Anenaitiai̱ Kanta
Anajmarma chichaamu
2 “Wikia Sarunnumia̱ kuku̱jitjiai.
Tura ririu kuku̱j pakanam irunniua tímianuitjiai.”
Áishmaṉ nuwa̱n áujeamu
2 “Jaṉkiniam tsakainia núja̱i̱ naṉkaamas ririu kuku̱j ti shiir áiniawai.
Áintsaṉ nuwa̱ch natsachiji̱a̱i̱ naṉkaamas winia aneamurka shíirmachiti.”
Anajmarma áishmaṉkan aujma
3 “Ashí numi kampuntin ainia nuja̱i̱ naṉkaamas yuraṉ numi nerea núnis ti wakeramuiti.
Núja̱i̱ métek taku áishmaṉ natsach ainia nuja̱i̱ naṉkaamas winia aneamurka ti shíirmachiti.
Winia wakerutairu mikintrari̱n weamkan warasan pujusmajai.
4 Péṉker yurumak iwiaramu je̱a̱nam jurukmiai.
Ni aneṉkrattairi̱ amutamai.
5 Uwa káakuja̱i̱ ikiakáttia tura mansanaja̱i̱ atsaṉturta.
Warí aneṉkratakun jaa pujajai.
6 Ame menaarmeka múukarui̱ wakenmaani̱ awantrusta. Tura untsuurumji̱a̱i̱ṉkia miniakrusta.”
Áishmaṉ Jerusaréṉnumia̱ natsachin tama
7 “Jerusaréṉnumia̱ nuwa̱ch natsatirmin japa kampunniunam írunu
tura sú̱ japa pachisan ‘nekas umiktatjai’ tákurminkia ju̱na seajrume.
Nekas aneṉkratma tsawantri̱ jeamam wáurmamtikiairap
tura aneṉkrattairi̱ ishintiátrairap.”
Nuwa̱ niṉki túmamma
8 “¡Winia aneamuru chichame̱nte!
¡Nuá iisiana, nisha naintiar náintniumia̱sha nanten nanten ajakí̱ winiana!
Murach ainia nuya̱sha aneamur tsékeṉki̱ pee pee winiawai.
9 Winia aneamurka uchich japa áantiaku nuíchuka sú̱ japa núniniaiti.
Iisiana ju̱á tanishnum ánini̱ wajas íimtai̱niam iimna núnisan áṉkasmanum jaka iiru wajawai.
10 Winia aneamurka japa áantiaku nuíchuka japa yamatskam núniniaiti.
‘Iisiana ju̱á tanishnum á̱a̱wini̱ wajas íimtai̱niam iimna núnisan áṉkasmanum jaka iiru wajawai.
11 Warí iisiana yúmikia naṉkaamasai. Chi̱wia̱rai tura yumí tsawantka naṉkaamasai.
12 Nuṉkaṉka kuku̱jchisha paant jíintrarai. Kantamátin tsawant jeayi.
Tura ii nuṉke̱ncha paumtia chichame̱sha ántuwawai.
13 Íkiusha nerekcharaik. Úwasha kuku̱jruiniak kuṉkuniawai.
Maa winia amikru shíirmachia wajakím winitiá.’”
Áishmaṉ nuwa̱n aujma
14 “Winia yampitschiruá, kayá wá̱a̱nam pasuṉmasam jeachat ú̱mkam pujamna
nuyá̱ yapichiram iniakmasam chichasam antumtikrukia.
Warí ame chichamchirmeka yuminchiti tura shíirmach íiraitme ámeka.”
15 “Ku̱jancham kaje̱ntruktarum uchich ku̱jancham uwa kuku̱jruinian ikiajtiúrainiawai.
Nuwa̱ niṉki túmamma
16 Winia aneamurka wíniaiti tura wisha níniuitjiai.
Ririu kuku̱ji ainia nui̱ niṉkia murikrí̱n ayurainiawai.
17 Tsawant káshik tsáapin ajana nui winia aneamuru waketkitia.
Winia aneamurka uchich japa áantiaku nuíchuka sú̱ japa uchich Pitir naintnium tsékea áintsamek ajasta.”*