu arant kasarkachariatnasha súsartiniujai.
5 Yusá, wi enentáimtsuk túramu paant nékame.
Nu arant winia tunaaruka Ámiji̱a̱i̱ṉkia ti páantaiti.
6 Ashí Akupin Uunt Yusá Ámin enentáimturmainia nu winia tunaaruja̱i̱ natsa̱a̱rcharti.
Israer shuara Yusri̱yá Ámin e̱a̱tmainia nusha awajirar enentáimpracharti.
7 Maa, Áminiu asan wishikruiniakui wáitsaitjiai.
Núnisnak natsanmai̱ ajakuitjiai.
8 Warí winia yatsuruk yatsurcha núnis enentáimturainiawai.
9 Nu arant ame Je̱e̱min ti shiir atí tusan wakeruku asamtai
Ámin wishikramainia nuke winiasha wishikruraruiti.
10 Wi tí kuntuts nekapeakun ijiarmán útmiajna
nui̱sha natsanmai̱ awajtúkarmai.
11 Núnisnak kúntuts pujakur entsatái̱ pushin entsarmatai
áujmatkur anajmasar wishiktai̱ awajtúsarmai.
12 Náamkarusha pepru wá̱i̱ti̱a̱i̱ri̱n pujusár áujmatainiaksha winia áujmatriarmai.
Núnisaṉ nampekusha winia náarun pachisar wishikruiniak kantamprútiarmai.
13 Túmaitkiusha Uunt Yusá, wáitnenmai iirsamamna nu tsawantin Aminiak áujsamajme.
Tura Yusá Ame núkap waitnenkartutairmiji̱a̱i̱
tura ti nekas uwemtikkiartutairmiji̱a̱i̱ anturtukta.
14 Kame kucha mukutniunmaya̱ júsatniua ánis itiurchatrui̱ya̱ jurusta. Waya̱t tusam iniaitiusaip.
Kame entsá kunarí̱ya̱ júsatniua núnis kajertuinia nuyá̱ aṉkant awajtusta.
15 Chíchimi jukí̱ emeṉkákat tusam iniaitiusaip.
Nui̱ init ujutukcharti.
Núnisaṉ wa̱a̱sha yututáshti.
16 Ámeka Uunt Yusá, péṉker asam aneṉkratniuitme.
Tuma asam anturtukta.
17 Wikia Ámin takarniuitjiai.
Ti waitsa pujakuisha wárik anturtukam enentáimtursata.
18 Winia nemasur ti irunkui
uwemtikrataj tusam tarutim aṉkant awajtusta.
19 Winia nemasur kajertuiniasha
tura wishikruiniak natsanmai̱ awajtuinia nusha
Amek paant nékainiame.
20 Winia wishikrurarma nu ti itiurchat enentáimtikrimiai.
Túmakun tí kuntuts nekapeajai. ¿Yaki waitnentrurat? tímiajai.
Támasha peṉké atsuarmiayi. Kame e̱a̱knasha wáinkiachmajai.
21 Peṉké yurumkan surutsuk tumá tsáaṉken surusármai
tura kitiamakuisha churuinian áatrarmai.
22 Maa, namperan iruntur matsamtiartatna nui̱ṉ emetnawarti pisarara̱i̱ṉ.
Tura péṉker matsatji tu pujuiniamunam sumamtiknawarti.
23 Ji̱ kusukar wainmakchamnia ajasárti.
Tura aya̱shi̱ kurarpat nekapenak titiaraktak ajarti.
24 Kajertamainia nusha ame íisarta.
Tura kajetáirmin paant nekaawarti.
25 Ni je̱e̱sha emestukam pujuschamnia awajtúsaram mashiakarti.
26 Warí, ame asutiámiam nuna nisha awenawaruiti.
Tura aya̱shi̱ emeskamiam nuna áujmatainiawai.
27 Ni yajauch túramuri̱ni̱ṉ yájauchik patatsarta.
Ame péṉkerumiṉkia peṉké pachinkiacharti.
28 Kame tuke iwiaaku átin papinium ni naari̱ anujtúkaraip.
Núnisaṉ péṉkera túrin ainia núja̱i̱sha iruntracharti.
29 Yusá, najaimiakun wáitsan tí kuntuts pujai̱ṉ
uwemtikruru asakmin nupetmaku nekapeajai.
30 Yusa náari̱n pachisan kantampruáttajai.
Tura yúmiṉkiakun naṉkamantu awajsattajai.
31 Núja̱i̱ṉkia waaka uunt maar áestuatniuja̱i̱sha naṉkaamas Uunt Yus shiir enentáimsattawai.
32 Péejchachisha nuna wáinkiar warasartatui.
Atumsha Yusai̱ weankátarum túrakrumka shiir enentáimsattarme.
33 Warí, Uunt Yuska atsumainiancha anturniuiti
tura Niniu sepunam pujuinia nunasha imianchaka enentáimtuiniatsui.
34 Wats, nayaimpisha, nuṉkasha, nayantsasha
tura ashí nui̱ irunainia nusha Yusan shiir awajsarti.
35 Warí, Yus Seúnnumia̱ aentsun uwemtikrattawai.
Tura Jutá nuṉkanam ataksha péprun najankattawai. Nui̱ pujusár nuṉkenawartatui.
36 Ni takarniúri̱ uchirí̱ ártatna nu nui̱ṉkia matsamsartatui.
Tura Nin aneena nuke nui̱ṉkia pujusártatui.*