Yus Kanta

Tuma asamtai winia pataaturainia nuyá̱ uwemtikruram aṉkant awajtusta.

 2 Ayamprúktin atsakui úunt ya̱wa̱ warí itiurniuit

nútikrua winia wakantrun aents yajauch awajtúsar ayampruttsuk ikiurkiara̱i̱ṉ.

 3 Uunt Yus winia Yusru, ju̱nasha túrawaruitkiuiṉkia

tura yajauchia nunasha túraitkiuiṉkia,

 4 wiji̱a̱i̱ péṉker pujan yajauchí yapajkiaitkiuiṉkia

tura winia nemasur áiniancha peṉké ántranak atantraruitkiuiṉkia,

 5 antsu nuiṉkia winia nemasur ainia nuka winia wakantrun pataatuk amayá̱ṉ

winia iwiaakmarnaka nuṉká najarar

winia péṉker náarnaka peṉké ántar awajsarti. (Séraj)

 6 Uunt Yusá suir enentáimkium ayamprutkata.

Winia wáitkiarainia nuna kajetáiri̱ wáitkiam

winia waitnentrakum sumamtikiawarta.

 7 Aents iruntraru téntatmakartatui

túrunamtai Ámeka nui̱ uuntri̱ ajasam pujusta.

 8 Uunt Yus aents iruntrarunka sumamtikiattawai.

Maa Uunt Yusá wi péṉker túriniaitjiana

tura wi urukuitiaj nuja̱i̱ métek wíniaka sumamtikruata.

 9 Yusan enentáimtichu ainia nuna yajauchiri̱nkia amukati

tura péṉker túrin ainia nuka péṉker wáinkiata.

Yuska péṉkeran túrin asa aentsu enentáincha

tura enentáimmiancha nekapas iyawai.

10 Winia tantaruka Yúsaiti

tura naka enentáimin ainia nuna uwemtikniuiti.

11 Péṉkeran túrin ainia nuna ayamprinkia Yúsaiti.

Yajauchin túruinia nuna Yus tuke tsawant kajerawai.

12 Tura Yusan enentáimtichu nekas enentáiji̱a̱i̱ enentáimsar tunaari̱n iniayachkuiṉkia Uunt Yus puya̱ri̱n atsaktawai

tura Ni tíshimkiuri̱n iwiar aya awajás pujurui.

13 Núnisaṉ mánaikiar jatain Níniunak

tura naṉkirí̱ncha kean iwiar takakui.

14 Iisiá Yusan enentáimtichu yajauchiri̱ji̱a̱i̱ enentáimias íwiareawai

tura yajauchin ajaprukmatai nuya̱ṉka wait akiiniawai.

15 Wa̱a̱n ti init tá̱i̱wiarai

túrawar ni wa̱a̱ tá̱i̱miunmaṉ iniawarai.

16 Ni yajauch túramuri̱ ti takakmasma nuke muukem aju̱a̱rartatui

tura tí yajauch túrutai̱ṉ muuknumaani̱ iniantrattawai.

17 Tura Yusa túrutairi̱ṉkia péṉker asamtai wi Uunt Yusan yumiṉsan shiir awajsattajai

túran Uunt Yusa naari̱ Ashí Naṉkamantu asamtai kantampruáttajai.