Jíinkiarma
Israer shuar iniatai̱niu akupkámu
21 21:1-6 Israer shuar takarin armia nuka sais uwí takakmasar uwí siátitinkia aṉkant jíinkitin ármiayi. Tura nuatkaksha núja̱i̱ṉchuka natsaksha takakmastaj tusa waya̱ṉka núnisaṉ jíinkitniuyayi. Antsu núwa̱ka ni uchirí̱ji̱a̱i̱ uuntri̱ nuṉke̱n juáktin ármiayi. Tura áishmaṉsha ni nuwe̱ja̱i̱ pujustinian wakerakka nui̱ṉsha juákminiuyayi.
7 21:7-11 Antsu Israer shuar ni nawantri̱n iniatai̱ atí tusa súrakui nu nuwa̱ja̱i̱ itiurkamniait tusa ju̱ akupkámu áiniawai. Núwa̱ka áishmaṉ aṉkant jiiniainia núniska jíinkichartiniaiti. Núwa̱ka ni uuntri̱ nakitiamka sumakma átiniaiti túrasha yajaya̱ aentsnumka surukma áchatniuiti. Ni uuntri̱ uchirí̱ núwe̱nkuṉka nawantri̱ya ímiatrus ashí ni takakna núurtiuk nérentin átiniaiti. Tura nakitraṉka antsu nuiṉkia aṉkant wéawai.
12 21:12-16 Maṉkartuaṉka mantamnattawai. Tura yáakesh maṉkartuaṉka chíkich nuṉkanam u̱mkamniaiti. Yus ú̱mkatniun aetak iwiarturua nui̱ u̱mkattawai. Aparí̱nkisha nuíchuka nukurí̱nkisha mámtaikia aentsun achikiar máiniana nútikiam nisha jakattawai.
17 Aents ni aparí̱ncha nukurí̱ncha yajauchiji̱a̱i̱ yúmiṉkia nuka nekas mantamnatniukete. 18 Tura yaaksha maani̱ pujusár chikichan kayaja̱i̱ṉsha núja̱i̱nchuka uwejé̱ja̱i̱ ijiú tsupíamu jákachmatai̱ṉkia antsu jaa tepá 19 nantaki̱ wai̱ri̱ ushukrus wekaakuiṉkia katsumkartukua nuka aṉkant ajawai. Áyatik tsuámtikratniuiti tura takakmasminiaitiat jaak tsawant iniaṉkarmanum akiktiniaiti. 20 Tura yaaksha ni takarniúri̱n áishmaṉnaksha nuwa̱nkesha numiji̱a̱i̱ awati maaṉka ni maa asa ásutniatniukete. 21 Antsu mayati chikichkí tura jimiará tsawantkesha pujusmataiṉkia asutniáshtatui. Warí nuka níniukete. 22 Áishmaṉ maani̱ pujusár nuwa̱ ajamtin katsumkam játsuk aya ishimtikimtai̱ṉkia nuwá̱ aishri̱ tura sumamtikin ainia nu tuinia nuja̱i̱ métek akikmaktiniaiti. 23 Antsu jakamtaiṉkia nisha mantamnatniuiti. 24 Nuyá̱ ni jí̱nkisha apujtúkmataiṉkia nisha apujtúnkatniuiti. Nái̱nki̱sha akarkámtaiṉkia nisha akarnáktiniaiti. Núnisaṉ uwejé̱n tura nawe̱nkesha tsupirkamtaiṉkia nisha tsupirnaktiniaiti. 25 Tura sukukratamtaisha nisha núnisaṉ sukuatniuiti tura akaṉkratkamtaisha nisha núnisrik akaṉtiniaiti tura awatkartimtaisha nisha núnisaṉ awattiniaiti. 26 Nuyá̱ náṉkamas áentskesha ni takarniúri̱n áishmaṉnaksha nuwa̱nkesha ji̱ awati yajauch awajtúska, ji̱n yajauch awajtúsu asa aṉkant akupkatniuiti. 27 Tura ni takarniúri̱n áishmaṉnaksha nuwa̱nkesha nai̱n akarkáṉka, nai̱n akarka asa aṉkant akupkatniuiti.
28 21:28-32 Waaka aentsun mámtaikia mátniuiti. Machma ataksha aentsun mámtaikia antsu nuiṉkia taṉkú nérenniuri̱sha tura taṉkusha mái̱ jakartiniaiti.
33 21:33-36 Chikicha taṉkuri̱ aents péṉker íischam jakamtaikia taṉkun péṉker wáinchana nu, néreniua nuna waaka sumak awaṉtuktiatui tura niṉkia jaka nuna jukitiawai.