Nekatai̱n Jintinkiartin

Túrakrumka péṉker enentáimkia átatrume.

 2 Wi péṉker jintintiamajrumna ju̱ iniaitsuk umiktarum.

 3 Wisha uchi asaṉka apartiniuyajai.

Nukur íismaka wáitnenmainiuyajai.

 4 Tura winia aparsha jintintrak

“Winia chichamur tuke enentáimtusam pujusta.

Núnismek wi jintíamur kajinmátkip.

Núja̱i̱ṉkia iwiaaku pujustatme” turutniuyayi.

 5 “Ti neka tura péṉker enentáimkia átinia nusha wakerukta.

Winia chichamur kajinmatkim iniaisaip.

 6 Áintsamek nekatai̱sha iniaisaip. Iniaiyachmaka péṉker wekasatniun yaintmaktatui.

Núnisaṉ aneamka ayamprutmaktatui.

 7 Ashí naṉkaamas nekatai̱ wakerukta.

Kame takustin wakeramna nuna naṉkaamas esetra enentáimin átin wakeritia.

 8 Nuya̱sha naṉkamantu awajsata nu túramka páantin awajtámsattawai.

Kame nekatai̱ shiir enentáimtusam miniakkata túramka arantutai awajtámsattawai.

 9 Nuiṉkia shiir awajtámas tawasap etseṉkruktinia ánis tí shiirmach najatmattawai” turutniuyayi.

10 Tuma asamtai uchiru, winia chichamur antukta tura wi tájamna nu ímiatrusmek túrata.

Nu umíakmeka núkap uwí iwiaaku pujustatme.

11 Tuma asamtai nekatai̱ jintianmaani̱ jukin péṉker ewekámsamajme.

12 Nú jintianam wekaakmeka tukumkashtatme.

Tura tsékeakmesha iniarchattame.

13 Wi jintintiajmena nu umikta, kajinmátkip.

Warí núiti ame péṉker pujustintrum.

14 Nu asamtai uchiru, Yusan enentáimtichu wekainia nu jintianmaani̱ wekasaip.

Tura ni yajauch túrutairi̱sha túrawaip.

15 4:​15-16 Yusan enentáimtichu yajauch túratniun ti wakeruiniak itiurchat túrachka kánuiniatsui.

Yanaksha itiurchat awajsachka kanartinian tujintiainiawai.

Tuma asamtai Yusan enentáimtuiniatsna nuna túrutairi̱ túrusam wekasaip.

Iniaisata tájame.

17 Warí yajauch túratniuka ni yurumkari̱nti

tura yajauch awajkartutairi̱sha ni umutairi̱nti.

18 Antsu Yusan umirkaru wekaamuri̱ṉkia etsa̱ etsantki̱ takuuṉki̱ tutupnirka ashí tsáapin ajana núnisaiti.

19 Tura Yusan enentáimtichu ainia nuna wekaamuri̱ṉkia kiritniuiti.

Tuma ásar warinmaṉ tukumak iniainia nunasha nekaamainiatsui.

20 Tuma asamtai uchiru, émamkesam winia chichamur anturtukta.

21 Antsu peṉké kajinmattsuk tuke enentáimtitia.

22 Warí nuka ame aya̱shmincha

tura iwiaakmarmincha péṉker átinian súramui.

23 Ashí wariṉkish péṉker wainkiamnia írunna núja̱i̱sha naṉkaamas ame enentáim wáinkiata.

Warí nuiti ame iwiaakmaram.

24 Yajauch chicham chichastin iniaisata

tura wait chichamsha péṉke chichakaip.

25 Péṉker esetram aya péṉkera nuke iistá.

Tura ji̱misha tuke nekasa nunak iistí.

26 Ame wekaamurmesha péṉker iisam wekasata

tura wekaamna nui̱sha ashí péṉker túrata.

27 Péṉker jintianam wekaamna nuya̱ṉka kanakip.

Antsu yajauch jintia nuya̱ṉka kanakim péṉker jintianmaṉ wekasata.