Nekatai̱n Jintinkiartin
21 Uunt Yuska akupniu enentái̱nkia entsa akatai̱ya̱ áitkiaraiti.
Tuma asa Ni wakera núnaka tímiatrusaṉ umimtikniuiti.
2 Shuar ni íimiaskeka ashí wi túrajna nu péṉkeraiti tu enentáimtumaiti
túrasha tu enentáimiari̱ṉkia Uunt Yus sumamtikiui.
3 Nákak wekaak tura péṉker enentái takustinia nuna
Uunt Yus ti shiir wakerawai waaka maar áestuatniua nuna naṉkaamas.
4 Waantu enentáiji̱a̱i̱ íimsatin tura waantu enentáimtumastincha tunaiti.
Kame Yusan enentáimtichuka nuní̱ enentáimin áiniawai.
5 Shuar emka péṉker enentáimtur takakmana nuka núkap wáitmaiti
tura wáurtus waitmaktaj tiniu ainia nuka kuítrincha ajáu áiniawai.
6 Jákatniun e̱a̱iniana nuka tura waitruar kuit ikiauṉkatniuka
yuraṉkim utsantran etsa̱ sukuá emeṉká ántsaiti.
7 Péṉkera nuna túratniun nakitín ásar Yusan enentáimtichu peṉké túrachminian túruiniak
imiá niṉki yajauch awajmamainiawai.
8 Yajauch shuar ainia nuna túrutairi̱ṉkia jintia tuníarua núnisaiti
tura péṉker shuar ainia nuna túrutairi̱ṉkia jintia naka tímiatrusaiti.
9 Kajen nuwa̱ nuja̱i̱ je̱a̱ iwiaramunam pujustinkia péṉkerchaiti
antsu yajauch je̱a̱nam pujustin imiá péṉkeraiti.
10 Shuar yajauchia nuka aya yájauchiniak enentáimniuiti
tuma asa ní shuari̱sha yájauchik íismaiti.
11 Shuar yajauchia nu asutniámtaiṉkia uchi enentáinniuka nuna iisar ashamkarti
tura shuar ti neka nuka chicharkamka antuk unuimiawai.
12 Péṉkera túrinkia Yusan umirkacharu ni yajauch túramuri̱n
itiur émesea nuna paant wainiui.
13 Shuar kuítrincha “yaintkiai” támaitiat anturchaka
nisha ukunam “yaintkiai” tusa seameakui peṉké umirnakchattawai.
14 Shuar ti kajena nusha ú̱kar ántrar súsatniua núja̱i̱ṉkia tsaṉkuawai.
Wariṉsha súakur íshishmasrik susamka shiir enentáimiui.
15 Péṉkeran túruiniak umiinia nuka ti warainiawai
antsu yajauch shuarka péṉkeran túruinia nuna mash mesertatui tu enentáimtuiniawai.
16 Shuar esetar wekasatniun enentáimchaka
jakaaja̱i̱ irunar matsamsatniuiti.
17 Shuar aya wárastinniak pujurniuka kuítrincha átatui.
Nákikia aya námpetnak pujurin asa peṉké kuítriniashtatui.
18 Wáitrin tura yajauchin túrinia nu asutniakui
péṉkera túrinkia aṉkant awajnástatui.
19 Suírintin nuwa̱ja̱i̱ tsaniṉkia pujustinji̱a̱i̱ṉkia naṉkaamas
atsamunam iik pujustin imiá péṉkeraiti.
20 Péṉker shuara je̱e̱ṉkia kuitcha warirí̱sha írunui
tura shuar nétsea nuka ni takurmakmancha ashí amúawai.
21 Péṉker enentáimtai̱ji̱a̱i̱ wekaana nuka tura naka túrana nusha iwiaakmancha
tura métek ayamprúk péṉker wainkiamuncha nuyá̱ shiir awajnástinniasha wainkiattawai.
22 Shuar ti neka nuka ni nékamuja̱i̱ írutkamuri̱n emesratniun jeawai
tura nekas kakarmaitjiai tauncha nékamuja̱i̱ṉkia nupetkamniaiti.
23 Shuar émkak enentáimiar chichaana nuka kúntuts enentáimias pujuschattawai.
24 Nekaska witsukaitjia naṉkamantunka tu enentáimtumaka wishikkiartin “netse” tutainti.
25 21:25-26 Shuar nákikia aya wakeriniaiti túmak takakmastinniasha enentáimcha asa
ni wakeramuri̱n takustaj tu enentáimiuk tsawant takamtsuk jata nekapniuiti
tura antsu ásumpkia takakmas surimtsuk ajamasminiaiti.
27 Yusan enentáimtichua nu Yus áestuamu Yúsja̱i̱ṉkia muí̱jmiainti.
Kame yajauch enentáiji̱a̱i̱ súamua nuka nuna naṉkaamas yajauchiti.
28 Shuar wáitrinia nuka jákartatui
antsu aents emka antuktinian nekáa pachimtsuk chichastatui.
29 Shuar Yusan enentáimtichua nuka kajemtin íirkaiti
antsu péṉkerka naka enentáimias wekainiaiti.
30 Nekatai̱ji̱a̱i̱sha tura enentáimtai̱ji̱a̱i̱sha
núnisaṉ chichamja̱i̱sha Uunt Yuska peṉké itiurkachminiaiti.
31 Suntarsha mesetnum mánaiktaj tusa ni kawairi̱n íwiareawai
túrasha aya Yusak ni nemasri̱n awakatniun tsaṉkatkattawai.