Yus Kanta
Uunt akupin Yus áujtustin
Saramúṉ kantamámu
72 Yusá, akupin péṉker atí tusam naka enentáimsatin susata,
tura uchirí̱ péṉker túrin atí tusam yaiṉtá.
2 Túram nisha ame shuarumin
núnisaṉ áminiu wáitiainia nunasha péṉkera túrak yaiṉkiartatui.
3 Yáiṉkratin asamtai náinniumia̱sha imiatkinchanum
shiir pujustincha tura péṉker matsamsatniusha átatui.
4 Núnisaṉ péprunam wáitkiasma matsatainia nunasha ayamprúkartatui.
Tura atsumainia nuna uchirí̱ncha yaiṉkiartatui nuyá̱ itiurchat awajkartinniasha nupetkartatui.
5 Untsurí uwí akupas pujustatui.
Kame etsa̱sha nantusha untsurí uwí eketainia núnis nisha akupin átatui.
6 Kame nupa̱ kuarman yumi yútak ju̱yu̱í̱ ajak wárik tsapamtikia
nútikias nisha shuaran péṉker yaiṉkiartatui.
7 Ni akupeamu tsawantri̱ṉkia péṉkera túrin ainia nuka shiir matsamsartatui.
Kame kashi nantu ekeemtiatna nui̱ṉkia ni péṉker akupeakui itit awajsachma tuke átatui.
8 Nayants náṉkatra tímianai tura Yúpratis entsanmaya̱ juarki̱
ashí nuṉkanam akupin átatui.
9 Kampuntin atsunum pujuinia nuka nin tikishmátrartatui.
Túrunawar péejchach wáinkiartatui.
10 Nuya̱sha Társesnumia̱ úunt akupin áiniasha tura tsue̱r nuṉkanam pujuinia nusha ni wariri̱ ikiatkar súsartatui.
Nuyá̱ Shiwia nuṉkanmaya̱sha tura Séwanmaya̱sha nútiksaraṉ súsartatui.
11 Kame ashí úunt akupin ainia nusha nin tikishmátrartatui.
Núnisaṉ ashí nuṉkanmaya̱ aents ni takarin ártatui.
12 Kame atsumak seamainiancha
tura wáitkiasma yáiṉchamu pujuiniancha aṉkant awajsártatui.
13 Kuítrinchan tura atsumainiancha waitnentrar
itiurchatri̱ya̱ uwemtikiainiak yaiṉkiartatui.
14 Wáitkiasmanumia̱sha tura ti yajauch awajkartinniumia̱sha
uwemtikramnia asa aṉkant awajsártatui.
15 Tuma asa iwiaaku pujuttawai. Nuyá̱ Shíwianmaya̱ aents kurin súsartatui.
Tura iniaitsuk Yusan seatiartatui.
Núnisaṉ “ashí tsawant shiir awajnásti” tiártatui.
16 Nuṉká pakari̱ncha murarí̱ncha árak núkap atí.
Kame Ríwianu nuṉkanam árak tsapana tímiatrus pampaṉkartatui.
17 Etsa̱ ekemtiatna ju̱i̱ṉkia ni náari̱ṉkia tuke shiir awajsamu átatui.
Ashí nuṉkanmaya̱sha niji̱a̱i̱ shiir awajnásartatui.
Tura “ti shiir awajsámuitme” tiártatui.
18 Wats, Uunt Yus Israera Yusri̱ya nu shiir awajnásti.
Aya Niṉki nekaachminian najanniuiti.
19 Ni naari̱ naṉkamantu atí.
Tuma asamtai tuke shiir awajnásti.
Ashí nuṉkanam ni kakarmari̱ piaktí. Nuke atí.
20 Isái uchirí̱ Tawit Yus seamu ju̱i̱ṉ umíawai.