Yus Kanta

¡Núnisrumek untsurí nayantsa kaanmatkari̱n matsatutirmeka shiir enentáimkiuram warastarum!

 2 Nin ayamchiri̱ṉkia yuraṉmisha tura kiritji̱a̱i̱ téntakmaiti.

Tura nekasa nuja̱i̱ métek sumamtiktairi̱sha

tura naka enentáimtairi̱sha Ni akupeamuri̱ṉkia je̱a̱ je̱a̱mkur aeprukmanum ekenir najanamua núnisaiti.

 3 Niinkia ji keá eem wéawai

tuma asa nemasri̱ téntak wajainia nuka esainiawai.

 4 Ni péetmari̱sha nuṉkan tsáapin awajeawai.

Tura nuna iis nuṉkasha tákeer ajawai.

 5 Uunt Yus ashí nuṉka nérentin asamtai naint ainia nuka mikia núnis

Uunt Yus íimmianum kuáraru áiniawai.

 6 Nayaimpikia Yusa naka túramuri̱n paant etserainiawai.

Tura ashí aents Ni páantniuri̱n wáinkiaruiti.

 7 Tura nakumka najankamu yus shiir awajniútirmeka tura enentáimtintirmesha natsa̱a̱rtarum.

Núnisrumek ashí najankamu yústirmesha aya Niṉki tikishmátratarum.

 8 Seun antuk warasmai.

Maa Uunt Yusá nekasa nuja̱i̱ métek sumamtikin asakmin

Jutanmaya̱ núwa̱ka warasaruiti.

 9 Kame Ámeka, Uunt Yusá, ashí nuṉkanam imiá naṉkamantuitme.

Ántsaṉ najanamu yus írunna núja̱i̱sha naṉkaamas Ámeka tí uuntaitme.

10 Uunt Yus aneatirmeka yajauchikia muí̱jkiatarum.

Kame Nin ti shiir enentáimtus umirin ainia nuna iwiaakmari̱nkia péṉker wáitniuiti.

Tura Yusan umircha ainia nuya̱ṉka uwemtikiar aṉkant awajui.

11 Péṉkera túrin shuar ainia nuka tsáapninian wáinkiartatui

tura naka enentáimkia ainia nusha warastin sunasartatui.

12 Péṉker túrintirmeka Uunt Yusai̱ṉ shiir enentáimsarum warastarum.

Tura tunáa máatrachu Yus asamtai enentáimtusrum shiir awajsarum kantamátarum.*