Jíinkiarma
36 Tuma asa Pisaríirnaka nuyá̱ Uriapnasha ashí aentsja̱i̱ naṉkaamas enentáimsar nekaar nu takat túratniun Uunt Yus nekatai̱n tura enentáimsatniuncha súsarai. Tura nisha Uunt Yus jintintiámu ásar Ni tana nuja̱i̱ métek Uunt Yusa Je̱e̱n iwiarkatniun takakmasartatui” tímiayi Muisais.
2 36:2-5 Nuya̱ṉka Muisais ju̱ áishmaṉkan Uunt Yus nekatai̱n súsarmauya nuna untsukarmiayi. Tura niṉkia Israer shuar Yusan ántar súsarmia nuna Yus Shiir Awajtai̱ Je̱e̱ je̱a̱mtinian achikiármiayi. Israer shuarka tuke káshik Yus ántrarik súsatniun naṉkaamawarmiayi. Takakmau armia nu Uunt Yus timia nuja̱i̱ naṉkaamas tí nukap awai tusar Muisaisan ujakármiayi.
6 36:6-7 Nuiṉkia Muisais Israer shuaran matsamkamunam chichaman ashí akupeak chichaak “Atakka Yus súarmena nu itiairap. Kame tí nukap awai” tiármiayi.
Yus Shiir Awajtai̱ Je̱a̱ áchitramuri̱
8 36:8-13 Takakmasat tusar apujsamu armia nu Yus Shiir Awajtai̱ Je̱a̱n tias tarachin esantí̱ṉkia paintiúchu tura waṉkantí̱ṉkia kuatru kuntu jean riniu wiṉkiaja̱i̱ yamákáiji̱a̱i̱ tura kapanniuja̱i̱ tí peṉker najanawarmiayi. Kirupínian nakumak tí peṉker najankarmiayi. Seṉku tarachin chíkich armia nuja̱i̱ apa̱yá̱miayi. Tura chíkich seṉkuncha nuja̱i̱ métek najanawarmiayi. Seṉkuintia tenten wiṉkian najankarmiayi. Tarachin mái̱ yantamen tura seṉkuintia tseṉkenan kurimiak iṉkiumtikramiayi. Túram Yus Shiir Awajtai̱ Je̱a̱ka chikichik ajasmiayi.
14 36:14-18 Núnisaṉ Yus Shiir Awajtai̱ Je̱a̱ nukurkatniun chipiu ure̱ja̱i̱ aunse najankarmiayi. Kame ju̱í̱ni̱ṉkia seṉku tura atuni̱ṉkia sais tarachin nuparman traintikuátru kuntu jean apa̱yá̱war seṉkuintia tentech tseṉkentri̱ntin yaṉkú jiruja̱i̱ najanamuja̱i̱ Yusa jutai̱ Je̱e̱nka íkiakarmai.
19 Yus Shiir Awajtai̱ Je̱a̱n nukurke̱nka chipiu nuapé̱ kapantin eṉkermaja̱i̱ najanamai tura péṉker nuap arma núnaka nukurke̱ nukurkatniun ikiusmai.
20 36:20-30 Núnisaṉ Yus Shiir Awajtai̱ Je̱e̱n akasia numi kuaraintiúchu nakarmaja̱i̱ najanamai. Numi ainia nu tias kuntu jeauyi tura nuka naka péermauyi. Numi nakarmanum aṉkant aṉkant chikichji̱a̱i̱ iṉkiumtikratniun jimiará nayamun takakuyi. Núnisaṉ numi nakarma tépakmari̱n aṉkant aṉkant ikiusártinian jímiaran kuít jiruja̱i̱ najanamai. Yus Shiir Awajtai̱ Je̱a̱ anaraani̱ yantam painti numiji̱a̱i̱ nakar najanamai. Tura arakaani̱ṉkia painti numí nakarma armai. Tura sais awajrámuri̱ yantamka tura jimiará tsukintri̱ṉkia nuyá̱ ashí tsukintri̱ nekapmatramka uchu armai.
31 36:31-34 Núnisaṉ winiaṉkenka akasia numiji̱a̱i̱ najatamai. Yus Shiir Awajtai̱ Je̱a̱ jimiará yantameṉka tiásauyi tura ukuamu yantamka séṉkuyi. Núnisaṉ kuriji̱a̱i̱ tenten najankamai. Tura wiyaṉtratniun numi nakarmán awaj ikiusmai. Winiaṉken numi nakarmánka kurimkiamai.
35 36:35-38 Núnisaṉ tarach kíṉkian yamákáin tura kapanniun tí peṉker takakmas ríniuja̱i̱ najanak kirupínniasha najankamai. Tura tarachniaka kuatru páunam numiji̱a̱i̱ najana kurimkiamai. Tura tépakmari̱nkia kuít jiruja̱i̱ najanamai tura tseṉkentri̱sha kuri armai. Núnisaṉ Yus Shiir Awajtai̱ Je̱a̱ wáitiri̱nkia tarach uku̱jtiurmaja̱i̱ naimiar ejatámai. Tura seṉku páunam nenaamai. Tura tseṉkentri̱sha kurimkiamuyi tura tépakmari̱nkia yaṉkú jíruyi.